شاڭعى جارىسى مەن بياتلوننان قازاقستان كومانداسى جاتتىعۋعا كىرىستى

ولاردىڭ جارىسى چجانسزياكوۋدا وتەدى.

شاڭعىمەن جارىسۋ جانە بياتلوننان قازاقستان كومانداسى قىتايداعى چجانسزياكوۋ كلاستەرىندە جاتتىعۋعا كىرىستى، دەپ حابارلايدى Almaty-akshamy.kz Olympic.kz cىلتەمە جاساپ. 

سپورتشىلار سوڭعى جاتتىعۋ جيىندارىن شەتەلدەردە وتكىزدى، سوندىقتان قىتايعا دەيىنگى ساپار بارىسىندا بارلىق قاۋىپسىزدىك شارالارىن ساقتالدى. بياتلونشىلار بەيجىڭگە ستامبۋلدان كەلدى. 

«بىزدە ءبارى جاقسى. ۇشۋ ۋاقىتى 20 ساعاتتان استى. ۇشىپ كەلگەن بويدا پتر تەست تاپسىرىپ، وليمپيادالىق اۋىلعا اتتاندىق. ءبىزدىڭ سپورت تۇرىنەن جارىس چجانسزياكوۋدا وتەدى، سوندىقتان مۇندا اۆتوبۋسپەن كەلدىك. جولعا شامامەن بەس ساعات كەتتى. قازىرگى تاڭدا ءبىز مۇندا جايعاسىپ ۇلگەردىك. ارينە، 20 گرادۋس سالقىن، قاتتى جەل دە بار. ءبىرىنشى جاتتىعۋىمىز بۇگىن باستالادى»، - دەيدى بياتلونشى ۆلاديسلاۆ كيرەيەۆ. 

وسى رەيسپەن بەيجىڭگە شاڭعىشىلار دا كەلدى. ولار دا تاۋلى ايماق چجانسزياكوۋدا سىنعا تۇسەدى. 

«بەيجىڭگە جەتكەنشە ۇزاق جولدى ارتقا تاستادىق. قىتايعا ميلاننان ستامبۋل ارقىلى جەتتىك. كەيىن وليمپيادالىق اۋىلعا ءتورت جارىم ساعات جول جۇردىك. جۇڭگو تاراپىنىڭ وتە جوعارى دەڭگەيدە دايىندالعانى كورىنىپ تۇر. تەك ءبارىنىڭ ارنايى كيىممەن جۇرگەنى كوزگە ەرەكشە كورىنەدى. وليمپيادالىق اۋىلعا كەلگەن بويدا ءبىزدى ورنالاستىرىپ، جايعاستىردى. ءبارى دە قولجەتىمدى. ستاديونعا دەيىن ءار 15 مينۋتتان اۆتوبۋستار ءجۇرىپ جاتىر. ايتپاقشى، جارىس جولى وتە قيىن. شاڭعىمەن جاتتىعۋ جاساپ ۇلگەردىك، تراسسامەن تانىستىق. كوماندا جوسپار بويىنشا دايىندالىپ جاتىر. تاعى دا اتاپ وتكىم كەلەدى، ۇيىمداستىرۋ وتە جوعارى دەڭگەيدە. قىتايلىقتاردىڭ قوناقجايلىعى دا بايقالىپ تۇر»،- دەيدى كوماندا باس باپكەرى الەكساندر باتيايكين.