CentralMedia24kz جاڭالىق پورتالىنىڭ ءجۋرناليسى ءارى SMMء-بولىمىنىڭ جەتەكشىسى يليا رولدۋگين سپورتپەن ءسان مەن دەنساۋلىققا بولا اينالىسىپ جۇرمەگەنىن ايتادى. سپورت — تارتىپكە باۋلىپ، كۇيزەلىسكە توتەپ بەرۋگە كومەكتەسىپ، ادامنىڭ كوڭىلىن اۋلايدى. يليانىڭ ءوزى وسى جاسقا دەيىن تاي بوكسى مەن بياتلوننان باستاپ، ءبىراز سالانىڭ باسىن قايىرىپتى. الماتىلىقتاردى دا قىستا تاۋعا شىعىپ، شاڭعى تەبۋگە شاقىردى وسى جولى.
«بالا كەزىمنەن قوزعالىستى جاقسى كورەتىن اداممىن. سپورتتىڭ قاي تۇرىنە بولسىن قىزىقتىم»، — دەيدى يليا.
ءبىراز ۋاقىت بويى تاي بوكسىمەن اۋەستەنەدى. ول مىنەزىن ورنىقتىرىپ، جان-جاقتى ويلاۋدى ۇيرەتىپتى.
ۋاقىت وتە كەلە سىرتتاي تىنىش كورىنەتىن، ءبىراق ىشكى تالاپتارى كەم تۇسپەيتىن جاڭا نارسەنى بايقاپ كورگىسى كەلەدى.
«مىلتىق اتۋعا قىزىعاتىنمىن، جۇگىرگەن اسا ۇنامايتىن. ءسويتىپ ءبىر كۇنى شاڭعى تەۋىپ كورىپ، كۇتپەگەن جەردەن بياتلونعا جول اشتىم»، — دەپ ەسكە الادى يليا. بۇل سپورت ءتۇرى وعان توزىمدىلىك، زەيىن مەن ىشكى تەپە-تەڭدىكتى قالىپتاستىرۋعا كومەكتەسكەن.
شاڭعى مەن بياتلون يليانىڭ ومىرىنە ءبىراز وزگەرىس الىپ كەلەدى.
«شاڭعى - ىشكى تىنىشتىق، توزىمدىلىك سياقتى بۇرىن جەتىسپەگەن نارسەلەردى سىيلادى»، — دەيدى. 2012 جىلى يليا جارىستا ەكىنشى ورىن الىپ، ول ومىرىنە ۇلكەن بەتبۇرىس اكەلەدى. «بياتلون - كۇشتى ەسەپپەن جۇمساپ، سالقىنقاندى بولۋدى، اتقان كەزدە دە ءدال تيگىزىپ، اسىعىستىق جاساماۋدى ۇيرەتتى»،- دەپ ەسكە الدى.
بۇلار بىلايعى ومىردە دە كادەگە جارادى. 2017 جىلدىڭ مامىرىنان 2018 جىلدىڭ مامىرىنا دەيىن يليا شەكارا اسكەرىندە قىزمەت اتقاردى. اسكەردە ول ۇلتتىق قاۋىپسىزدىك كوميتەتى ءتوراعاسىنىڭ مەدالىمەن ماراپاتتالدى. ودان كەيىن دە سپورتتى تاستاماي، IPSC پراكتيكالىق اتىسى فورماتىنا اۋىسادى.
يليا ءقازىر سپورتتى ىشكى تىرەك دەپ قابىلدايدى.
«مەن ءۇشىن سپورت ءتاننىڭ كۇشتىلىگى عانا ەمەس. بۇل — ەنەرگيا، تازا وي مەن ىشكى ءتارتىپ. ول كۇندەلىكتى ءومىردىڭ ارتىق شۋىن ازايتىپ، ەڭ كەرەك نارسەگە عانا كوڭىل بولۋگە كومەكتەسىپ، ادامدى سابىرلى ءارى مىقتى ەتەدى»، — دەپ كورگىن-تۇيگەنىن ايتتى.
الماتىلىقتاردى دا شاڭعى تەبۋگە شاقىردى. «ۇيدە جاتا بەرگەنشە ءبىر رەت بايقاپ كورسەڭىز، ءومىر بويى قار كەشىپ، شاڭعىنىڭ تاياعىن قولىڭىزدان تاستاماي كەتۋىڭىز مۇمكىن. سپورت – ءومىرىڭىزدى باستان-اياق وزگەرتىپ، ءتانىڭدى دە، جانىڭدى دا شىنىقتىرادى»،- دەيدى ونى ءوز باسىنان وتكەرگەن يليا رولدۋگين.