الماتىداعى №1 تروللەيبۋس پاركى ءوزىنىڭ 80 جىلدىق مەرەيتويىن اتاپ ءوتتى. سالتاناتتى جيىنعا قالا اكىمىنىڭ ورىنباسارى اسقار ءامرين قاتىسىپ، قالا باسشىسىنىڭ قۇتتىقتاۋىن جەتكىزدى. الماتىنىڭ دامۋىنا ايرىقشا ۇلەس قوسىپ كەلە جاتقان بۇل قوعامدىق كولىك ءتۇرى ءالى كۇنگە دەيىن قالالىقتاردىڭ سۇيىسپەنشىلىگىنە بولەنىپ وتىر. مەرەيتوي اياسىندا ەڭبەك ارداگەرلەرى مەن مايتالمان ماماندارعا زور ەڭبەكتەرى ءۇشىن ماراپاتتار تابىستالدى.
وسى جىلدار ىشىندە تروللەيبۋس قالالىقتار ءۇشىن جايلى ءارى ءقاۋىپسىز كولىك رەتىندە سەنىمگە يە بولدى. بۇگىنگى كۇنى قازاقستاندا تروللەيبۋس جەلىسى جۇمىس ىستەيتىن جالعىز قالا – الماتى. قالا تۇرعىندارى بۇل كولىكتىڭ قىزمەتىنە ريزاشىلىق بىلدىرەدى. ويتكەنى №1 پارك قالانىڭ قاق ورتاسىندا ورنالاسقاندىقتان، ونىڭ «ءومىرى» تۇرعىنداردىڭ كوز الدىندا ءوتىپ جاتىر. اۋەزوۆ كوشەسى، №64 مەكەنجايىنان تاڭعى 5-6-دا جۇمىسىن باستايتىن تەمىر تۇلپارلار كەشكى 24:00-دە عانا ورنىنا ورالادى. ءتورت مەزگىلدە دە جۇمىسىن توقتاتپاي، سەنىمدى تۇردە قىزمەت ەتەدى.
تروللەيبۋس پاركىنىڭ اۋماعى 4 گەكتاردى قۇرايدى، وندا 293 جۇرگىزۋشى جۇمىس ىستەيدى، ونىڭ ىشىندە 67ء-ى – ايەلدەر. كۇنىنە 130 مىڭعا جۋىق ادامدى تاسىمالدايتىن تروللەيبۋستار ءقازىر 273 كم جەلىدە 9 باعىت بويىنشا جۇمىس ىستەپ تۇر. 2012 جىلى پاركتە 90 تروللەيبۋس بولسا، ونىڭ ەكەۋى وقۋ ماقساتىندا پايدالانىلدى. جاقىندا 100 جاڭا Yutong تروللەيبۋسى جەلىگە قوسىلدى. وسى كۇزدە تاعى 100 جاڭا تروللەيبۋس، جىل سوڭىنا دەيىن 112 جاڭا تروللەيبۋس ساتىپ الىنادى. وسىلايشا، 2025 جىلعا قاراي پاركتەگى بارلىق كولىك تولىق جاڭارتىلاتىن بولادى.
پارك اۋماعىندا جوندەۋدى نەمەسە تەحنيكالىق تەكسەرۋدى قاجەت ەتەتىن تروللەيبۋستارعا ارنالعان ارنايى بوكستار مەن شەبەرحانالار بار. «الماتىەلەكتروترانس» باسشىسى الەكساندر بەيسەمبييەۆتىڭ ايتۋىنشا، تروللەيبۋستار مەگاپوليستىڭ ماڭىزدى تاريحىنىڭ ءبىر بولىگى جانە ەكولوگيالىق تازا كولىك ءتۇرى. الداعى جىلى پاركتە كۇردەلى جوندەۋ جۇمىستارى باستالادى. كابەلدەردى جاڭارتۋ جۇمىستارى دا باستالىپ كەتتى، ولاردىڭ قىزمەت ەتۋ مەرزىمى 50 جىلعا دەيىن جەتەدى.
الماتىدا تروللەيبۋستاردى پايدالانۋ تۋرالى شەشىم 1941 جىلدىڭ 12 ماۋسىمىندا قابىلداندى. العاشقى تروللەيبۋستار ياروسلاۆل زاۋىتىنان اكەلىندى. 1944 جىلدىڭ 1 مامىرىندا الماتىدا №1 تروللەيبۋس گوگول كوشەسىمەن ءجۇرىپ ءوتىپ، تروللەيبۋس ءداۋىرىنىڭ باستاۋى بولدى.
تروللەيبۋستاردىڭ گۇلدەنۋ كەزەڭى 1970-1980 جىلدارعا سايكەس كەلدى. 1982 جىلى مارشرۋتتاردىڭ ۇزىندىعى 211 كم-گە جەتىپ، قالاداعى جاڭا ىقشام اۋداندار مەن اۋەجايعا دەيىن جۇرە باستادى. الايدا 1990 جىلداردىڭ باسىندا تروللەيبۋس قىزمەتى قيىندىقتارعا تاپ بولدى، قوسالقى بولشەكتەر مەن جۇرگىزۋشىلەر جەتىسپەۋشىلىگى بايقالدى. سوعان قاراماستان، الماتىدا تروللەيبۋس جەلىسى جۇمىسىن جالعاستىرىپ كەلەدى.
تروللەيبۋس جۇرگىزۋشىلەرىن دايارلاۋ پروسەسىندە وزگەرىستەر ەنگىزىلدى. ەندى «Tb» ساناتىنا 23 جاستان باستاپ ءبىر جىلدىق «D1» كۋرسىن ءتامامداعاندار قابىلدانا باستادى. بۇل جۇرگىزۋشىلەردى جۇمىسقا تارتۋ جانە كادر تاپشىلىعىن شەشۋگە باعىتتالعان قادام.
بۇگىنگى كۇنى تروللەيبۋستار سەنىمدى، قىستا جىلى، جازدا كونديسيونەرلەرى بار زاماناۋي كولىك بولىپ تابىلادى. جۇرگىزۋشىلەردىڭ جالاقىسى 700–710 مىڭ تەڭگە، دەمالىس پەن مەديسينالىق قىزمەتتەر تولىق قامتاماسىز ەتىلەدى. سونىمەن قاتار، تروللەيبۋس جۇرگىزۋشىلەرى اراسىندا اۋلەتىمەن جۇمىس ىستەيتىن وتباسىلار دا بار. جۇيەدەگى ەسكى تروللەيبۋستار 12 جىلدان بەرى قىزمەت اتقارىپ كەلەدى.
قالامىزداعى تروللەيبۋستار زاماناۋي جابدىقتارمەن قامتىلعان: تەلەفونداردى زاريادتاۋعا ارنالعان USB قوسقىشتارى، كونديسيونەر، بەينەباقىلاۋ، جانە بورتتىق جازعىشتار بار.
