اعىمداعى جىلدىڭ 21 مامىر كۇنى قازاقستان رەسپۋبليكاسى اقپارات جانە قوعامدىق دامۋ مينيسترلىگى جانىنداعى «ءدىن ماسەلەلەرى جونىندەگى رەسپۋبليكالىق ءاقپاراتتىق-تۇسىندىرۋ توبىنىڭ» مۇشەلەرى «Mobile X» سەرۆيستىك كومپانياسىنىڭ قىزمەتكەرلەرىمەن جانە جالعا الۋشىلارمەن كەزدەسۋ وتكىزدى. كەزدەسۋدىڭ ماقساتى – ەكسترەميزم مەن تەرروريزمنىڭ جانە تەرىس ءدىني اعىمدار ىقپالىنىڭ الدىن الۋ.
ەكسترەميزم مەن تەرروريزم ماسەلەسى نەمقۇرايدى قارايتىن جايت ەمەس. بۇل ماسەلەنى ءجىتى دە قىراعى باقىلاعان ابزال. جالعان ءدىننىڭ جەتەگىنە ەرىپ، سيريا، يراك سەكىلدى ەلدەرگە اداسىپ بارعان جەرلەستەرىمىزدىڭ اقپاراتىنان كوپشىلىك حاباردار. ەكسترەميزيم مەن تەرروريزمنىڭ تامىرى تەرەڭدە جاتىر. وسىنى جان-جاقتى زەرتتەپ، ءتۇرلى جاعدايلاردىڭ بولۋ ىقتيمالدىعىن ەسكەرە كەلە، مەملەكەت تاراپىنان ءقاۋىپتىڭ الدىن الۋ شارالارى، ساقتاندىرۋ، ءتۇسىندىرۋ، كەڭەس بەرۋ جۇمىستارى تولاسسىز ءجۇرىپ جاتىر. ناتيجە دە جوق ەمەس. رەسمي اقپاراتتارعا سۇيەنەر بولساق، كەيىنگى ءۇش جىلدا ءدىني اعىمداردىڭ ىقپالىمەن، ەكسترەميزم مەن تەرروريزم ءقاۋپىن توندىرۋگە بايلانىستى شەت ەل اسىپ، شەكارا باسىپ، باسقا ەلدەرگە ءوتىپ جاتقان اداسقاندار مەن اراندالعاندار تىركەلمەگەن ەكەن. ءبىراق بۇل تەرىس ءدىني اعىمداردىڭ، دەسترۋكتيۆتى توپتاردىڭ ءقاۋپى سەيىلدى دەگەن ءسوز ەمەس. كەرىسىنشە، پيعىلى جامان ءدىني اعىمدار الەمدى دۇرلىكتىرگەن پاندەميانى پايدالانىپ، ءوز ارەكەتتەرىن جۇزەگە اسىرىپ جاتقاندىعىن ارنايى ماماندار ايتىپ وتىر. بۇگىنگىدەي تەحنولوگيالار دامىعان ينتەرنەت زامانىندا ولار مۇمكىندىكتى قالت جىبەرمەيتىنى انىق. اسىرەسە، اركىمنىڭ قولىندا جۇرەتىن سمارتفوندار ارقىلى دا اراندالىپ قالعاندار از ەمەس.
قازاقستان رەسپۋبليكاسى اقپارات جانە قوعامدىق دامۋ مينيسترلىگى جانىنداعى ءدىن ماسەلەلەرى جونىندەگى رەسپۋبليكالىق ءاقپاراتتىق-تۇسىندىرۋ توبىنىڭ مۇشەسى ەرلان جۇمان ۇلى ماتايەۆ كەزدەسۋدە وسى باعىتتى قامتىدى: «قازىرگى كەزدە ءدىن ماسەلەسى ەلىمىزدە وتە كۇردەلى، اۋقىمدى تاقىرىپتىڭ ءبىرى بولىپ تۇر. ءدىن مەن ەكسترەميزم، تەرروريزم بايلانىستى بولعاننان كەيىن ۇلتتىق قاۋىپسىزدىك دەڭگەيىندە قارالۋدا. ەندى بۇل تاقىرىپتىڭ سىزدەرگە قانداي قاتىسى بار؟ سىزدەرگە نە ءۇشىن كەلىپ وتىرمىز؟ سىزدەر ساۋدا جاساۋ كەزىندە كوپ ازاماتتارمەن كەزدەسەسىزدەر. ونىڭ ۇستىنە ۇيالى تەلەفون ساتاتىنداردىڭ باسىم كوپشىلىگى ءدىن ۇستانۋشىلار بولىپ كەلەدى. سىزدەر وسى ازاماتتارمەن نەمەسە باسقا كىسىلەرمەن كەزدەسكەندە دىنگە بايلانىستى قانداي دا ءبىر سۇراق، تۇسىنگىلەرىڭىز كەلەتىن ءدىني جاعدايلار بولسا، كەز كەلگەن ادامنان ەمەس، ارنايى ماماندارعا جۇگىنىپ، كوكەيلەرىڭىزدەگى ساۋالعا ءدىني قىزمەتكەرلەردەن جاۋاپ العاندارىڭىز دۇرىس. سونىمەن قاتار بۇگىندە ءبارىمىز دەرلىك الەۋمەتتىك جەلىلەردە وتىرامىز، ينتەرنەتتەن اقپارات الامىز. سول اقپاراتتاردىڭ سەنىمدى دەرەككوزدەردەن ەكەندىگىنە اسا ءمان بەرگەندەرىڭىز ءجون. قازىرگى تاڭدا كوپتەگەن تەرىس ءدىني اعىمدار بار. ولار كىشكەنتاي عانا قۋىستا وتىرىپ-اق وزدەرىنىڭ ساياساتىن جۇرگىزىپ، قاتارىن تولىقتىرىپ جاتىر. سوندىقتان كەز كەلگەن اقپاراتقا سەنە بەرۋگە بولمايدى. ول اقاپارتتىڭ شىن نەمەسە وتىرىك ەكەنىن انىقتاپ الۋ قاجەت بولىپ تۇر. قاتەلەسۋ، اداسۋ، اراندالۋ وسىنداي اقپاراتتاردان بولىپ جاتقانى بۇگىندە دالەلدەنگەن. ياعني، كەز كەلگەن اقپاراتتى ارنايى ماماندار مەن ءدىني قىزمەتكەرلەرگە تەكسەرتىپ العان ابزال.
وزدەرىڭىز بىلەسىزدەر، پاندەميا بولعاننان كەيىن قۇلشىلىق، عيبادات ورىندارى جابىق. ءدىني ىزدەنىستەر ينتەرنەت ارقىلى جۇرۋدە. اركىم ءار جەردەن ىزدەيدى. ءسىز بولماساڭىز دا ءسىزدىڭ تۋىسىڭىز، اعايىنىڭىز، دوسىڭىز، تانىسىڭىز وسىنداي ماسەلەمەن كەزدەسۋى مۇمكىن. ءبىر قاراعاندا بۇل ايتىپ وتىرعانىمىز وتە قاراپايىم نارسە. ءبىز وسى سالادا ىستەگەننەن كەيىن كوپ جاعدايدا وسىنداي قاراپايىم نارسەلەرگە ءمان بەرمەي، كوپتەگەن قاتەلىككە ۇرىنعانداردى بىلەمىز. سول سەبەپتى دە ءبىز سىزدەرگە ەسكەرتىپ جاتىرمىز. نەمقۇرايلى قاراماڭىزدار. مىسالى ءۇشىن، سيريا كەتكەندەر، باسقا دا ەكسترەميستىك، تەرروريستىك پيعىلداعى اداسۋشىلارمەن جۇمىس جۇرگىزەمىز. سولاردان سۇراعانىمىزدا قاتەلىكتىڭ باسى وسىنداي قاراپايىم عانا نارسەلەردەن باستالعانىن ايتادى. بازاردا، ادام كوپ جۇرەتىن جەرلەردە كەزدەسىپ قالىپ، كەتىپ قالعان قاتەلىكتەردىڭ زاردابىن تارتىپ جۇرگەندەردى كوپتەپ مىسال ەتۋگە بولادى. قايتالاپ ايتامىن، بۇل ماسەلەگە بەيجاي قاراماڭىزدار».
كەزدەسۋ بارىسىندا وسى باعىتتاعى اڭگىمەلەر ايتىلىپ، جينالعان جۇرت كوكەيلەرىنە كوپ نارسە ءتۇيىپ كەتكەنىن ولاردىڭ سۇراقتارىنان، وي بىلدىرۋلەرىنەن بايقادىق.
ءيا، شىندىعىندا، حالىق اراسىندا نەمقۇرايدىلىق پەن بەيجايلىق بارىن دا كورىپ ءجۇرمىز. قاتەلىككە ۇرىنىپ، اراندالاتىندار تەك باسقالار، مەن ەمەس دەپ بۇرىس ويلايتىندار دا بار. بۇلاي ويلاۋ دۇرىس ەمەس. ءقاۋىپ پەن قاتەر اياقاستى... شالىس باسىپ، قاتەلىككە ۇرىنۋ كۇتپەگەن جەردەن بولادى. ەگەر ءبارى وڭاي بولسا، ءدىن ماسەلەسى مەملەكەتتىك دەڭگەيدە كوتەرىلمەس ەدى. سوندىقتان ساقتانايىق! ساق بولايىق!