كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا 77، 76، 71 جاستاعى ءۇش پاسيەنتكە سوڭعى بۋىنعى قولقا كلاپانى يمپلانتاسيالاندى. قولقا ستەنوزى – ەگدە جاستاعى ادامداردا ءجيى كەزدەسەتىن جۇرەك اقاۋى، وتە ءقاۋىپتى دەرت، سەبەبى كەنەتتەن ولىمگە اكەلۋى مۇمكىن، دەپ حابارلايدى aqshamnews.kz
71 جاستاعى ناۋقاس ايەل ۇزاق ۋاقىت بويى – 7 جىلدان بەرى گەمودياليزدە ءجۇر. ول قولقا قاقپاقشاسىنىڭ ستەنوزى، ميترالدى قاقپاقشانىڭ جەتكىلىكسىزدىگى، جۇرەكتىڭ يشەميالىق اۋرۋى، اسقىنۋلاردىڭ دامۋ ءقاۋپى وتە جوعارى ارتەريالىق گيپەرتەنزيانىڭ 3-ساتىسى، سوزىلمالى جۇرەك جەتكىلىكسىزدىگىنە شالدىققان جانە 2024 جىلدىڭ جەلتوقسانىندا ينفاركتقا ۇشىراعان. وعان بيىلعى قاڭتاردا ستەنت قويىلدى، ءبىراق دەنساۋلىعى جاقسارمادى، ەنتىگۋى باسىلمادى. ونىڭ جاعدايىن جەڭىلدەتۋ ءۇشىن دارىگەرلەر تاۋەكەلگە بارىپ، وعان وتا جاساۋ قاجەت دەپ شەشتى. وپەراسيا ءساتتى ءوتتى.
سوڭعى بۋىنعى قولقا كلاپانىن كلينيكانىڭ ينتەرۆەنسيالىق كارديولوگتارى سانكت-پەتەربۋرگ قالاسى ۆ.المازوۆ اتىنداعى ۇمزو رەنتگەنحيرۋرگيالىق دياگنوستيكا مەن ەمدەۋدىڭ ادىستەرى بولىمشەسىنىڭ مەڭگەرۋشىسى دميتريي زۋباريەۆپەن بىرگە يمپلانتاسيالادى.
«بۇل وتا قولقا ستەنوزى بار ناۋقاستاردى ەمدەۋدەگى ماڭىزدى قادام بولدى جانە ولاردىڭ ءومىر ءسۇرۋ ساپاسىن جاقسارتۋعا جاڭا مۇمكىندىكتەر اشتى. سوڭعى بۋىنعى قولقا كلاپانىن يمپلانتاسيالاۋ - ماڭىزدى جەتىستىكتەرىمىزدىڭ ءبىرى. دەنساۋلىعى مەن ءومىرىن بىزگە سەنىپ تاپسىرعان پاسيەنتتەرگە جاقسى كۇتىم مەن ەمدەۋدى قامتاماسىز ەتۋ ءۇشىن كارديولوگياعا يننوۆاسيالىق تەحنولوگيالاردى ۇزدىكسىز ەنگىزۋدەمىز»، – دەيدى باسقارما ءتوراعاسى مارات پاشيموۆ.
زاماناۋي ترانسكاتەتەرلى قولقا كلاپانى قولقا ستەنوزىن ەمدەۋگە ارنالعان. ول ورنالاسۋ دالدىگىمەن ەرەكشەلەنەدى، بۇل كورونارلىق ارتەريالارعا كەدەرگىسىز قول جەتكىزۋگە مۇمكىندىك بەرەدى.