شاعىناۋداننىڭ شاعىمدارى تىڭدالدى

تۇركسىب اۋدانىنىڭ اكىمى باقىتجان اقجاروۆ «نۇرشاشقان» شاعىناۋدانىنىڭ تۇرعىندارىمەن كەزدەستى.

اۋدان تۇرعىندارى ەلەكترمەن قامتۋ، جارىقتاندىرۋ، جول قۇرىلىسى، قوعامدىق كولىك سىندى وزەكتى ماسەلەلەردىڭ شەشىمىن سۇرادى.

تۇركسىب اۋدانى اكىمدىگىنىڭ باسپا ءسوز قىزمەتى حابارلاعانداي، قازىرگى تاڭدا ەلەكتر قۋاتىن تۇراقتاندىرۋ ماقساتىندا «تۇزدىباستاۋ» قوسالقى ستانساسىنىڭ قۇرىلىسى جۇرگىزىلىپ جاتىر. سونىمەن قاتار، ەلەكتر جەلىلەرىن قايتا جاڭعىرتۋ، 465 جاڭا تىرەك، 8 ترانسفورماتورلىق جانە 1 تاراتۋشى قوسالقى ستانسيالاردى ورناتۋ جۇمىستارى جۇرگىزىلۋدە. بۇگىنگى كۇنى جوباعا سايكەس جالپى جۇمىستىڭ 10 پايىزى ورىندالعان. قۇرىلىس-مونتاجداۋ جۇمىستارى جىلىتۋ ماۋسىمىنا بايلانىستى توقتاتىلعان.

اۋدان اكىمى اتالعان جوبانى جۇزەگە اسىرۋ شاعىن اۋداندى ەلەكترمەن قامتۋ ساپاسىن ارتتىرۋعا مۇمكىندىك بەرەتىنىن جانە وسى جىلى ەلەكترمەن جابدىقتاۋ جوبالارى بويىنشا جۇمىستاردى اياقتاۋ جوسپارلانعانىن ايتتى. سونىمەن قاتار، ول قازىرگى تاڭدا شاعىناۋدان 97 پايىزعا جارىقتاندىرىلعانىن جانە قالعان ءۇش كوشەنى جارىقتاندىرۋ جۇمىستارى ءساۋىر ايىنىڭ سوڭىنا دەيىن اياقتالاتىنىن حابارلادى.

كەزدەسۋ بارىسىندا اپاتتىق جاعدايلاردىڭ سالدارىمەن كۇرەسى ءۇشىن قانداي جۇمىس اتقارىلىپ جاتقانى دا ايتىلدى. اۋدان باسشىسىنىڭ حابارلاۋىنشا، الماتى قالاسى ەنەرگەتيكا جانە سۋمەن جابدىقتاۋ باسقارماسىنىڭ مەردىگەرلىك ۇيىمى «نۇراي ستروي» سۋ جەلىلەرىندە انىقتالعان اپاتتىق-قالپىنا كەلتىرۋ جۇمىستارىن جۇرگىزۋدە. توتەنشە جاعداي اياسىندا تبيليسسكايا كوشەسىندەگى كارىز كوللەكتورىن قالپىنا كەلتىرۋ جۇمىستارى باستالىپ، اياقتالۋ مەرزىمى 2023 جىلدىڭ مامىر ايىنا جوسپارلانعان. اتالعان جۇمىس «نۇرشاشقان» شاعىناۋدانىن ساپالى سۋمەن قامتاماسىز ەتۋگە مۇمكىندىك بەرەدى.

ايتا كەتكەن ءجون، ينجەنەرلىك جەلىلەردى تارتۋ جوباسىندا 13 ابونەنت (مەيىرىم كوشەسى) قامتىلماعان. سوندىقتان اۋدان اكىمدىگى ەنەرگەتيكا جانە سۋمەن جابدىقتاۋ باسقارماسىنا قامتىلماي قالعان اۋماقتاردى جوبالاۋعا ءوتىنىم بەردى.

سونداي-اق، تۇركسىب اۋدانىنىڭ اكىمدىگى بەردىقوجا كوشەسىندە جول قۇرىلىسىن جۇرگىزۋ ءۇشىن جەر قاتىناستارى باسقارماسىنا جەردى ساتىپ الۋ بويىنشا سۇرانىس جىبەرگەن.

ايتا كەتەرلىگى، شاعىناۋداندا جاقۇت كوشەسى بويىندا ساياباق پەن بالالار الاڭىن اباتتاندىرۋ ماسەلەسى قاراستىرىلۋدا. جوبانى ىسكە اسىرۋ ءۇشىن «بيۋدجەتكە قاتىسۋ» باعدارلاماسى اياسىندا اۋدان اكىمدىگى الماتى قالاسىنىڭ جەر قاتىناستارى باسقارماسىنا جەر تەلىمدەرىن ساتىپ الۋعا تاعى ءبىر سۇرانىس جىبەرگەن.

اۋدان اكىمىنىڭ حالىقپەن كەزدەسۋى بارىسىندا وتكەن جىلدىڭ جەلتوقسان ايىندا قۇرىلىسى باستالعان 100 كەلۋشىگە ارنالعان دارىگەرلىك امبۋلاتوريانىڭ 2023 جىلدىڭ ماۋسىم ايىندا قولدانىسقا بەرىلەتىنى جوسپارلانىپ وتىرعانى ايتىلدى.