جولاۋشىلارعا قولايلى جاعداي جاساۋ ءۇشىن ەلىمىزدەگى بارلىق پويىزدا اقپاراتتىق جۇيەلەرگە قول جەتكىزۋگە مۇمكىندىك بەرەتىن جاڭا قىزمەت ءتۇرى ەنگىزىلدى.
وسىلايشا، ۆاگوندارداعى Wi-Fi ارقىلى كەڭ جولاقتى ينتەرنەتپەن قامتىلمايتىن ايماقتا جولاۋشى جەكە ەلەكتروندى قۇرىلعىسىن، ۇيالى تەلەفونى نەمەسە پلانشەتىن قولدانا وتىرىپ، كوركەم، دەرەكتى فيلمدەر جانە مۋلتيپليكاسيالىق تۋىندىلاردى كورە الادى ءارى مۋزىكالىق شىعارمالاردى تىڭداي الادى. اتالعان قىزمەت ءتۇرى جولاۋشىلار ءۇشىن تەگىن، دەپ حابارلايدى Almaty-akshamy.kz.
كولىك مينيسترلىگىنىڭ مالىمەتىنشە، ول ءۇشىن جولاۋشى ءوز قۇرىلعىسىندا Wi-Fi قوسىپ، سودان كەيىن تىزىمنەن KTZ جەلىسىن تاڭداۋى كەرەك. ءارى قاراي براۋزەردى اشىپ، http://vputi.kz سايتىنا ءوتۋ قاجەت.
سونىمەن قاتار «جولاۋشىلار تاسىمالى» اق تاراپىنان «ترانسفەرمەن جول ءجۇرۋ»، «پەرروننان ۇيگە دەيىن»، «ارنايى اۆتوبۋس»، «تۇراقتى شاتتل»، «بۋراباي بويىنشا ترانسفەر» سياقتى سەرۆيستىك (ينتەرمودالدىق) قىزمەت تۇرلەرى كورسەتىلەدى.
«ترانسفەرمەن جول ءجۇرۋ»
«پويىز+پويىز» - ىڭعايلى ساياحات جانە جولاۋشىنىڭ ۋاقىتىن ۇنەمدەۋ ءۇشىن جۇيە ساپارعا شىققان ادامنىڭ پويىزدان پويىزعا اۋىسۋى ءۇشىن قولايلى نۇسقالاردىڭ ءبىرىن تاڭدايدى. ونلاين-سەرۆيس bilet.railways.kz سايتىندا ىسكە قوسىلعان جانە بيلەت كاسسالارىندا قولجەتىمدى. بۇگىنگى تاڭدا 7500-دەن استام بيلەت وسى قىزمەت ءتۇرىن پايدالانا وتىرىپ رەسىمدەلگەن.
«پەرروننان ۇيگە دەيىن»
«پويىز+اۆتوبۋس» - جولاۋشىلاردى «نۇرلى جول» ۆوكزالىنان ۇيگە تاسىمالداۋ قىزمەتى. قازىرگى ۋاقىتتا قىزمەتتى «الماتى-استانا» جانە «شىمكەنت-استانا» باعىتىندا قاتىنايتىن پويىز جولاۋشىلارى پايدالانا الادى. كەيىن اتالعان قىزمەت تۇرىمەن قامتۋ ايماعى كەڭەيتىلەتىن بولادى.
«ارنايى اۆتوبۋس»
«پويىز+اۆتوبۋس» - پويىزدان اۆتوبۋسقا اۋىسىپ، استانادان سولتۇستىك ايماقتىڭ ەلدى مەكەندەرىنە ساپارعا شىققان جولاۋشىلاردى تاسىمالداۋعا ارنالعان سەرۆيس.
«تۇراقتى شاتتل»
«پويىز+اۆتوبۋس+ۇشاق» - «نۇرلى جول ۆوكزالى-اەروپورت-قوسشى اۋەجايى» باعىتى بويىنشا جولاۋشىلاردى شاعىن اۆتوبۋستارمەن كۇندەلىكتى تاسىمالداۋ سەرۆيسى. جوبا جولاۋشىلار اعىنى جوعارى كەزەڭدەردە تەمىرجول مەن اۆياسيا كولىك بايلانىسىن قامتاماسىز ەتەدى. قىزمەت قۇنى 950 تەڭگەنى قۇرايدى.
تۇراقتى شاتتل كۇندەلىكتى جونەلتىلىپ تۇرادى:
ساعات 08.30-دا ۆوكزالدان اۋەجايعا جانە قوسشى قالاسىنا؛
ساعات 09.10-دا اۋەجايدان قوسشى قالاسىنا؛
ساعات 16.30-دا قوسشى قالاسىنان اۋەجاي مەن ۆوكزالعا دەيىن؛
ساعات 17.10-دا اۋەجايدان ۆوكزالعا دەيىن.
جولاۋشىلارعا ىڭعايلى بولۋ ءۇشىن اتالعان شاتتل ۆوكزال الدىنداعى الاڭدا، اۋەجايداعى اۆتوتۇراقتا جانە قوسشى قالاسىنداعى «ايگەرىم» ساۋدا ءۇيىنىڭ ماڭايىندا كۇتەدى.
«بۋراباي بويىنشا ترانسفەر»
«ەلەكتروپوەزد + ەلەكترواۆتو» - قىزمەت بۋراباي كۋرورتتىق ايماقتارى بويىنشا №7507/7508 استانا-كوكشەتاۋ، №6830/6829 ەرەيمەنتاۋ-كوكشەتاۋ ەلەكتر پويىزدارىمەن قاتىنايتىن جولاۋشىلاردى تاسىمالداۋدى كوزدەيدى.