مۇنداي نورما «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا بەلگىلەنگەن. قۇجاتتى ق ر مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆ تانىستىردى.
«ساياسي لاۋازىمدى تۇلعانى سەنىمسىزدىككە بايلانىستى قىزمەتىنەن بوساتۋعا قاتىستى تولىقتىرۋلار قاراستىرىلعان. زاڭعا سايكەس، ساياسي لاۋازىمدى تۇلعا - ساياسي مىندەتتەردىڭ ورىندالۋىنا جاۋاپتى قىزمەتكەر، ياعني ساياسي شەنەۋنىككە جۇكتەلەتىن جاۋاپكەرشىلىك ۇلكەن. وسىعان بايلانىستى پرەزيدەنت اكىمشىلىگىنىڭ تاپسىرماسى بويىنشا سەنىمىن جوعالتۋىنا بايلانىستى ءوز وكىلەتتىكتەرىن تيىسىنشە ورىنداماعان ساياسي لاۋازىمدى تۇلعانى قىزمەتىنەن بوساتۋ ينستيتۋتى جۇزەگە اسىرىلادى. مۇنداي قىزمەتتەن بوساتۋ تۋرالى شەشىمدى تەك مەملەكەت باسشىسى عانا قابىلدايدى»،-دەيدى دارحان جازىقبايەۆ
زاڭناماعا «كەلىسىمشارتپەن جۇمىس ىستەيتىن قىزمەتكەرلەر»تۇسىنىگىن ەنگىزۋ دە قاراستىرىلعان. ولار مەملەكەتتىك قىزمەتكەر قاتارىنا جاتپايدى. ولار رەسپۋبليكالىق جانە باسقا دا جوبالاردى جۇزەگە اسىرۋ ءۇشىن ءبىر جىل جۇمىس ىستەيدى.
قۇجاتتا ۆاحتالىق تولەمدى ەنگىزۋ قاراستىرىلعان.
«قولدانىستاعى زاڭناماعا سايكەس باسقا ايماققا روتاسيالانعان قىزمەتكەر ۋاقىتشا باسپانامەن قامتاماسىز ەتىلۋى كەرەك. الايدا قىزمەتتىك پاتەرلەردىڭ جوقتىعىنان روتاسيالانعان قىزمەتكەرلەر ءوز قاراجاتىنا باسپانانى جالعا الۋعا ءماجبۇر. بۇل كوپتەگەن قىزمەتكەردىڭ روتاسيادان باس تارتۋى فاكتىسى. ىسكە اسىرۋ ۆاحتالىق تولەم وسى ولقىلىقتاردىڭ ورنىن تولتىرۋعا باعىتتالعان. ايتا كەتەيىك، ربك ۆاحتالىق تولەمدى ەنگىزۋ ءۇشىن 2023-2025 جىلدارعا قاجەت قاراجات ءبولۋ ماسەلەسىن ماقۇلدادى»،-دەيدى اگەنتتىك ءتوراعاسى.
سونىمەن قاتار قۇجات مەملەكەتتىك قىزمەتتەگى قاشىقتان جۇمىس ىستەۋ نورمالارىن جانە يكەمدى جۇمىس ۋاقىتىن رەتتەيدى. مەملەكەتتىك ورگاندار باسشىلار مەن ورىنداۋشىلار سانىن رەتتەۋدى قامتاماسىز ەتەدى، سونىمەن بىرگە مەملەكەتتىك قىزمەتكەردىڭ لاۋازىم ايلىقاقىسى بويىنشا جۇمىس ءوتىلىن ەسەپتەۋ ءتارتىبىن بەكىتۋ جونىندەگى وكىلەتتىكتەردى اگەنتتىككە بەرۋدى كوزدەيدى.
-مەملەكەتتىك ورگانداردا جۇمىس كەستەسىنىڭ دۇرىس ساقتالۋىن باقىلاۋدى جۇزەگە اسىرۋ قاراستىرىلعان. اقپان ايىندا اكىمشىلىك قۇقىق بۇزۋشىلىق تۋرالى كودەكسكە وزگەرىستەر ەنگىزىلىپ، مەملەكەتتىك ورگانداردا جۇمىس كەستەسىن زاڭسىز بۇزۋ تۋرالى اكىمشىلىك ىستەردى قاراۋ "توتەنشە جاعدايلار جونىندەگى كوميتەتكە" بەرىلدى. بۇعان دەيىن مۇنداي ىستەردى اكىمدىكتەر جانىنداعى ەڭبەك ينسپەكسياسى قاراعان. بۇل تۇزەتۋ 1 ساۋىردەن باستاپ كۇشىنە ەنەدى. وسىعان بايلانىستى مەملەكەتتىك قىزمەت تۋرالى زاڭ اگەنتتىككە مەملەكەتتىك ورگانداردا جۇمىس كەستەسىنىڭ دۇرىس ساقتالۋىن قاداعالاۋ فۋنكسياسىن جۇكتەيتىنىن جەتكىزدى دارحان جازىقبايەۆ.
سەنات دەپۋتاتتارى دا تارتىپسىزدىككە شاقىرعانى ءۇشىن سانكسيانى كۇشەيتەتىن تۇزەتۋلەردى قولدادى.