سەنىم قالپىنا كەلە مە؟

شۆەيساريانىڭ داۆوس قالاسىندا «سەنىمدى قالپىنا كەلتىرۋ» اتتى دۇنيەجۇزىلىك ەكونوميكالىق فورۋم وتۋدە

ۇلتتىق ەكونوميكا ءمينيسترى داۆوستاعى دۇنيەجۇزىلىك ەكونوميكالىق فورۋم اياسىندا ءبىرقاتار ەكىجاقتى كەزدەسۋلەر وتكىزدى. اتاپ ايتقاندا، الىبەك قۋانتىروۆ Carlsberg group-تىڭ باس ديرەكتورى ياكوب اارۋپ-اندەرسەنمەن، «Vestas Wind Systems A. S.» اعا ۆيسە-پرەزيدەنتى مورتەن ديرحولممەن جانە «Schneider Electric» international Operations كومپانياسىنىڭ ءوڭىر بويىنشا اتقارۋشى ۆيسە-پرەزيدەنتى مانيش پانتپەن كەزدەستى.

كەزدەسۋ بارىسىندا تاراپتار ساۋدا-ەكونوميكالىق جانە ينۆەستيسيالىق ىنتىماقتاستىق ماسەلەلەرى جونىندە ءوزارا پىكىر الماستى. ۇەم باسشىسى ينۆەستيسيالاردى قولداۋ مەن قورعاۋدىڭ ءتيىمدى قۇرالدارى تۋرالى ايتىپ بەردى، دەپ حابارلايدى اlmaty-akshamy.kz. 

«Vestas Wind Systems A. S.» اعا ۆيسە-پرەزيدەنتى جانە Schneider Electric كومپانياسىنىڭ اتقارۋشى ۆيسە-پرەزيدەنتىمەن اڭگىمە بارىسىندا جاڭارتىلاتىن ەنەرگيا كوزدەرىن دامىتۋ، ەنەرگەتيكالىق قاۋىپسىزدىكتى قامتاماسىز ەتۋ ماسەلەلەرى تالقىلاندى. بۇعان قوسا، قازاقستاندا ءوندىرىستى وقشاۋلاۋ جايلى ءسوز قوزعالدى.

سونداي-اق، قر-داعى ينۆەستورلارعا قاتىستى قابىلداناتىن سالىق سالۋ ماسەلەلەرى تالقىلاندى. ءوز كەزەگىندە Carlsberg group-تىڭ باس ديرەكتورى ەلىمىزدە جۇرگىزىلىپ جاتقان سالىق ساياساتىنا، ونىڭ ىشىندە الكوگولدىك ىشىمدىكتەردى اكسيزدەۋ جۇمىستارىنا وڭ باعا بەردى.

وسى كۇندەرى شۆەيساريانىڭ داۆوس قالاسىندا دۇنيەجۇزىلىك ەكونوميكالىق فورۋم وتۋدە. ەكونوميكا مەن ساياساتتىڭ جاھاندىق ماسەلەلەرى تالقىلانىپ جاتقان ءىس-شارانىڭ تاقىرىبى – «سەنىمدى قالپىنا كەلتىرۋ».

بۇل ا.ج. 19 قاڭتارىنا دەيىن جالعاساتىن جىل سايىنعى ءداستۇرلى 54ء-شى كەزدەسۋ. حالىقارالىق فورۋم جۇمىسىنا مەملەكەت پەن ۇكىمەت باسشىلارى، مينيسترلەر، ساراپشىلار جانە قوعام قايراتكەرلەرى قاتىسۋدا.