سەناتتىڭ الەۋمەتتىك-مادەني دامۋ جانە عىلىم كوميتەتىنىڭ دەپۋتاتتارى كەڭەيتىلگەن وتىرىس وتكىزدى.
وندا مۇگەدەك ادامداردىڭ ءومىر ءسۇرۋ ساپاسىن جاقسارتۋ ماسەلەلەرى جونىندەگى زاڭ جوباسىن تالقىلادى، دەپ حابارلادى Almaty-akshamy.kz 24.kz-كە سىلتەمە جاساپ.
سەناتتىڭ باسپا ءسوز قىزمەتىنىڭ مالىمەتىنشە، قۇجاتتىڭ ماقساتى مۇگەدەك ادامداردى الەۋمەتتىك قورعاۋ سالاسىنداعى زاڭنامانى جەتىلدىرۋ، سونداي-اق ءبىزدىڭ ەلىمىز راتيفيكاسيالاعان كونۆەنسيادان حالىقتىڭ ءتيىستى توبىنىڭ قۇقىقتارى تۋرالى كەمسىتۋشىلىك تەرمينولوگياسىن الىپ تاستاۋ، زاڭناماداعى ولقىلىقتىڭ ورنىن تولتىرۋ جانە مۇگەدەك ادامداردىڭ ءومىر ءسۇرۋ ساپاسى ماسەلەلەرىن رەتتەيتىن نورمالاردى سايكەستەندىرۋ بولىپ تابىلادى.
زاڭ قابىلدانعان جاعدايدا الەۋمەتتىك قىزمەت كورسەتۋ سالاسىنداعى مەملەكەتتىك ساياسات جەتىلدىرىلە تۇسەدى. زاڭ جوباسى سونىمەن قاتار مۇگەدەكتىكتى بەلگىلەۋ مەن ەكونوميكالىق دەربەستىكتى كەڭەيتۋ ءۇشىن مەديسينالىق-الەۋمەتتىك ساراپتامادان ءوتۋ كەزىندە سىبايلاس جەمقورلىق تاۋەكەلدەرىن تومەندەتۋگە، سونداي-اق وڭالتۋ قىزمەتتەرىن جەتىلدىرۋگە ىقپال ەتەدى.
زاڭ جوباسىنا قازاقستان رەسپۋبليكاسى پارلامەنتىنىڭ دەپۋتاتتارى باستاماشى بولدى جانە مۇگەدەك ادامداردىڭ ءومىر ءسۇرۋ ساپاسىن جاقسارتۋعا باعىتتالىپ وتىر.
زاڭ جوباسىندا مۇگەدەك ادامداردى جانە حالىقتىڭ ءجۇرىپ-تۇرۋى شەكتەۋلى باسقا دا توپتارىن تاسىمالداۋ ءۇشىن تۇراقتى قالالىق تاسىمالعا دايىنداۋشى زاۋىت بەيىمدەپ جاساعان اۆتوبۋستاردى ساتىپ الۋ جونىندەگى مىندەتتى تالاپتى ەنگىزۋ، ءۇشىنشى توپتاعى مۇگەدەك ادامداردى قۇقىقتىق جانە تەحنيكالىق سيپاتتاعى نوتارياتتىق ىستەردى جاساۋ كەزىندە جەكە نوتاريۋستاردىڭ قىزمەتىنە اقى تولەۋدەن بوساتۋ جانە باسقا دا جاڭالىقتار بار. سەناتورلار كوميتەتتىڭ كەڭەيتىلگەن وتىرىسىنىڭ قورىتىندىسى بويىنشا زاڭ جوباسىن پالاتانىڭ قاراۋىنا بەرۋ تۋرالى شەشىم قابىلدادى.