جاڭا مەكتەپتەر سالۋ جانە كوللەدجدەردى جوندەۋ
200 ادامعا ارنالعان ينتەرناتى بار اباي اتىنداعى 900 ورىندىق جاڭا مەكتەپتى 2023 جىلعا ارنالعان بيۋدجەتتى ناقتىلاۋ جانە ءبىلىم بەرۋ سالاسىن قارجىلاندىرۋدى ۇلعايتۋ اياسىندا دارىن-1 شاعىن اۋدانىنا سالۋ جوسپارلانۋدا، دەپ حابارلادى قارجى باسقارماسىنىڭ باسشىسى قانات سۋحامبەكوۆ ءماسليحاتتىڭ كەزەكتەن تىس XI سەسسياسىندا. جاڭا وقۋ ورنىنىڭ ەرەكشەلىگى قازاق ءتىلىن تەرەڭدەتىپ وقىتۋىندا بولماق، دەپ حابارلايدى Almaty-akshamy.kz.
الەۋمەتتىك ينفراقۇرىلىمدى دامىتۋ جونىندەگى جوبالاردى قالانىڭ ءتۇرلى اۋداندارىندا جۇزەگە اسىرۋ جوسپارلانعان. ماسەلەن، 8 مەملەكەتتىك كوللەدجدە اعىمداعى جوندەۋ بويىنشا جۇمىستار جۇرگىزىلەدى، ال 2 قولدانىستاعى كوللەدجدە – قۇرىلىس جانە حالىق كاسىپشىلىگى، سونداي-اق تەحنولوگيالار مەن فلوريستيكا كوللەدجى ماتەريالدىق-تەحنيكالىق جاعىنان جاڭارتادى. بۇل ماقساتقا 1،3 ملرد تەڭگە بولىنەدى.
وقۋشىلار ءۇشىن قولايلى جاعداي جاساۋ بويىنشا جۇمىستار جۇرگىزىلۋدە: نۇركەنت شاعىن اۋدانىنداعى №201 مەكتەپتە 450 ورىندىق قوسىمشا قۇرىلىس سالۋ جوسپارلانۋدا، بوستاندىق اۋدانىنداعى وربيتا شاعىن اۋدانىندا №145 مەكتەپ عيماراتىن سەيسميكالىق كۇشەيتۋ جانە كۇردەلى جوندەۋ جۇمىستارى اياقتالىپ كەلەدى، باسقا دا ءرۋحاني-بىلىم بەرۋ نىساندارىن جابدىقتاۋعا قاراجات ءبولىنىپ وتىر.
«دامۋ باعدارلاماسى ماقساتىنىڭ ءبىرىن ىسكە اسىرۋ اياسىندا ءبىلىم بەرۋ نىساندارىنا قولجەتىمدىلىكتى ارتتىرۋ ءۇشىن ساحنا تەتىكتەرىن، ۇلكەن كونسەرت زالىنا ارنالعان دىبىستىق جانە جارىق جابدىقتارىن تولىق اۋىستىرۋ جانە وقۋشىلار سارايىنىڭ بالالار مۋزىكا مەكتەبى ءۇشىن مۋزىكالىق جابدىقتار مەن وقۋ جيھازدارىن ساتىپ الۋ بويىنشا جۇمىستاردى جۇرگىزۋگە 1،3 ملرد تەڭگە سوماسىندا قاراجات كوزدەلگەن»، - دەدى قانات سۋحامبەكوۆ.
بۇعان قوسا، 3 مەملەكەتتىك مەكتەپتە «الماتى قالاسى وقۋشىلارىنىڭ دەنساۋلىعىن باسقارۋ» پيلوتتىق جوباسىن ەنگىزۋ جوسپارلانىپ وتىر. ول وقۋشىلاردىڭ دەنساۋلىعىن ساقتاۋعا جانە نىعايتۋعا باعىتتالعان جانە تەڭدەستىرىلگەن ءمازىر قۇرۋعا ارنالعان. بۇل ماقساتتارعا 1،3 ملرد تەڭگە كولەمىندە قاراجات كوزدەلگەن. جالپى، الەۋمەتتىك سالا بيۋدجەتىنىڭ شىعىس بولىگى 6،1 ملرد تەڭگەگە ۇلعايدى.