2021 جىلعى قۇرعاقشىلىق اۋىل شارۋاشىلىعى ءونىمىنىڭ شىعىمىن 2،4%-عا تومەندەتتى
قازاقستان 2030 جىلعا دەيىن جوسپارلانعان اگروونەركاسىپتىك كەشەن ونىمدەرىنىڭ ەكسپورتى كولەمىن تومەندەتپەك. بۇل تۋرالى «اشىق» نقا پورتالىندا جاريالانعان ۇكىمەت قاۋلىسىندا كورسەتىلگەن، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ۇزدىكسىز پاندەميا جاعدايىندا بۇكىل الەمدە ەكونوميكالىق ءوسۋ قارقىنىنىڭ باياۋلاۋى بايقالادى. شەكارالاردىڭ جابىلۋىنا بايلانىستى ەلدەر اراسىنداعى سىرتقى ساۋدا قاتىناستارى تومەندەدى جانە پاندەمياعا دەيىنگى ساۋدا قاتىناستارى قاشان قالپىنا كەلەتىنى بەلگىسىز. وسىعان بايلانىستى، اگروونەركاسىپتىك كەشەن ءونىمىنىڭ ەكسپورتىن 1،5 ەسەگە ۇلعايتۋعا (3 ەسە جوسپارلانعان - رەد.) وزگەرتۋ، قايتا وڭدەلگەن ءونىمنىڭ ۇلەسىن 50%-عا دەيىن جەتكىزۋ ۇسىنىلادى. سونداي-اق، 2021 جىلعى قۇرعاقشىلىق اۋىل شارۋاشىلىعى ءونىمىنىڭ شىعىمىن 2،4%-عا تومەندەتتى، بۇل ەكسپورتتىق پوزيسيالاردىڭ وسۋىنە دە كەرى اسەرىن تيگىزدى»، - دەلىنگەن قۇجاتتا.
بۇعان دەيىنگى جوسپارعا سايكەس، اگروونەركاسىپتىك كەشەن ونىمدەرىنىڭ ەكسپورتىن 2020 جىلمەن سالىستىرعاندا 2030 جىلعا دەيىن 3 ەسە ۇلعايتۋ كوزدەلگەن ەدى. 2030 جىلى ەكسپورت مولشەرى 9،9 ملرد دوللارعا جەتۋى ءتيىس بولاتىن. ال ەندى جاڭا وزگەرىسكە ساي، ونىڭ كولەمى الداعى 8 جىلدا 6،6 ملرد دوللار بولادى.
«اۋىل شارۋاشىلىعى سالاسىنداعى ينۆەستيسيالىق جوبالاردى قارجىلاندىرۋ جانە ەكسپورتقا باعدارلانعان قايتا وڭدەلگەن ءونىمنىڭ قوسىمشا ءوندىرىسىن قۇراتىن تەحنيكانى ساتىپ الۋ ءۇشىن 2022 جىلدان باستاپ «بايتەرەك» ۇبح» اق-نىڭ جارعىلىق كاپيتالىن 780 ملرد تەڭگەگە ۇلعايتۋ كوزدەلگەن. بۇل رەتتە بيۋدجەتتەن تەك 79 ملرد تەڭگە، ياعني 2023 جىلدان باستاپ تەحنيكا ساتىپ الۋعا جانە 2024 جىلدان باستاپ ينۆەستيسيالىق جوبالاردى كرەديتتەۋگە قولداۋ كورسەتىلدى. بۇل رەتتە بيزنەس پەن بانك سەكتورى ەكسپورتقا باعدارلانعان ينۆەستيسيالىق جوبالاردى قۇرۋعا وسىنداي قاراجات كولەمىن قارجىلاندىرۋعا دايىن ەمەس»، - دەپ كورسەتىلگەن قاۋلىدا.
قۇجاتتى اشىق تالقىلاۋ كەلەر جىلدىڭ 6 قاڭتارىنا دەيىن جالعاسادى.