ءمينيستردىڭ پىكىرىنشە، بالانىڭ ۇلگەرىمى مەن ءتارتىبىن باسقا ادامداردىڭ كوزىنشە تالقىلاۋدى توقتاتۋ كەرەك.
ءبىلىم جانە عىلىم ءمينيسترى اسحات ايماعامبەتوۆ اتا-انالار جينالىسىن وتكىزۋدىڭ جاڭا فورماتىنا كوشۋ كەرەك ەكەنىن ايتتى، دەپ حابارلايدى Almaty-akshamy.kz
«بارلىق مەكتەپ اتا-انالار جينالىسىن وتكىزۋدىڭ جاڭا فورماتىنا كوشۋى كەرەك. ولاردى جيناپ الىپ، باسقا ادامداردىڭ كوزىنشە بالانىڭ ۇلگەرىمى مەن ءتارتىبىن تالقىلاۋدان ارىلعان ءجون. ونىڭ ورنىنا جەكە، توپتىق نەمەسە ۇجىمدىق فورماتتا ۇيىمداستىرعان ءتيىمدى»، - دەپ مالىمدەدى ايماعامبەتوۆ اپپارات جينالىسىندا.
ءمينيستردىڭ ايتۋىنشا، ءاربىر اتا-اناعا مۇعالىمنەن ءوز بالاسىنىڭ جەتىستىكتەرى مەن ءالسىز تۇستارى تۋرالى تولىق اقپارات الاتىنداي جاعداي جاساۋ قاجەت.
«ول ءۇشىن اتا-انالارمەن قارىم-قاتىناستى جاڭاشا جۇرگىزۋ ماڭىزدى»، - دەدى مينيستر.
بۇعان دەيىن اسحات ايماعامبەتوۆ ەندى اعىلشىن ءتىلى 1-سىنىپتان ەمەس، 3-سىنىپتان باستاپ وقىتىلاتىنىن مالىمدەدى. بۇل وزگەرىس بيىل ءبىرىنشى قىركۇيەكتەن باستاپ ەنگىزىلەدى دەگەن جوسپار بار.