بۇل تۋرالى بۇگىن ۇكىمەت وتىرىسىندا توتەنشە جاعدايلار ءمينيسترى يۋريي يلين ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ءمينيستردىڭ ايتۋىنشا، سۋ باسۋ ءقاۋپى باسىم وڭىرلەردى قورعاۋعا ەرەكشە نازار اۋدارىلادى.
«بارلىعى بىلەتىندەي، بۇل تابيعي پروسەسس قايتىمسىز جانە ۇنەمى الدىن الۋ شارالارىن قاجەت ەتەدى. قارداعى سۋ قورىنىڭ مولشەرىن، توپىراقتىڭ كۇزگى ىلعالدىلىعىن، ونىڭ قاتۋ تەرەڭدىگىن تالداي وتىرىپ، سونداي-اق قار استىندا مۇز قابىعىنىڭ بولۋىن ەسكەرىپ، سۋ تاسقىنى ءقاۋپى بار ايماقتار تاۋەكەل دارەجەسىنە قاراي بولىنەدى. تاۋەكەلدەرى جوعارى وڭىرلەرگە اقمولا، اقتوبە، الماتى، اتىراۋ، شىعىس قازاقستان، جامبىل، باتىس قازاقستان، قاراعاندى، قوستاناي، سولتۇستىك قازاقستان، تۇركىستان وبلىستارى جانە اباي، جەتىسۋ وبلىستارى جاتادى»، - دەدى مينيستر.
ونىڭ دەرەگىنشە، ورتاشا تاۋەكەلدەرگە پاۆلودار جانە ۇلىتاۋ وبلىستارى كىرەدى.
«بۇگىنگى تاڭدا سۋ باسۋ ءقاۋپى ايماعىندا 255 ەلدى مەكەن بار. ولاردا 127 مىڭنان استام ءۇي جانە 700 مىڭنان استام ازامات قالىپ وتىر. وتكەن جىلعى سۋ تاسقىنىنىڭ ءوتۋىن تالداۋ قورىتىندىسى سۋ باسۋدىڭ نەگىزگى سەبەپتەرى وزەن ارنالارىنىڭ تولىپ كەتۋى مەن بالدىرلانۋى، درەناجدىق-ارىق جۇيەلەرىنىڭ بولماۋى، سۋ قورعاۋ بەلدەۋلەرىندە ۇيلەر سالۋ ەكەنىن كورسەتتى»، - دەدى ول.