استانا قالاسىندا 2026 جىلدان باستاپ ەنگىزىلەتىن جاڭا سالىق كودەكسىن تۇسىندىرۋگە ارنالعان رەسپۋبليكالىق سەمينارلار سەرياسى اياقتالدى.
قورىتىندى ءىس-شاراعا پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين، قارجى ءمينيسترى ءمادي تاكييەۆ، مەملەكەتتىك كىرىستەر كوميتەتى جانە «اتامەكەن» كاسىپكەرلەر پالاتاسىنىڭ وكىلدەرى قاتىستى، - دەپ حابارلايدى Aqshamnews.kz.
ۆيسە-پرەمەر بيزنەس ءۇشىن ماڭىزدى سانالاتىن ارنايى سالىق رەجيمدەرىن قولدانۋ ماسەلەسىنە ەرەكشە توقتالدى.
«ەڭ باستىسى – بۇعان دەيىن وڭايلاتىلعان سالىق رەجيمىندە جۇمىس ىستەگەن كاسىپكەرلەر سول رەجيمدە جۇمىسىن جالعاستىرا بەرەدى»، – دەدى سەرىك جۇمانعارين.
سونىمەن قاتار، وڭدەۋ ونەركاسىبى سالاسىنا ارنالعان ارنايى ەرەجەلەر دە ەنگىزىلمەك. ۆيسە-پرەمەردىڭ ايتۋىنشا، تۇپكى تۇتىنۋشىمەن تىكەلەي جۇمىس ىستەيتىن كاسىپورىندار وڭايلاتىلعان سالىق رەجيمىن قولدانا الادى.
«وڭدەۋ ونەركاسىبىنىڭ كەيبىر كاسىپورىندارىنا رۇقسات بەرەمىز. ولار، نەگىزىنەن، وفسەتتە نەمەسە ءىرى كاسىپورىنداردىڭ جەتكىزۋشىسى بولىپ سانالمايتىن B2C سەكتورىنا باعىتتالعان بولۋى ءتيىس»، – دەپ ناقتىلادى سەرىك جۇمانعارين.
باسقا سەكتورلار ءۇشىن جالپىعا بىردەي بەلگىلەنگەن سالىق سالۋ ءتارتىبى قاراستىرىلعان. مۇنىڭ سەبەبى – قولدانىستاعى سالىقتىق ىنتالاندىرۋ شارالارىنىڭ بار بولۋى: وندىرىستىك ماقساتتاعى يمپورت تاۋارلارىنا ققس ەسەپتەلۋى، جاڭعىرتۋ جۇمىستارى كەزىندە سالىق جەڭىلدىكتەرى جانە سالانى مەملەكەتتىك قارجىلىق قولداۋدىڭ اۋقىمدى شارالارى.
«ءبىز دامۋ ينستيتۋتتارى بويىنشا ۇلكەن باعدارلاما جۇزەگە اسىرىپ جاتىرمىز. بيىل "بايتەرەك" حولدينگىنە 1 تريلليون تەڭگەگە جۋىق قاراجات ءبولىندى، ءارى الداعى ءۇش جىلدىق بيۋدجەتتە جىل سايىن 1 تريلليون تەڭگەدەن قارجى قاراستىرىلعان. وڭدەۋ ونەركاسىبىنە جاسالىپ وتىرعان قولداۋ شارالارى قوماقتى قارجىنى تالاپ ەتەدى، سول سەبەپتى بۇل سالا قولداۋدان تىس قالمايدى»، – دەپ قورىتىندىلادى سەرىك جۇمانعارين.