5-6 ناۋرىز كۇندەرى سەۋل فيلارمونيالىق وركەسترى الماتىدا كونسەرت بەرەدى.
مۋزىكانتتار رەسپۋبليكالىق مەملەكەتتىك اكادەميالىق كورەي تەاترىندا ونەر كورسەتەدى. قايىرىمدىلىق كونسەرتى كورەيا رەسپۋبليكاسىنىڭ تاۋەلسىزدىگىنىڭ 80 جىلدىعىنا جانە ابايدىڭ 180 جىلدىعىنا وراي ۇيىمداستىرىلعان، دەپ حابارلايدى aqshamnews.kz. 24.kz-كە سىلتەمە جاساپ.
كەش بارىسىندا الەمگە ايگىلى ۆيۆالدي، چايكوۆسكيي، گەندەل جانە موسارتتىڭ كلاسسيكالىق شىعارمالارى ورىندالادى. سونداي-اق، كورەي مۋزىكانتتارى قازاقستاندىق كومپوزيتور ەركەش شاكەيەۆتىڭ تۋىندىلارىن ورىندايدى. سونىمەن قاتار، وركەستر كورەي تەاترىنىڭ ءسوليسى انگەلينا يۋگايعا سۇيەمەلدەۋ جاسايدى. ول ماناربەك ەرجانوۆتىڭ «قۋانامىن» ءانىن شىرقايدى. سەۋل فيلارمونيالىق وركەسترى 1945 جىلى قۇرىلعان. ونىڭ مۋزىكانتتارى الەمنىڭ تۇكپىر-تۇكپىرىندە ونەر كورسەتىپ ءجۇر، ال قازاقستاندا العاش رەت كونسەرت بەرمەك.
چون چە ۆال، سەۋل فيلارمونيالىق وركەسترىنىڭ باس ديرەكتورى:
- بۇل – مەنىڭ قازاقستانعا ەكىنشى ساپارىم بولماق. الماتىدا وسىدان ءبىر جارىم جىل بۇرىن بولعام. قالا مەنى قاتتى تاڭعالدىردى. وتە ادەمى قالا، ارحيتەكتۋراسى جانە جايلى اتموسفەراسى ەرەكشە اسەر قالدىردى. الماتى – الىپ ب ا ق ىسپەتتى، مۇندا جىلۋلىق پەن جايلىلىق سەزىلەدى. ءبىز كونسەرتتى الماتىلىقتار كلاسسيكالىق مۋزىكانىڭ اسەمدىگىن سەزىنىپ، تاماشالاۋى ءۇشىن ارنايى دايىندادىق. رەپەرتۋار كورەرمەندەردىڭ تالعامىنا ساي تاڭدالدى، سوندىقتان الماتىلىقتاردىڭ سۇيىكتى شىعارمالارىن ورىندايمىز.