نورۆەگيالىق گروسسمەيستەر ماگنۋس كارلسەن كوشتىڭ باسىن ەشكىمگە بەرەر ەمەس
شاحماتتان وتاندىق قىزدار قۇراماسى ۇزدىكتەر توبىندا. بۇگىن تارتىستى باسەكەنىڭ ءۇشىنشى كۇنى ءوتىپ جاتىر، دەپ حابارلايدى Almaty-akshamy.kz Almaty.tv-گە سىلتەمە جاساپ.
بۇگىن - اسەم قالا الماتىنى دۇبىرگە بولەگەن سايىستىڭ ءۇشىنشى كۇنى. قازاقستان شاحماتتان بايراقتى باسەكە باستالعالى بەرى قىزدار قۇراماسىنان ۇلكەن ءۇمىت كۇتەدى. ويتكەنى، وندا ەلىمىزدىڭ بەتكە ۇستار جانسايا ابدىمالىك پەن دينارا ءسادۋاقاسوۆا سىندى ويىنشىلارى بار. ولار سايىستا ءساتتى ونەر كورسەتىپ كەلەدى. الاماندا ەكى قىز 8 ۇپايدىڭ التاۋىن قورجىنعا بايلادى. ازىرگە ولاردىڭ الدىن جارتى ۇپايمەن قىتايلىق تان چجۋني́، رەسەيلىك الەكساندرا گورياچكينا جانە ءۇندىستاندىق ساۆيتا شري وراپ تۇر. «قازاق ەلىنىڭ ابىرويىن ارقالاپ الەم چەمپيوناتىنا قوسىلعان جاس ويىنشىلاردان كۇتەر ءۇمىت كوپ»، - دەيدى قازاقستان شاحمات فەدەراسياسىنىڭ وكىلدەرى.
«تۋرنير اياقتالۋعا جاقىن قالدى. الەم چەمپيوناتى – پسيحولوگيالىق مايدان الاڭى. ءقازىر ويىنداعى جاعداي شيەلەنىسە ءتۇستى. شاحماتشىلار ۋايىمنان فيگۋرالاردى ءتۇسىرىپ العان ساتتەر كەزدەستى. بۇل ولاردىڭ ەموسيونالدى جاعدايىنىڭ كورىنىسى عوي. ال تورەشىلەرگە ونداي ساتتەردە قاتەلىكتەرگە بوي الدىرۋعا بولمايدى. سوندىقتان، بارلىعىن ءجىتى باقىلاۋدا ۇستاۋ قاجەت. جالپى، ءۇش كۇن ىشىندە زاڭ بۇزىلمادى»، – دەدى شاحماتتان حالىقارالىق تورەشى ارمان عابدۋشيەۆ.
ەرلەر اراسىنداعى الامان دا قىزىپ تۇر. نورۆەگيالىق گروسسمەيستەر ماگنۋس كارلسەن كوشتىڭ باسىن ەشكىمگە بەرەر ەمەس. ول التى ويىندى جەڭىسپەن اياقتاسا، ءۇش رەتتە تەڭ وينادى. ازىرگە ۆلاديمير فەدوسەيەۆ، راپيدتەن الەم چەمپيونى، وزبەكستاندىق نوديربەك ءابدىساتتاروۆ، گەرمانيالىق ۆينسەنت كەيمەردىڭ ەنشىسىندە 7 ۇپايدان بار. ودان كەيىنگى ساتىدا 6 جارىم ۇپايمەن 6 ويىنشى تۇر. دەمەك، ولار دا الەم چەمپيونى اتانۋعا ۇمىتكەر بولا الادى.
«قارسىلاسىم وتە مىقتى بولدى. وكىنىشكە قاراي، مەن جەڭىلىپ قالدىم. دەگەنمەن ىشتەي ەشتەڭەگە وكىنبەيمىن. ءوزىمدى شىڭدادىم، وزگەلەردىڭ ويىنىن كوردىم. بۇل - مەن ءۇشىن تاجىريبە. ال جەڭىسكە تالاسىپ جاتقاندارعا ساتتىلىك تىلەيمىن. ەڭ مىقتى ويىنشى جەڭىس تۇعىرىنان كورىنسىن دەپ تىلەيمىن»، – دەدى شاحماتتان الەم چەمپيوناتىنا قاتىسۋشى بەندجامەن حالدورسەن (نورۆەگيا)
ايتا كەتەيىك، جارىستىڭ جۇلدە قورى - 1 ميلليون اقش دوللارى. ال كىل مىقتىلاردىڭ ەسىمى 30 جەلتوقساندا ءمالىم بولادى. ءدال سول كۇنى چەمپيوناتتىڭ جابىلۋ ءراسىمى وتەدى دەپ جوسپارلانعان. الەمنىڭ ءار تۇكپىرىنەن كەلگەن شارشى تاقتانىڭ شەبەرلەرى جالپى سانى 4 مەدال جيىنتىعىنا تالاسادى. الماتىدا شاحماتتان الەم چەمپيوناتى قالا اكىمدىگىنىڭ قولداۋىمەن ءوتىپ جاتىر.