ليسەنزياسىز جۇمىس ىستەيتىن مەكتەپتەرگە قاتىستى مينيسترلىكتىڭ اۋماقتىق دەپارتامەنتتەرى اكىمشىلىك ءىس قوزعادى.
وقۋ-اعارتۋ مينيسترلىگىنىڭ ءبىلىم سالاسىندا ساپانى قامتاماسىز ەتۋ كوميتەتى جانە ونىڭ اۋماقتىق دەپارتامەنتتەرى ءبىلىم بەرۋ ۇيىمدارىنا مونيتورينگ جۇرگىزۋ بارىسىندا ءبىرقاتار قۇقىق بۇزۋشىلىقتاردى انىقتادى. بۇل تۋرالى Almaty-akshamy.kz مينيسترلىككە سىلتەمە جاساپ حابارلايدى.
تەكسەرىس ناتيجەسىندە 2022 جىلدىڭ سوڭىندا 56 مەكتەپ ليسەنزياسىز جۇمىس ىستەگەنى بەلگىلى بولدى. ونىڭ ىشىندە 40 مەملەكەتتىك، 16 جەكەمەنشىك مەكەمە. ليسەنزياسىز جۇمىس ىستەيتىن مەكتەپتەردىڭ ەڭ كوبى استانا جانە الماتى قالالارىنا، اتىراۋ، الماتى، باتىس قازاقستان، تۇركىستان، جەتىسۋ، ماڭعىستاۋ جانە جامبىل وبلىستارىنا تيەسىلى.
بۇگىنگى تاڭدا 11 مەكتەپ ءبىلىم بەرۋ قىزمەتىنە ليسەنزيا الدى. ءۇش مەكتەپتىڭ ماتەريالى سوتتىڭ قاراۋىندا. 42 مەكتەپكە قاتىستى سوت ليسەنزياسىز قىزمەت كورسەتكەنى ءۇشىن ايىپپۇل تاعايىنداۋ تۋرالى قاۋلى شىعاردى.
«زاڭناماعا سايكەس، بارلىق مەكتەپتەر ءبىلىم بەرۋ قىزمەتىن باستاماس بۇرىن رۇقسات الۋى كەرەك. مەكتەپكە ءبىلىم بەرۋمەن اينالىسۋ قۇقىعى ليسەنزيا العان ساتتەن باستاپ قانا بەرىلەدى. ليسەنزيانىڭ جوقتىعى مەكتەپتىڭ جارامدىلىق تەكسەرۋىنەن وتپەگەنىن نەمەسە رۇقسات الۋ ءۇشىن قۇجاتتاردى تاپسىرماعانىن بىلدىرەدى. ليسەنزياسىز مەكتەپتەر ءبىلىم تۋرالى مەملەكەتتىك ۇلگىدەگى قۇجاتتاردى، ياعني نەگىزگى جانە جالپى ورتا ءبىلىم تۋرالى اتتەستاتتاردى بەرە المايدى. ليسەنزياسىز جۇمىس ىستەيتىن مەكتەپتەرگە قاتىستى مينيسترلىكتىڭ اۋماقتىق دەپارتامەنتتەرى اكىمشىلىك ءىس قوزعادى. بۇگىنگى تاڭدا سوت شەشىمىمەن 42 مەكتەپكە ليسەنزياسىز ءبىلىم بەرۋ قىزمەتىن جۇرگىزگەنى ءۇشىن ايىپپۇل سالىندى. ەگەر مەكتەپ زاڭدى تۇلعا رەتىندە مەملەكەتتىك تىركەلگەن ساتتەن باستاپ التى اي ىشىندە ليسەنزيا الماسا، وندا ول سوت تارتىبىمەن جۇمىسىن توقتاتادى»، - دەدى وقۋ-اعارتۋ مينيسترلىگى ءبىلىم سالاسىندا ساپانى قامتاماسىز ەتۋ كوميتەتىنىڭ ءتوراعاسى ەرنۇر داۋەنوۆ.