تانىمال شاحماتشىلار الماتى وبلىسىندا باس قوستى.
مۇندا زياتكەرلىك ويىننىڭ كلاسسيكالىق تۇرىنەن حالىقارالىق تۋرنير باستالدى. ايتا كەتۋ كەرەك، بايراقتى باسەكە العاش رەت ۇيىمداستىرىلىپ تۇر. قاراساي اۋدانىندا ءوتىپ جاتقان جارىسقا اقش، ۋكراينا، نيدەرلاندى، ارمەنيا، رەسەي، قىرعىزستان، تاجىكستان جانە قازاقستاننان 200-دەن اسا سپورتشى قاتىسىپ جاتىر. ارالارىندا 12 بىردەي گروسسمەيستەر بار. بۇعان قوسا 20-دان اسا حالىقارالىق دارەجەدەگى سپورت شەبەرى دە باس جۇلدەگە تالاسادى. تۋرنيرگە شاقىرتۋ العانداردىڭ اراسىندا گيننەستىڭ رەكوردتار كىتابىنا ەنگەن اقش گروسسمەيستەرى تيمۋر گارەيەۆ، بۇكىلالەمدىك شاحمات وليمپياداسىنىڭ جەڭىمپازى ءارى ەۋروپا چەمپيونى الەكساندر مويسەەنكو سياقتى سپورتشىلار كەزدەسەدى. قازاقستاننىڭ اتىنان الەم چەمپيونى كسەنيا بالابايەۆا، ازيا ويىندارىنىڭ جەڭىمپازى مۇرتاس قاجعالييەۆ جانە الەمدىك دودانىڭ جۇلدەگەرى اڭسات الديارلار سىنعا ءتۇسىپ جاتىر. حالىقارالىق جارىس اينالمالى جانە شۆەيسار جۇيەسى بويىنشا وتەدى.
- 12 ادام گروسسمەيستەر اتاعىنا تالاسادى. سونىمەن قاتار ەكىنشى جارىسىمىز ءوتىپ جاتىر. ول «ۆ» ءتۋرنيرى دەپ اتالادى. ول جەردە كلاسسيكالىق ويىننان 30-عا جۋىق ويىنشى قاتىسىپ جاتىر. سونىمەن قاتار «س» ءتۋرنيرى بار. ول جەردە 200-دەن استام ويىنشىلار قاتىسىپ، بليس تۇرىنەن جەڭىمپازدى انىقتاپ جاتىر، - دەيدى قازاقستان شاحمات فەدەراسياسىنىڭ اتقارۋشى ديرەكتورى گۇلميرا داۋلەتوۆا.
- قازاقستاننىڭ شاحمات فەدەراسياسىنان وسى تۋرنيرگە شاقىرتۋ العانىما قۋانىشتىمىن. بليستەگى العاشقى ويىنىم وتە تارتىستى ءوتتى. ول كەزدەسۋدە مەن جەڭىسكە جەتتىم. ەندى كلاسسيكالىق شاحماتقا كىرىسىپ جاتىرمىز. بۇل – وتە قيىن فورماتتاعى ويىندار. ءوز باسىم حالىقارالىق تۋرنيرلەرگە ۇزدىكسىز قاتىسۋعا تىرىسامىن. قارسىلاستارىمنىڭ كوبى – جاقىندا ماسكەۋدە وتكەن تۋرنيردەن ورالعان قىز-جىگىتتەر. سوندىقتان بۇل – دەڭگەيى وتە جوعارى جارىس، - دەدى جارىسقا قاتىسۋشى تيمۋر گارەيەۆ.