قازاقستاننىڭ بارلىق وڭىرىنەن كەلگەن 350 ءوندىرۋشى ءوز ءونىمىن استاناداعى «Ulttyq ónim» VIII وتاندىق وندىرۋشىلەر كورمەسىندە ۇسىندى.
EXPO حالىقارالىق كورمە ورتالىعىندا باستالعان سەگىزىنشى جىلسايىنعى كورمەدە قازاقستاندىق وندىرۋشىلەر تاماق، جەڭىل، حيميا ونەركاسىبى، ماشينا جاساۋ، جابدىقتار، زەرگەرلىك بۇيىم مەن باسقا دا مىڭداعان تاۋار ءتۇرىن ۇسىندى. ەكسپوزيسياعا قاتىسقان بارلىق كاسىپورىنعا ەلىمىزدەگى شاعىن جانە ورتا بيزنەسكە قولداۋ جاسايتىن نەگىزگى قارجى ينستيتۋتى «دامۋ» قورى قارجىلاي جانە باسقا دا كومەك كورسەتتى.
«Ulttyq ónim سەگىزىنشى كورمەسى – وتاندىق كاسىپكەرلىكتى دامىتۋدىڭ ەڭ جاقسى دالەلى مەن كورىنىسى. وندىرۋشىلەر ەلىمىزدىڭ ىشكى نارىعىنداعى ۇستانىمىن نىعايتىپ، ەكسپورتقا شىعۋدا. شەتەلدە تانىمال برەندكە اينالىپ جاتىر. ال شاعىن جانە ورتا بيزنەستى مەملەكەتتىڭ قولداۋى تەك كۇشەيە بەرمەك. بيىل ەكونوميكانىڭ ناقتى سەكتورىن جەدەل دامىتۋعا بەت بۇردىق. مەملەكەت اقپاراتتىق تەحنولوگيا، لوگيستيكا، تۋريزمگە، تاماق ءونىمىن، قۇرىلىس ماتەريالىن وندىرۋگە، ماشينا جاساۋ، جەڭىل جانە حيميا ونەركاسىبى سياقتى باسىم سالالارداعى شوب ينۆەستيسيالىق جوبالارىنا اشىق تاپسىرىس جاريالادى. بۇل باعىتتا جان-جاقتى قولداۋ كورسەتىلەدى»، — دەپ اتاپ ءوتتى كورمەنىڭ اشىلۋىندا پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين.
كورمەدە اس ءۇي پليتالارى، جەلدەتكىش، مەديسينالىق جابدىقتار، ترانسفورماتورلار، قۇراما جەم، چەموداندار، توقىما بۇيىمدارى، قۇرىلىس ماتەريالدارى، انتيسەپتيكتەر، كيىم، اياق كيىم جانە باسقا دا سۇرانىسقا يە تاۋارلار ۇسىنىلعان. قاتىسۋشىلاردىڭ ءبىرى زارارسىزداندىرۋ جانە جۋۋ قۇرالىن ءوندىرۋشى «اۆرورا» وندىرىستىك كەشەنى» ج ش س نارىقتا 15 جىلدان بەرى جۇمىس ىستەپ كەلەدى. مۇندا كوسمەتيكالىق ءونىمنىڭ 40، تۇرمىستىق حيميانىڭ 55، زارارسىزداندىرۋ قۇرالىنىڭ 80-نەن استام ءتۇرى بار.
«ءبىز ءونىم وندىرۋدە تيىمدىلىككە، قاۋىپسىزدىك پەن تاۋاردىڭ تىم قىمبات بولماۋىنا باسا نازار اۋدارامىز. بىزدەن ىدىس جۋۋعا ارنالعان سابىن، سۇيىق سابىن، اينەك جۋۋعا، اس ۇيگە، كىر جۋۋعا ارنالعان تۇرمىستىق حيميانى ساتىپ الۋعا كەڭەس بەرەمىز. ءبىز جەلىنى ۇنەمى جاڭارتىپ وتىرامىز. جاڭا ونىمدەردىڭ اراسىندا ءۇي مەن كەڭسەگە ارنالعان حوش ءيىستى ديففۋزورلار بار. Booboo برەندىمەن بالالارعا ارنالعان ونىمدەردىڭ سان الۋان ءتۇرىن شىعارۋدامىز. ونىمدەرىمىز قازاقستانداعى ساۋدا جەلىلەرىندە، ماركەتپلەيستەردە جانە تاياۋ شەت ەلدەردە كەڭىنەن ۇسىنىلعان»، — دەدى «اۆرورا» وندىرىستىك كەشەنى» ج ش س وڭىرلىك ديرەكتورى ەرمەك ەركىنوۆ.
2024 جىلى «بايتەرەك» حولدينگىنىڭ سۋبسيديالاۋ جانە كەپىلدىك بەرۋ قۇرالدارى ارقىلى ۇكىمەت بيزنەستى قولداۋ باعدارلامالارىن ىسكە اسىرۋعا 336 ملرد تەڭگە ءبولدى. 2،7 مىڭ جوباعا 254 ملرد تەڭگە جەڭىلدەتىلگەن نەسيە بەرىلسە، جالپى 29،5 مىڭ جوبا 1،7 ترلن تەڭگەگە مەملەكەتتىڭ قولداۋىنا يە بولدى. بۇل شارالار 9،7 مىڭ جۇمىس ورنىن اشۋعا، 25،4 ترلن تەڭگەنىڭ ءونىمىن شىعارۋعا، 1،7 ترلن تەڭگە سالىق تۇسىمىنە مۇمكىندىك بەردى. ناتيجەسىندە 2024 جىلى شوب سەكتورىندا جۇمىسپەن قامتىلعاندار ۇلەسى حالىقتىڭ 48%-نا تيەسىلى بولسا، جىو-گە قوسىلعان ۇلەس شامامەن 40%-دى قۇرايدى.