بۇگىن سەناتتىڭ جالپى وتىرىسىندا وسى ماسەلەگە وراي دەپۋتاتتار پرەمەر-مينيسترگە ساۋال جولدادى.

سەناتور ءلاززات سۇلەيمەن اتاپ وتكەندەي، بۇل دەپۋتاتتىق ساۋالدى دايىنداۋعا جانجال سوڭى ادام ولىمىنە اكەپ سوققان الماتى قالاسىنداعى تۇرعىن ءۇيدى بوساتۋدى تالاپ ەتۋ بارىسىنداعى قايعىلى وقيعا سەبەپ بولعان.

ونىڭ سوزىنشە، جۇرگىزىلگەن تالداۋ، كەپىلدىك مۇلىكپەن ساۋدا-ساتتىق سىبايلاس جەمقورلىق كورىنىستەرى ءۇشىن جايلى ورتا بولىپ وتىر.

بۇل بانكتەر مەن جەكە سوت ورىنداۋشىلارىنا بورىشكەرلەردىڭ جىلجىمايتىن مۇلكىن تومەن باعامەن، كەيدە شەكتەۋسىز مولشەردە ساتىپ الۋعا مۇمكىندىك بەرەدى. ءبىر ادام بىرنەشە پاتەردى ساتىپ العان فاكتىلەر دە تىركەلگەن. سونىمەن قاتار، بارلىق ساۋدا-ساتتىققا قاتىسۋشىلار بىر-بىرىمەن بايلانىستى بولعان فاكتىلەر دە از بولماعان، - دەدى ءلاززات سۇلەيمەن.

دەپۋتات اتاعانداي، 2021 جىلدىڭ 1 شىلدەسىنەن 30 قىركۇيەگىنە دەيىن رەسپۋبليكانىڭ اكىمشىلىك سوتتارىنا 7 مىڭنان استام ءىس قوزعالىپ، ونىڭ ىشىندە جەكە سوت ورىنداۋشىلارىنىڭ ارەكەتتەرىنە شاعىمدانۋ بويىنشا 2 338 تالاپ ارىز تۇسكەن.

ازاماتتاردىڭ شاعىمدارى نەگىزىنەن جەكە سوت ورىنداۋشىلارىنىڭ قولدانىستاعى زاڭناما نورمالارىنا، بورىشكەردىڭ مۇلكىنە تىيىم سالۋ كەزىندە اتقارۋشىلىق ءىس جۇرگىزۋ تاراپتارىنىڭ قۇقىقتارىن بۇزۋىنا، سونداي-اق جەكە سوت ورىنداۋشىلارى قىزمەتىندە ترانسپارەنتتىلىكتىڭ بولماۋىنا جانە وسى سالاداعى ءتيىستى مەملەكەتتىك باقىلاۋعا بايلانىستى، - دەيدى ول.

وسىعان بايلانىستى دەپۋتاتتار كرەديتورلار مەن بورىشكەرلەردىڭ مۇددەلەرىن قورعاۋ ءۇشىن سەناتورلار زاڭنامانى جەتىلدىرۋ جونىندە شارا قابىلداۋدى ۇسىندى.

ازاماتتاردىڭ جالعىز تۇرعىن ءۇيىن ءوندىرىپ الۋعا تىيىم سالۋدى بەلگىلەۋدى، ءتيىستى نقا-عا بانكتەردىڭ قارىز الۋشىلاردىڭ كەپىلگە سالىنعان مۇلكىن ساتۋ جونىندەگى ساۋدا-ساتتىققا قاتىسۋىن بولدىرمايتىن نورمانى ەنگىزۋدى، قارىز الۋشى ءوزىنىڭ قارجىلىق جاعدايىن جاقسارتقانعا دەيىن شارتتىڭ تالاپتارىن ورىنداماعان كەزدە بانكتىك قارىز بويىنشا مەرزىمىن كەيىنگە قالدىرۋ مۇمكىندىگىن قاراۋدى، بانكتەردىڭ بانكتىك قارىز شارتىندا كوزدەلمەگەن قارىز الۋشىنىڭ مۇلكىن ءوندىرىپ الۋىنا تىيىم سالۋدى بەلگىلەۋدى جانە جەكە سوت ورىنداۋشىلارىنىڭ قىزمەتىن مەملەكەتتىك باقىلاۋ، ولاردىڭ لاۋازىمدىق وكىلەتتىكتەرىن تيىسىنشە ورىنداماعانى، كاسىبي دەڭگەيىن ارتتىرعانى ءۇشىن جاۋاپكەرشىلىگىن كۇشەيتۋ، - دەپ اتاپ ءوتتى ول.

بۇل ساۋالدى سەناتورلار اسقار شاكىروۆ، ۆلاديمير ۆولكوۆ جانە ءلاززات سۇلەيمەن ۇكىمەت باسشىسىنا جولدادى.