جەر استىنا ءتۇسىپ كەتكەن ەكى قۇتقارۋشىنىڭ دەنەسى تابىلعان جوق
ادامدار مىنگەن اۆتوبۋس شىڭىراۋعا ءتۇسىپ كەتكەن مايقايىڭ كەنتىندە توتەنشە جاعداي جاريالاندى. بۇعان دەيىن وڭىرگە قاراستى شانحاي شاعىناۋدانىنىڭ ازاماتتارى «قۇتقارۋشىلاردىڭ تاعدىرىن قايتالايمىز با؟» دەپ قورقاتىن. ەل ۋايىمىن ەستىگەندەر ەندىگىدە وپىرىلىپ كەتكەن اۋماققا جاقىن ماڭداعى تۇرعىن ۇيلەردى تەكسەرۋدى باستايدى، دەپ حابارلايدى اlmaty-akshamy.kz Almaty.tv-گە سىلتەمە جاساپ.
ال، جەر قوينىنا جۇتىلىپ، دەنەسى ءالى تابىلماعان قوس قۇتقارۋشىنىڭ جاقىندارى شىرىل قاعىپ، تاعى دا كومبيناتقا كەلدى. قايعىدان قان جۇتقاندار ىزدەۋ جۇمىسىنىڭ توقتاپ قالعانىنا قاپالى. «اپات بولعالى ارادا 2 ايدان كوپ ۋاقىت وتسە دە، كومپانيا باسشىلىعى جۇباتۋ ءسوز، ءجوندى ارەكەتكە جارىمادى» دەگەن ولار ىزدەۋسىز قالعان قۇتقارۋشىلاردىڭ دەنەسىن الىپ، جەر قوينىنا تاپسىرۋعا اسىق.
«مايقايىڭ التىن» شاحتاسىنداعى اپات 4 قاڭتاردا بولعان. ەكى اي ىزدەۋ جۇمىستارى جۇرگىزىلگەنىمەن جەر استىنا ءتۇسىپ كەتكەن ەكى قۇتقارۋشىنىڭ دەنەسى سول كۇيى تابىلعان جوق. 36 جاستاعى ايدوس شايمەردەن مەن 55 جاستاعى جۇرگىزۋشى ايىپ تىلەۋبەرگەنوۆتىڭ تۋىستارى ىزدەۋ جۇمىستارىن قايتا جالعاستىرۋدى سۇراپ، زار جىلايدى.
– بار تىلەگىمىز – ادام سياقتى جەرلەپ، جەر قويناۋىنا تاپسىرۋ. ەرتەڭ مەن ونىڭ بالالارىن قاي جەرگە اپارامىن؟ «اكەم قاي جەردە جاتىر؟» دەپ سۇرايدى. توپىراقتىڭ استىندا قالدى دەيمىن بە؟ قاي توپىراقتىڭ استىندا قالعانىن دا بىلمەيمىز. بالالارىنا نە دەپ ايتامىن؟ سول ءۇشىن باۋىرىمنىڭ سۇيەگىن الىپ بەرۋدى تالاپ ەتەمىن، – دەدى ايدوس شايمەردەننىڭ تۋىسى ايتجان قايكينا.
اقپاندا كەن بايىتۋ كومبيناتى بىرەسە توقتاپ، كەيىن قايتا جۇمىسىن باستاعان. بۇعان سەبەپ، قورداعى التىن رۋداسىنىڭ تاۋسىلۋى بولدى. جەر استىنداعى توپىراقتىڭ وپىرىلۋ ءقاۋپى جوعارى بولعاندىقتان ارنايى كوميسسيا ىزدەۋ شارالارىن دا ۋاقىتشا توقتاتىپ ەدى. ءبىراق قارا جامىلعان ازاماتتار جۇمىستىڭ جالعاسپاۋىنا ءقاۋىپ ەمەس، قاراجات كەدەرگى بولۋى مۇمكىن دەپ سەكەمدەنىپ وتىر.
– 60 كۇننەن اسىپ كەتتى. ەشقانداي جۇمىسىنا ريزا ەمەسپىز، جارتى جولدا توقتاتىپ تاستادى. مۇنداي جۇمىس قاناعاتتاندىرمايدى. نە سەبەپتى؟ بىزگە قاعاز جۇزىندە كورسەتسىن، – دەدى ايىپ تىلەۋبەرگەنوۆتىڭ تۋىسى امانجول تىلەۋبەرگەنوۆ.
قۇتقارۋشىلاردىڭ تۋىستارى اپات بولعالى كومبينات الدىن كۇن سايىن كۇزەتەدى. قايعىدان قان جۇتقان ازاماتتارعا باسۋ ايتۋعا دا جاراماعان كومبينات باسشىلىعى ارەڭ جاۋاپ بەردى.
– اقشا بار، ءبىراق ول قارجى كاسىپورىندى ىسكە قوسۋ مەن ارى قارايعى جۇمىسقا ارنالعان. اپات ورنى ءالى دە ءقاۋىپتى ايماق دەپ سانالادى، سوندىقتان ول جەردە جۇمىس جۇرگىزە الماي وتىرمىز. باسقالاردىڭ ءومىرىن قاتەرگە تىگە المادىق، – دەدى «مايقايىڭالتىن» اق ديرەكتورى قۋانىش بوتين.
ايدوس شايمەردەن مەن ايىپ تىلەۋبەرگەنوۆتىڭ دەنەسىن ىزدەۋ جۇمىسى قاشان باستالاتىنى ازىرگە بەلگىسىز. توتەنشەلىكتەر مۇنداي جۇمىستار كوميسسيا شەشىمىنەن كەيىن عانا بەلگىلى بولاتىنىن ايتتى.
– زاڭ بار، ەكىنشىدەن، ءنورماتيۆتى قۇقىقتىق اكتىلەر بار. سودان كەيىن ەرەجە بار. مارقۇمداردىڭ وتباسىنىڭ مۇڭىنا دا الاڭداپ وتىرمىز. ادامگەرشىلىكتى ۇمىتپادىق. ءقاۋىپسىز دەسە، ىزدەۋدى جالعاستىرامىز، – دەدى وبلىستىق توتەنشە جاعدايلار دەپارتامەنتىنىڭ باستىعى جاسۇلان جۇماشيەۆ.
ءۇمىتى ۇزىلمەگەن قوس قۇتقارۋشىنىڭ تۋىستارى كومپانيا باسشىلىعىنىڭ شەشىمىن كۇتۋمەن كۇن وتكىزىپ جاتىر. ارداقتى ازاماتتارىنىڭ دەنەسىن الىپ، اتا داستۇرمەن جەر قوينىنا تاپسىرۋ – ولاردىڭ اۋەلگى ارمانىنا اينالعان.