پاسپورتتاردىڭ ءارتۇرلى ساناتتارى بويىنشا 9 جاڭا ەلمەن ءوزارا كەلىسىمدەر جاسالدى
قازاقستان ۆيزاسىز ەلدەر ءتىزىمىن 80 مەملەكەتكە دەيىن كەڭەيتتى. بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«2022 جىلى ۆيزاسىز ەلدەردىڭ ءتىزىمى پاسپورتتاردىڭ ءارتۇرلى ساناتتارى بويىنشا 80 مەملەكەتكە دەيىن كەڭەيتىلدى. ونىڭ ىشىندە جالپى ازاماتتىق پاسپورتتار ءۇشىن - 26 مەملەكەت. پاسپورتتاردىڭ ءارتۇرلى ساناتتارى بويىنشا 9 جاڭا ەلمەن ءوزارا كەلىسىمدەر جاسالدى: مالديۆ ارالدارى، اندوررا، نيكاراگۋا، ۆەنەسۋەلا، بوليۆيا، پاراگۆاي، دومينيكانا، البانيا جانە بەليز»، - دەدى ول مينيسترلىكتىڭ وسى جىلعى جۇمىسىن قورىتىندىلاۋعا ارنالعان باسپا ءسوز ءماسليحاتىندا.
بۇدان بولەك، ونىڭ ايتۋىنشا، وسى جىلدىڭ 12 قازانىندا قاتارمەن ديپلوماتيالىق جانە ارنايى پاسپورتتاردىڭ يەلەرى ءۇشىن ۆيزالاردان ءوزارا بوساتۋ تۋرالى ۇكىمەتارالىق كەلىسىمگە وزگەرىستەر ەنگىزۋ تۋرالى حاتتاماعا قول قويىلدى. ول جالپى ازاماتتىق پاسپورتتاردىڭ يەلەرىن ۆيزالىق تالاپتاردان بوساتادى.
«قولايلى ينۆەستيسيالىق احۋالدى قۇرۋ، ىسكەرلىك بايلانىستاردى جانداندىرۋ جانە ەلدىڭ تۋريستىك الەۋەتىن ارتتىرۋ ءۇشىن ق ر ۇكىمەتى يران يسلام رەسپۋبليكاسىنىڭ، جۇڭگو حالىق رەسپۋبليكاسىنىڭ جانە ءۇندىستان رەسپۋبليكاسىنىڭ ازاماتتارى ءۇشىن ۆيزاسىز رەجيم ەنگىزدى. بۇل وسى ەلدەردىڭ ازاماتتارىنا قازاقستان اۋماعىندا 14 كۇنگە دەيىن بولۋعا مۇمكىندىك بەرەدى»، - دەدى ايبەك سمادياروۆ.
وسىعان دەيىن قازاقستاننىڭ «جاسىل» ينۆەستيسيالارداعى ءرولى ارتىپ كەلە جاتقانىن جازعان بولاتىنبىز.