16 مامىردا ەلدىڭ بارلىق وڭىرلەرىندە رەسپۋبليكالىق رەپرودۋكتيۆتىك دەنساۋلىق اپتالىعى شەڭبەرىندە حالىقتىڭ ادام پاپيللوماسى ۆيرۋسى، ونىڭ سالدارى جانە پروفيلاكتيكانىڭ مۇمكىندىكتەرى تۋرالى اقپاراتتىلىعىن ارتتىرۋعا باعىتتالعان ءىس-شارالار وتكىزىلۋدە، دەپ حابارلايدى aqshamnews.kz
قازاقستان رەسپۋبليكاسى دەنساۋلىق ساقتاۋ مينيسترلىگىنىڭ مالىمەتىنشە، 2025 جىلعى مامىر ايىنداعى جاعداي بويىنشا 11–13 جاس ارالىعىنداعى 138 469 قىز بالا اپۆ-عا قارسى ۆاكسينانىڭ العاشقى دوزاسىن، ال 44 956 قىز بالا ەكىنشى دوزاسىن العان.
جاتىر موينى وبىرى (جمو) ايەلدەردىڭ اراسىندا كەڭ تارالعان ونكولوگيالىق اۋرۋلاردىڭ ءبىرى بولىپ قالىپ وتىر. جىل سايىن الەمدە وسى دياگنوزدان شامامەن 300 مىڭ ايەل كوز جۇمادى. قازاقستاندا جىل سايىن جمو-نىڭ شامامەن 2 مىڭ جاڭا جاعدايى تىركەلەدى.
جاتىر موينى وبىرىنىڭ دامۋىنىڭ نەگىزگى سەبەبى — جوعارى ونكوگەندىك ءقاۋىپتى ادام پاپيللوماسى ۆيرۋسىنىڭ 16 جانە 18-تيپتەرى. سوندىقتان ۋاقىتىلى پروفيلاكتيكا، اسىرەسە ۆاكسيناسيالاۋ، اسا ماڭىزدى.
ۆاكسينا تۇراقتى يممۋنيتەت قالىپتاستىرىپ، بولاشاقتا اۋرۋدىڭ دامۋىنىڭ الدىن الۋعا مۇمكىندىك بەرەدى.
اپۆ-عا قارسى ۇلتتىق ۆاكسيناسيالاۋ باعدارلاماسى 2024 جىلعى 1 قىركۇيەكتە باستالىپ، جوسپارلى تۇردە جۇرگىزىلۋدە. باعدارلاما 11–13 جاس ارالىعىنداعى قىزداردى قامتيدى جانە حالىقارالىق ستاندارتتار مەن ۇسىنىمداردىڭ نەگىزىندە ىسكە اسىرىلۋدا.
قازاقستان ونكولوگيالىق اۋرۋلاردى تومەندەتۋ جانە ايەلدەر دەنساۋلىعىن ساقتاۋ ماقساتىندا بۇل پراكتيكانى ەنگىزگەن 135 ەلدىڭ ءبىرى بولدى.