ءدىننىڭ اتىن جامىلعان دەسترۋكتيۆتى توپتار تالايدىڭ ساناسىن ۋلاپ، مىڭنىڭ ميىن اينالدىردى. اداسۋشىلار اتويلاپ شەكارا استى. مەملەكەت شۇعىل ارەكەتكە كوشىپ، ەكسترەميزم مەن تەرروريزمنىڭ الدىن الۋ بويىنشا مينيسترلىك، اگەنتتىكتەر قۇرىلدى. «جۋسان» وپەراسياسى ۇيىمداستىرىلدى. اداسقانداردى ەلگە قايتاردى. دەسترۋكتيۆتى ءدىني توپتار مەن اعىمداردى، سەكتالاردى زەرتتەيتىن، اداسقاندارعا كەڭەس بەرۋ، ولاردى وڭالتۋ ورتالىقتارى اشىلدى.
«جاسىراتىنى جوق، ءدىني ەكسترەميزيم مەن تەرروريزمگە بايلانىستى ەلىمىزدە كوپتەگەن جاعدايلار بولدى. ءبىر قۋانارلىعى، ق ر ۇلتتىق قاۋىپسىزدىك كوميتەتىنىڭ مالىمدەۋىنشە، سوڭعى ءۇش جىلدىڭ كولەمىندە بىردەبىر قازاقستاندىق ازامات سيريا سياقتى ەلدەرگە اداسۋشىلىقپەن اتتانباپتى. كەرىسىنشە شەت ەل اسقان اداسۋشىلاردى «جۋسان» وپەراسياسى ارقىلى ەلىمىزگە اكەلدىك. مەن الماتى ىرگەسىندەگى «زارەچنىي»، «جاۋعاشتى» سياقتى قاتاڭ رەجىمدەگى تۇرمەلەردە ساباق بەرەمىن. سوڭعى 5 جىلدىڭ ىشىندە قانشاما اداسقان تاعدىرلاردى كوردىم»، – دەيدى قانات وتەبايەۆ.
وسى تۇستا قانات مىرزادان تاعدىرلاردىڭ اداسۋىنا سەبەپ بولعان جايتتى ناقتىلاي ءتۇسۋىن وتىندىك. «دەسترۋكتيۆتى توپتار ەڭ ءبىرىنشى مەملەكەت باسشىسىن، يمامداردى، سونداي-اق قازاقستانداعى ءبىلىم بەرۋ ورىندارىن جامانداپ، قۇرباندىعىنىڭ سولاردىڭ ايتقانىنا قۇلاق اسۋىنا توسقاۋىل قويىپ تاستايدى. بۇل جەردە دىننەن باسقا دا دۇنيەلەر تۇر. گيپنوز بولۋى دا مۇمكىن. سوسىن دۇنيەجۇزىلىك دەنساۋلىق ۇيىمى شري-لانكا دەگەن جەردەگى ءشوپتى قۇرتۋ ءۇشىن جىلىنا كوپ قاراجات قۇيادى. بۇل ءشوپ ادامنىڭ ەسىنەن اداستىرىپ، نە ىستەپ، نە قويعانىنا باقىلاۋ جاساي المايتىنداي دارەجەگە جەتكىزەدى ەكەن. سودان ءدارى جاساپ ىشكەن ادام 7-8 ساعاتقا دەيىن ەسىن بىلمەي قالادى دەيدى. تۇرمەدە وتىرعانداردىڭ اراسىندا سونداي ادامدار دا بار. ولاردىڭ قولىندا تەلەفون جوق. باياعىداي ءپىر تۇتاتىن شەيحسىماقتارى تاعى جوق. ءبىزدىڭ ساباققا قاتىسادى. ەكى-ۇش ساباقتان كەيىن ساناسى اشىلىپ، جىلاعانىن كورسەڭىز... كوزدەرىنەن سوراسى اعادى. تۇزەلىپ جاتىر، ءبىراق كەيبىرىنىڭ ارتىنداعى وتباسى تۇگەل ۋاحابيلىك باعىتپەن كەتىپ قالعان عوي
قانات وتەبايەۆ ولاردى قوعامعا قايتا قوسۋداعى جايتتى دا ايتىپ بەردى.
– ءاۋ باستا «جۋسان» وپەراسياسى باستالعاندا، بۇل ىسكە قارسى شىققانداردىڭ ءبىرى مەن ەدىم. «ەلگە اكەلۋدىڭ قاجەتى نە؟ ولاردىڭ ميىندا ۆيرۋس بار. اداسقانداردى قامايتىن جەكە تۇرمە جوق. بىرەۋ بولىپ كىرىپ، ءجۇز بولىپ كوبەيسە، قايتەمىز؟» دەگەن وي بولعانى راس. الايدا مەن قاتە ويلاعان ەكەنمىن. بەرىلگەن ساباقتان ناتيجە شىعىپ جاتىر. ولارعا بۇل ىستەرىنىڭ ەشقانداي دا جيھادقا جاتپايتىنىن، بارعان جەرىڭدە ولسەڭ، ارام ءولىم بولاتىنىن ايتامىز. ولاردى تەرىس اعىمدار ءوز مۇددەلەرىنە پايدالانعانىن جەتكىزەمىز. ءتىپتى، مۇنىڭ بيزنەس ەكەنىن دالەلدەيمىز. جانىنا تيەتىن قاراپايىم مىسال كەلتىرەمىز. وسىندايدا قازاعىمىزدىڭ: «ءوز بالاڭدى وزەگىنەن تەپسەڭ دە كەتپەيدى، وزگەنىڭ بالاسىن كىسەندەسەڭ دە تۇرمايدى» دەگەن ءسوزى ەسكە تۇسەدى. امال جوق، ەلىمىزدەن شىققان اداسۋشىلاردى قوعامعا قايتا قوسۋ، ولاردى تۇزەۋ - مىندەتىمىز، – دەپ تۇيىندەدى ءسوزىن قانات وتەبايەۆ.
جالپى، مۇنى «بالەن جەردە باقىر بار، بارساڭ، تاقىر دا جوق» دەپ تە قورىتىندىلاۋعا بولادى. ءدىني فاناتيزمگە شالدىققانداردىڭ باقىتقا جەتكەنى جونىندە بىردە-بىر دەرەك تابا المايسىز. سەبەبى، ءدىني فاناتيزم دۇرىس جول ەمەس. ول جولعا ءتۇسۋدىڭ ءارىسى – اجال، بەرىسى – اباقتى، ازاپ. سوندىقتان كىم-كىم دە تەرىس ءدىننىڭ جەتەگىنە ەرىپ، ءومىرىن وكسىككە اينالدىرماسا ەكەن دەگىمىز كەلەدى. ءار قادامدى ساناپ باسىپ، ءار ءسوزدى تالعاپ تىڭداعان دۇرىس. ساقتانايىق! ساق بولايىق!
«اقشام-اقپارات».