وبلىس اۋماعىندا سۋ تاسقىنى جاعدايىنا باقىلاۋ جۇرگىزۋ جۇمىستارى تۇراقتى تۇردە ءجۇرىپ جاتىر
تۇركىستان وبلىستىق ءتجد-نىڭ جەكە قۇرامى قىزمەتى كۇشەيتىلگەن رەجيمگە كوشىرىلدى، دەپ حابارلايدى Almaty-akshamy.kz.
«كازگيدرومەت» رمك بولجامىنا سايكەس، تۇركىستان وبلىسى اۋماعىندا 31 قاڭتار مەن 3 اقپان ارالىعىندا جاۋىن-شاشىن مول جاۋىپ، اۋا تەمپەراتۋراسى +12 گرادۋسقا كوتەرىلۋى مۇمكىن. اۋا رايىنىڭ بۇلايشا كۇرت جىلۋى سىرداريا وزەنىنىڭ جوعارعى اعىسىنان كەلگەن سۋدىڭ كوبەيۋى، «شاردارا» سۋ قويماسىنىڭ مەرزىمىنەن بۇرىن تولۋىنا اكەپ سوعۋى مۇمكىن. سونداي-اق وبلىس اۋماعىنىڭ تاۋلى جوتالارىنان باستاۋ الاتىن ارىس، كەلەس، بادام، بورالداي، اقسۋ، شايان وزەندەرىندە سۋدىڭ دەڭگەيى كوتەرىلىپ، جاعدايدى كۇردەلەندىرۋى ىقتيمال. سوندىقتان تۇركىستان وبلىستىق تجد جەكە قۇرامى دا 28 قاڭتاردان باستاپ قىزمەتتىڭ كۇشەيتىلگەن تۇرىنە اۋىستىرىلدى»، - دەلىنگەن دەپارتامەنت حابارلاماسىندا.
وبلىس اۋماعىندا سۋ تاسقىنى جاعدايىنا باقىلاۋ جۇرگىزۋ جۇمىستارى تۇراقتى تۇردە ءجۇرىپ جاتىر. سوڭعى اپتادا وبلىس اۋماعىندا 51 شاقىرىم كانال، 31 شاقىرىم ارىق-اتىزدار مەحانيكالىق تازارتۋدان وتكىزىلدى. بوگەن وزەنىندە 4،2 شاقىرىم جاعا بەكىتۋ، نىعايتۋ جۇمىستارى جۇرگىزىلدى، سونداي-اق 14 شاقىرىم قاشىرتقى ارنالاردىڭ ءتۇبى تەرەڭدەتىلىپ، كەڭەيتىلدى. وتىرار اۋدانى اۋماعىنداعى سىرداريا وزەنى بويىنداعى قورعانىس دامبالارى 10 جەرىنەن نىعايتىلدى. بۇل باعىتتاعى جۇمىستار جالعاسىن تابۋدا. قۇم تولتىرىلعان قاپتىڭ سانى 48 مىڭعا جەتكىزىلىپ، ينەرتتى ماتەريالداردىڭ قورى ارتتىرىلۋدا. 144 دانا موتوپومپا دايىندالدى. سىرداريا وزەنىنىڭ اعىنى كۇندەلىكتى باقىلاۋعا الىندى.
«قازىرگى كەزدە «شاردارا» سۋ قويماسىندا 4 ملرد 409 ملن تەكشە مەتردەن استام سۋ جينالعان. ياعني، سۋ قويماسى 85%-عا تولعان. بۇل وتكەن جىلدىڭ ءتيىستى كەزەڭىمەن سالىستىرعاندا 1 ملرد تەكشە مەترگە ارتىق. ال، «كوكساراي» سۋ رەتتەگىشىنە وتكەن جىلمەن سالىستىرعاندا 1157 ملن. تەكشە مەتردەن ارتىق سۋ جينالعان. سىرداريا وزەنى ارقىلى «شاردارا» سۋ قويماسىنا كورشى ەلدەردەن ورتاشا ەسەپپەن سەكۋندىنا 1500 تەكشە مەتر سۋ كەلىپ، سۋ قويمانىڭ تومەنگى اعىسىنا 1111 م3/سەك سۋ شىعارىلۋدا»، - دەپ تولىقتىردى ۇيىم.