وتكەن اپتانىڭ جەكسەنبىسىندە ۇقك شەكارا قىزمەتىنىڭ الماتى وبلىسى بويىنشا دەپارتامەنتىنە قاراستى رايىمبەك اۋدانى شەكارا باسقارماسىندا وتكەن سالتاناتتى ءراسىم «كۇز-2024» شاقىرىلىمى ساربازدارىنىڭ اتا-انالارىمەن سۇحباتتاسۋدان باستالدى.
قاتارداعى جاۋىنگەر نۇرجان سۋروۆتىڭ اتا-اناسى يسقار اعامىز بەن ەلميرا اپاي بۇگىنگى شاراعا ارنايى قاتىسۋ ءۇشىن جامبىل وبلىسى، قورداي اۋدانىنىڭ قىزىلساي اۋىلىنان كەلىپتى. ولار بىزبەن جىلى امانداسىپ، سۇحبات بەرۋگە ىقىلاس تانىتتى. سۋروۆتاردان بىلگەنىمىزدەي، ۇلدارى نۇرجان اسكەري قىزمەتكە ءوز ەركىمەن سۇرانىپتى.
— اتا-انانىڭ كوڭىلى بالادا عوي... ۇلىمىزدى كورىپ، ماۋقىمىزدى باسۋ ءۇشىن ساعىنىپ جەتتىك. كوزىمىزدىڭ قاراشىعى بۇگىن انت قابىلدايىن دەپ جاتىر. بۇل دا ۇلىمىزدىڭ ەر-ازامات اتانعانىنىڭ بەلگىسى. ءبىز ءۇشىن وسى قۋانىشىن كورۋدەن اسقان باقىت بار ما؟ – دەدى تولقىعان يسقار سۋروۆ.
وسى كەزدە ولاردىڭ تۋ سىرتىندا، الاڭ بويىندا ساپ تۇزەگەن 500-گە جۋىق جاس ساربازدىڭ ءبىرى، قاتارداعى جاۋىنگەر ن.سۋروۆ تا تولقىپ تۇر ەدى.
سالتاناتتى ءراسىمدى اشقان دەپارتامەنت باستىعى پولكوۆنيك الىبەك كايۋپوۆتىڭ بۇيرىعىمەن الاڭعا جاۋىنگەرلىك تۋ جەتكىزىلگەننەن كەيىن «كۇز-2024» شاقىرىلىمىنىڭ ساربازدارى انت قابىلداي باستادى. ساربازداردىڭ «مەن، قاتارداعى جاۋىنگەر ...» دەپ باستالاتىن داۋىستارىنان ولاردىڭ شەكارانى قورعاۋعا، تۋعان ەلىنىڭ تىنىشتىعى ءۇشىن بارلىق قيىندىقتارعا دايىن ەكەندىكتەرى سەزىلىپ تۇردى.
سالتاناتتى ءراسىمنىڭ نەگىزگى ءبولىمى باستالىپ، دەپارتامەنت باستىعى پولكوۆنيك ءا.كايۋپوۆ پەن ۇيعىر اۋدانىنىڭ اكىمى ب.ەلەۋسىزوۆا ءسوز سويلەپ، ساربازداردى انت قابىلداۋلارىمەن قۇتتىقتادى. ساربازدار اتىنان سويلەگەن قاتارداعى جاۋىنگەر دياس تىلەكتەس تە سەنىمدى اقتاپ، ەل شەبىن كۇزەتۋگە ۋادە بەردى.
ءراسىم بارىسىندا دەپارتامەنت باستىعى پولكوۆنيك ءا.كايۋپوۆ «سروچنيك 2.0» باعدارلاماسىنىڭ گرانتىن جەڭىپ العان «كۇز-2023» شاقىرىلىمىنىڭ ساربازدارى راسۋل ارتىقجانوۆ پەن ەدىل تىلەۋبەككە سەرتيفيكاتتار تابىستاپ، وتان الدىنداعى قىزمەتتەرى ءۇشىن العىس ءبىلدىردى.
شارا شەكارا باسقارماسىنىڭ ارناۋلى ماقساتتاعى ۇتقىر ءىس-قيمىلدار توبىنىڭ كورىنىس كورسەتۋىمەن جالعاستى. شەكاراشىلار شەكارا بۇزۋشىلاردى ۇستاۋ ادىس-تاسىلدەرىن كورسەتىپ، جاۋىنگەرلىك دايارلىقتارىنىڭ جوعارى دەڭگەيدە ەكەنىن دالەلدەدى.
«مەن قازاقپىن» ءانى. اۋەلدە قارۋلى كۇشتەردىڭ اسكەري شەرۋىندە ورىندالعان بۇل ءان بۇگىنگى كۇنى شەكاراشى ساربازداردىڭ ءانۇرانىنا اينالعانداي. ءاندى 500 ساربازبەن بىرگە الاڭ شەتىنە جينالعان حالىق تا ورىندادى. ءاننىڭ قۇدىرەتى دەگەن وسى شىعار، بالكىم.
سالتاناتتى راسىمنەن كەيىن اتا-انالار ۇلدارىمەن قاۋىشىپ، ماز-مەيرام بولعان.
ءيا، حالقىڭا، ونىڭ زاڭدى سايلانعان پرەزيدەنتىنە، وزىڭە سەرت بەرۋ – تامىرى تەرەڭدە جاتقان جاۋىنگەرلىك ءداستۇر. وسىناۋ ايرىقشا ءساتتى باستان وتكەرگەن ساربازدار سەنىمگە سەلكەۋ تۇسىرمەيتىنىنە سەنىم مول.