«شاپاعات» الەۋمەتتىك قىزمەت ورتالىعىنا بيىل 10 جىل تولدى. وسى مەرەيلى كۇنگە وراي الماتىدا «شاپاعات» – شاتتىق مەكەنى» اتتى مەرەكەلىك كونسەرت ءوتتى.
مەرەكەدە الەۋمەتتىك قىزمەتكەرلەردىڭ وزدەرى ءان سالىپ، بي بيلەدى. ولاردىڭ «بىزگە بۇگىن 10 جىل» ءانى كوڭىلدەردەن شىعىپ، ىستىق ىقىلاسقا بولەندى. ءتىپتى، «شاپاعاتتىڭ» شاپاعاتىن كورىپ، سەزىنىپ جۇرگەن، قولاربادا وتىرعان بالدىرعانداردىڭ وزدەرى دە مەرەكەنى ان-جىرمەن ورنەكتەدى.
ورتالىقتىڭ قىزمەتكەرلەرى مەن بالالار بىرىگىپ جاساعان ءتۇرلى بۇيىمدار دا كورمەگە قويىلىپ، كوپتىڭ كوزىن قۋانتتى. ال فوتوكورمە بالالاردىڭ ءتۇرلى كەزەڭدە، ءتۇرلى ءىس ۇستىندە، ساباق كەزىندە تۇسكەن سۋرەتتەرىمەن كومكەرىلدى.
قاي كەزەڭدە دە، قاي ەلدە بولماسىن، ۇرپاق تاربيەسى – باعدارلى بولاشاقتىڭ باستاۋى. تاۋەلسىزدىگىنە تاۋبە ەتىپ، ماڭگىلىك ەل بولۋدى مۇرات تۇتقان حالقىمىزدىڭ رۋحاني باي دۇنيەسىنىڭ ولشەمى مەن ورەسى دە وسى بالا دەنساۋلىعىندا، بالا تاربيەسىندە جاتىر. وسى ورايدا، مۇمكىندىگى شەكتەۋلى بالالاردى قوعامعا كىرىكتىرىپ، ورتاعا بەيىمدەۋدى ۇستانىم قىلعان «شاپاعاتقا» اتا-انالاردىڭ ايتار العىسى دا شەكسىز. سەبەبى، ولارعا مەملەكەت «دىمكاس بالاڭىزدى ءبىز قاراپ بەرەيىك، ءسىز كۇنى بويى الاڭداماي جۇمىسىڭىزدى ىستەپ، تابىس تاۋىپ، مۇقتاجدىق كورمەڭىز» دەپ جاعداي جاساپ وتىر. اتالعان ورتالىققا اتا-انالار بالالارىن تاڭەرتەڭ اكەلىپ تاستايدى، كەشكە الىپ قايتادى. دالىرەك ايتساق، ولاردى ارنايى «ينۆاتاكسي» تاسىمالدايدى.
«شاپاعاتتى» مەرەكەسىمەن قۇتتىقتاعان الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى ءنازيرا توعىزبايەۆا قانداي جاعدايدا دا ءتوزىمدى، سابىرلى، كوپ وتباسىنىڭ اۋىرتپالىعىن ءبىر كىسىدەي كوتەرىسىپ، جەڭىلدەتۋگە ۇلەس قوسىپ جۇرگەن ارىپتەستەرىنە ءىلتيپاتىن جەتكىزدى. الداعى ۋاقىتتا دا تولاعاي تابىستار تىلەدى.
«شاپاعات» الەۋمەتتىك قىزمەت ورتالىعىنىڭ بەلدى ماماندارى كەۋدەسىنە مەرەكەلىك مەدال تاقتى. بۇگىندە زەينەتتىك دەمالىستا جۇرگەن بۇرىنعى قىزمەتكەرلەر دە ورتاعا شاقىرىلىپ، ولار دا العىس حاتقا يە بولدى.
«شاپاعات» الەۋمەتتىك قىزمەت ورتالىعىنىڭ ديرەكتورى نۇرزيا الىمبەكوۆانىڭ سوزىنە سۇيەنسەك، بۇگىندە ورتالىقتان 1،5–18 جاس ارالىعىنداعى مۇمكىندىگى شەكتەۋلى بالالار مەن 18–35 جاس ارالىعىنداعى مۇگەدەك جاندار قىزمەت الادى. ولاردىڭ جالپى سانى – 265. «شاپاعات» كوپسالالى وڭالتۋ ورتالىعىنىڭ ەرەكشەلىگى – بارلىق ۇلكەن-كىشى قىزمەت الۋشىلارعا مەديسينالىق، الەۋمەتتىك، پەداگوگيكالىق كاسىبي قىزمەتتەر كورسەتىلەدى.
• تاقىرىپقا وراي
بيتان سالىمبايەۆا، زەينەتكەر:
بالالاردى جاقسى كورەمىن
– ءقازىر ەڭبەك دەمالىسىندامىن. وسى ورتالىقتا جۇمىس ىستەگەن كۇندەرىمدى ساعىنامىن. مۇنداي ورتالىقتا جۇمىس ىستەۋ وڭاي ەمەس، ول ءۇشىن ۇلكەن جۇرەك، مەيىرىم، ءتوزىم كەرەك. سەبەبى دەنساۋلىعىندا كىناراتى بار، جۇيكە اۋرۋىنا شالدىققان بالاقايلاردى قاراۋ، بارىنە يە بولۋ قيىن عوي. ءبىراق بارىمەن ءتىل تابىسۋعا، كوڭىل بولۋگە تىرىساتىنبىز. ءقازىر دە سولاي ەكەنى ءسوزسىز. مەن بالالارعا ەڭبەك ساباعىنان ءدارىس بەردىم. ولاردىڭ دياگنوزدارىنا قاراي، بەتى-قولىن جۋۋدى، ءوز كيىمىن كيۋدى، تۇيمەلەنۋدى، قاسىق ۇستاۋدى، ىدىس جۋۋدى، ءۇي جيناۋدى، جالپى، كۇندەلىكتى ومىرگە قاجەتتى قاراپايىم داعدىلاردى ۇيرەتتىم. بالالاردى شىن نيەتىڭمەن جاقسى كورسەڭ، ولار جىلىلىقتى سەزىنەدى. مەن بارلىق بالانى جاقسى كوردىم.