الماتىدا «سەرگەك» كامەرالارى ارقىلى بورىشكەرلەردى انىقتاۋ رەيدتەرى جۇرۋدە
رەيدتى الماتى قالاسى بويىنشا مەملەكەتتىك كىرىستەر دەپارتامەنتى جەكە سوت ورىنداۋشىلار پالاتاسى، ادىلەت دەپارتامەنتى جانە جول پوليسياسى قىزمەتكەرلەرىمەن بىرلەسىپ جۇرگىزۋدە، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇگىن وتكەن رەيدتە «سەرگەك» كامەراسىمەن 534 مىڭ تەڭگەگە بەرەشەگى بار NISSAN PATROL ماركالى اۆتوكولىك تىركەلدى. بۇل اۆتوكولىك تابىلىپ، ايىپپۇل تۇراعىنا قويىلدى. قالالىق مەملەكەتتىك كىرىستەر دەپارتامەنتىنىڭ مالىمەتىنشە، رەيدتەر اعىمداعى جىلدىڭ سوڭىنا دەيىن جالعاسادى.
بۇگىندە الماتى قالاسى بويىنشا جەكە تۇلعالاردىڭ كولىك قۇرالدارىنا سالىناتىن سالىق بەرەشەگىنىڭ جالپى سوماسى – 3،6 ملرد. تەڭگە. بورىشكەرلەر سانى - 40 541. ولاردىڭ بەرەشەگىن ءوندىرىپ الۋ تۋرالى بۇيرىقتار شىعارىلدى جانە ءماجبۇرلى تۇردە ءوندىرىپ الۋ ءۇشىن اتقارۋشىلىق ءىس جۇرگىزۋ ورگاندارىنا (ادىلەت دەپارتامەنتى جانە جەكە سوت ورىنداۋشىلارىنىڭ پالاتاسىنا) بەرىلدى.
ايتۋ كەرەك، بورىشكەرلەر الەۋمەتتىك تولەمدەر نەمەسە جاردەماقىلار، ءبىلىم بەرۋ دەپوزيتتەرىن الۋ ءۇشىن قاجەتتى شوتتاردان باسقا شوتتار اشا المايدى. سونداي-اق، سالىق مىندەتتەمەلەرىن وتەمەگەن جاعدايدا زاڭنامادا بەلگىلەنگەن مەرزىمدە ءوسىمپۇل ەسەپتەلەدى. سالىقتاردى E-Salyq Azamat ءموبيلدى قوسىمشاسى، Egov پورتالى ارقىلى، قازپوشتا بولىمشەلەرىندە، سونداي-اق، ەكىنشى دەڭگەيدەگى بانكتەردىڭ ءموبيلدى قوسىمشاسى ارقىلى تولەۋگە بولادى.
الماتى قالاسى بويىنشا مەملەكەتتىك كىرىستەر دەپارتامەنتى قالا تۇرعىندارىن ۋاقىتىلى سالىق تولەۋگە شاقىرادى.