كوممۋنالدىق تاريفتەردىڭ وسۋىنە بايلانىستى الەۋمەتتىك وسال ازاماتتارعا قوسىمشا قولداۋ كورسەتۋ ءۇشىن وتەماقى مولشەرى 2023 جىلعى 1 قاراشادان باستاپ – 0،5 اەك-تەن (1725 تەڭگە) 0،6 اەك-كە (2070 تەڭگە) دەيىن ارتاتىن بولادى.
مۇنداي شەشىم الماتى قالاسى ءماسليحاتىنىڭ كەزەكتەن تىس XI سەسسياسىندا قابىلداندى، دەپ حابارلايدى Almaty-akshamy.kz.
وسى جىلدىڭ 1 قاراشاسىنان باستاپ ەلەكتر ەنەرگياسىنىڭ ءتاريفى كوتەرىلگەن سوڭ تۇزەتۋ قاجەت بولدى: زاڭدى تۇلعالار ءۇشىن – 1،2% – عا، جەكە تۇلعالار ءۇشىن-1 كۆت / ساع ءۇشىن 7% - عا.
بۇعان دەيىن ءحاوت ساناتىنداعى الماتىلىقتار ءۇشىن 0،5 اەك وتەماقىنى ءماسليحات اعىمداعى جىلدىڭ تامىز ايىندا بەكىتتى، ويتكەنى شىلدە ايىندا كوممۋنالدىق قىزمەتتەرگە تاريفتەر كوتەرىلدى.
تاريفتەردىڭ ءوسۋىن وتەۋ ءۇشىن الەۋمەتتىك كومەك ازاماتتاردىڭ ءوتىنىشى بويىنشا تولەنەدى. الماتى اكىمىنىڭ ورىنباسارى اسقار ءامرين درەم ەسەپتەۋلەرى بويىنشا ءتاريفتىڭ ءوسۋى جەكە تۇلعالار ءۇشىن كورسەتىلەتىن قىزمەتتەردىڭ قۇنىن ورتا ەسەپپەن 315،6 تەڭگەگە ارتتىراتىنىن ءتۇسىندىردى. وتەماقى مولشەرىن قايتا قاراۋ تۇرعىن ۇيگە الەۋمەتتىك كومەكتى 345 تەڭگەگە ارتتىرۋعا مۇمكىندىك بەرەدى. دەپۋتاتتار اكىمدىكتىڭ ۇسىنىسىن قولدادى. الەۋمەتتىك كومەك كورسەتۋ مەرزىمى 2024 جىلعى 30 ماۋسىمعا دەيىن ۇزارتىلادى. بۇل رەتتە، ەگەر كورسەتىلەتىن قىزمەتتى الۋشى 2023 جىلعى 31 جەلتوقسانداعى جاعداي بويىنشا الەۋمەتتىك كومەك الۋشى بولىپ تابىلعان جاعدايدا، وعان ءوتىنىشسىز الەۋمەتتىك كومەك تاعايىندالادى، ال 2023 جىلعى 31 جەلتوقساننان كەيىن جۇگىنگەن ادامدارعا الەۋمەتتىك كومەك ءوتىنىش بەرىلگەن ايدان باستاپ تاعايىندالادى جانە تولەنەدى.
ايتا كەتەرلىگى، تاريفتەردى كوتەرۋ قالانىڭ كوممۋنالدىق جەلىلەرىنىڭ توزۋىن ازايتۋ جانە اپاتتار مەن كوممۋنالدىق قىزمەتتەردى كورسەتۋدەگى ۇزىلىستەر تاۋەكەلدەرىن ازايتۋ ءۇشىن "ينۆەستيسيالارعا ايىرباستاۋ ءتاريفى" باعدارلاماسىن ىسكە اسىرۋ اياسىندا جۇرگىزىلۋدە.