قىتايدىڭ وڭتۇستىگىندەگى گۋاندۋن پروۆينسياسىنداعى گۋانچجوۋ قالاسىنىڭ تۇرعىندارى وسى ءىرى قالادا كوروناۆيرۋسقا شالدىعۋ وقيعالارىنىڭ كوبەيۋىنە بايلانىستى ازىق-تۇلىك قورىن جيناقتاۋعا تىرىسىپ جاتىر، دەپ حابارلايدى almaty-akshamy.kz قازاقپاراتقا سىلتەمە جاساپ.
قىتايلىق ب ا ق جازۋىنشا، جەرگىلىكتى شەنەۋنىكتەردىڭ مەگاپوليستە ازىق-تۇلىك قورى جەتكىلىكتى ەكەندىگى تۋرالى مالىمدەمەسىنە قاراماستان، گۋانچجوۋداعى كەيبىر بازارلار مەن ءبىرقاتار كوتەرمە ساۋدا دۇكەندەرىندە حالىقتىڭ ازىق-تۇلىكتى كوپتەپ الىپ جۇرگەنى بايقالعان.
گۋانچجوۋدىڭ حالقى تىعىز ورنالاسقان بايۋن اۋدانىندا عانا جارىم-جارتىلاي كارانتين ەنگىزىلگەن.
وندا كوۆيد شەكتەۋلەرى ايماقتاعى 3،7 ملن حالىقتىڭ 5 مىڭعا جۋىق تۇرعىنىنا قاتىستى بولدى.
وسى ارادا، قۇرلىقتىق جۇڭگو پروۆينسيالارىنىڭ كوپشىلىگىن جايلاعان COVID-19 ۆيرۋسىنىڭ كەيدە ءورشىپ تۇرۋى شامامەن 18 ملن حالقى بار گۋانچجوۋدى ازىق-تۇلىكپەن قامتاماسىز ەتۋگە كەرى اسەرىن تيگىزۋدە.
دۇيسەنبى كۇنى وتكەن بريفينگتە بەيجىڭ بيلىگى جۇرتشىلىقتى جۇڭگو استاناسىن ازىق-تۇلىكپەن قامتاماسىز ەتۋ جاعىنان قازىرگى جاعدايدىڭ تۇراقتى جانە ولار جەتكىلىكتى مولشەردە ەكەنىنە سەندىردى. وتكەن تاۋلىكتە بەيجىڭدە COVID-19 ينفەكسياسىن جۇقتىرۋدىڭ ءتورت وقيعاسى انىقتالدى. دۇيسەنبى كۇنى جۇڭگو ۇكىمەتى ايماق بيلىگىن جۇك تاسىمالىنىڭ كەدەرگىسىز قوزعالىسىن قامتاماسىز ەتۋگە جانە كولىك جولدارىن دالەلدى سەبەپسىز جاپپاۋعا ۇندەگەن حابارلاما تاراتقان.
رەسمي ستاتيستيكا بويىنشا، 10 ساۋىردە گۋانچجوۋدا كوروناۆيرۋس جۇقتىرۋدىڭ 27 جەرگىلىكتى وقيعاسى تىركەلدى.
ءوز كەزەگىندە، جۇڭگو ماتەريگىندە توعىزىنشى كۇن قاتارىنان اۋرۋعا شالدىعۋدىڭ ەڭ جوعارى رەسمي كورسەتكىشى تىركەلگەن شانحاي قالاسىندا وتكەن تاۋلىكتە COVID-19 ينفەكسياسىن جۇقتىرۋدىڭ 23 مىڭنان استام جەرگىلىكتى وقيعاسى تىركەلدى.