وڭتۇستىكتە ۇزدىك سەرجانتتار انىقتالدى
ۇلتتىق ۇلاننىڭ 5574 اسكەري ءبولىمىنىڭ جاۋىنگەرلىك جانە ادىستەمەلىك دايىندىق ورتالىعىندا «وڭتۇستىك» وڭىرلىك قولباسشىلىعىنا قاراستى اسكەري بولىمدەردىڭ سەرجانتتارى اراسىندا «ۇزدىك ۆزۆود سەرجانتى – جاۋىنگەرلىك دايىندىق بويىنشا نۇسقاۋشى» جانە «ۇزدىك بولىمشە كومانديرى» بايقاۋ سايىسىنىڭ ءىى كەزەڭى ءوتتى، دەپ حابارلايدى اlmaty-akshamy.kz.
سايىسقا الماتى، جامبىل، قىزىلوردا، جەتىسۋ وبلىستارى مەن الماتى جانە شىمكەنت قالالارىنان كەلگەن 18 سەرجانت قاتىستى. بايقاۋدىڭ نەگىزگى مىندەتتەرى مەن ماقساتتارى كىشى كومانديرلەردىڭ اسكەري-كاسىبي شەبەرلىكتەرىن جەتىلدىرۋ، وزىق ۇلگىدەگى تاجىريبەنى، جۇمىس جاساۋ ءستيلى مەن ادىس-تاسىلدەردى زەردەلەۋ، بىرىكتىرۋ جانە تاراتۋ بولىپ تابىلادى. ودان باسقا، كونكۋرس بارىسىندا اسكەري-كاسىبي تۇرعىدا اناعۇرلىم دايىندالعان سەرجانتتار مەن بولىمشە كومانديرلەرى ايقىندالادى.
جارىس بارىسىندا ءوز بولىمدەرىندە ۇزدىك دەپ تانىلعان قاتىسۋشىلار كاسىبي سەرجانت جانە كىشى كومانديرلەرگە ءتان بارلىق قابىلەتتەرىن كورسەتتى: ونىڭ ىشىندە دەنە شىنىقتىرۋداعى توزىمدىلىك، وق اتۋداعى دالدىك، حيميالىق قورعانۋ قۇرالدارىن قولدانۋ، مەملەكەتتىك-قۇقىقتىق دايارلىق، ساپتىق دايىندىقتىڭ ۇزدىك داعدىلارى جانە باسشىلىق قۇجاتتاردى ءبىلۋ باعىتىندا تەكسەرىلدى.
سەرجانتتار كورپۋسى – كاسىبي ارميانىڭ نەگىزى. اسكەري دايىندىق، بولىمشەلەردەگى اسكەري ءتارتىپتىڭ جاعدايى جانە جەكە قۇرامنىڭ مورالدىق-جاۋىنگەرلىك رۋحى كوبىنەسە سەرجانتتاردىڭ كاسىبي شەبەرلىگىنە بايلانىستى. وسىنداي سايىستى وتكىزۋ سەرجانتتار قۇرامىنىڭ كاسىبي شەبەرلىگىن ارتتىرۋعا ىقپال ەتىپ، بۇل ۇردىستەگى جارىس رۋحىن نىعايتادى. اسكەري بولىمدەردەگى كىشى كومانديرلەردىڭ دايارلىق دەڭگەيىن باعالاۋعا مۇمكىندىك بەرەدى، - دەيدى «وڭتۇستىك» وڭىرلىك قولباسشىلىعى قولباسشىسىنىڭ ورىنباسارى پولكوۆنيك كونستانتين كۋاتوۆ.
بايقاۋ سايىسىنىڭ جالپى ناتيجەسى بويىنشا، تاراز قالاسىنداعى 5513 اسكەري ءبولىمىنىڭ اعا سەرجانتى مەيرامبەك قىدىرمۇحامەتوۆ وڭىرلىك قولباسشىلىقتىڭ ۇزدىك ۆزۆود سەرجانتى اتاعىنا يە بولدى. ال ۇزدىك بولىمشە كومانديرى اتاعى شىمكەنت قالاسىنداعى 6506 اسكەري ءبولىمىنىڭ اعا سەرجانتى توقتار قاسىمحانعا بۇيىردى.
جەڭىمپازدار مەن جۇلدەگەرلەر «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور تالاپكەر امىرەيەۆتىڭ اتىنان ارنايى ديپلوم، كۋبوكتار جانە باعالى سىيلىقتارمەن ماراپاتتالدى.
