دامۋىنداعى باسىمدىق پوليسەنترلىك مودەلگە بەرىلەدى – الماتى اكىمىالماتى قالاسىنىڭ اكىمى دارحان ساتىبالدى شاھاردىڭ الەۋمەتتىك ينفراقۇرىلىمىن جاڭعىرتۋ جانە تۇرعىنداردىڭ ءومىر ءسۇرۋ ساپاسىن جاقسارتۋ بويىنشا اۋقىمدى جۇمىستار قولعا الىنعانىن اتاپ ءوتتى. ول قالا كۇنىنە وراي الماتىلىقتاردى مەرەكەسىمەن قۇتتىقتاپ، شاھار دامۋىنىڭ جاڭا كەزەڭىندەگى ماڭىزدى جوبالاردى تانىستىردى.
قالا اكىمى اتاپ وتكەندەي، شاھار دامۋىنداعى باسىمدىق - پوليسەنترلىك مودەلگە بەرىلەتىن بولادى. بۇل مودەل الماتىنىڭ ءار اۋدانىندا زاماناۋي ورتالىقتار قۇرۋدى كوزدەيدى، ولاردا تۇرعىندارعا قولايلى جۇمىس ورىندارى، مەكتەپتەر، ەمحانالار، ساياباقتار مەن دەمالىس ايماقتارى قولجەتىمدى بولادى.
«نەگىزگى ماقسات – قالانىڭ ورتالىعىن جۇكتەمەدەن بوساتۋ جانە ءار اۋداندا تۇرعىنداردىڭ ءومىر سۇرۋىنە قولايلى ورتالىقتار قالىپتاستىرۋ. وندا تۇرعىندار ءۇشىن جاقىن جەردە جۇمىس ورىندارى، مەكتەپتەر، ەمحانالار، ساياباقتار مەن دەمالىس ورىندارى قولجەتىمدى بولۋى ءتيىس»، - دەدى قالا باسشىسى.
دارحان ساتىبالدى جاڭا ينفراقۇرىلىم سالۋ مەن جاڭعىرتۋ بويىنشا جۇيەلى جۇمىستار جۇرگىزىلىپ جاتقانىن ايتتى. ءقازىردىڭ وزىندە «شىعىس» جانە «باتىس قاقپالارىن» دامىتۋ بەلسەندى جۇرگىزىلۋدە.
سونداي-اق، الماتى اكىمى دارحان ساتىبالدى قالانى ساپالى سىرتقى جارىقتاندىرۋمەن قامتۋ جىل سوڭىنا دەيىن 100%-عا جەتەتىنىن مالىمدەدى. ونىڭ ايتۋىنشا، الداعى جىلدارى 40-قا جۋىق ساياباق پەن سكۆەر سالۋ جانە جاڭعىرتۋ جوسپارلانعان. ءارى قالانىڭ ءىرى كوشەلەرىندە «قاسبەتتەن قاسبەتكە دەيىن» قاعيداتى بويىنشا كەشەندى اباتتاندىرۋ جۇمىستارى جۇرگىزىلەتىن بولادى.
بيىل الماتىدا 400-دەن استام اۋلا اباتتاندىرىلىپ، 360 مىڭنان استام جاسىل جەلەك پەن 10 مىڭداعان اعاش وتىرعىزىلعان. وعان قوسا بۇرىن جارىقتاندىرىلماعان 1200-دەن استام ۋچاسكە ساپالى جارىقپەن قامتىلعان.
«كەلەر جىلدارى شاھارىمىز ايتارلىقتاي تۇرلەنىپ، الماتىلىقتار بۇل وڭ وزگەرىستەردى انىق بايقايتىن بولادى»،- دەدى الماتى قالاسىنىڭ اكىمى دارحان ساتىبالدى.