16 جەلتوقسان – ەلىمىزدىڭ ەگەمەندىگى جاريالانعان كۇن. سول كۇنى كوگىمىزدە تاۋەلسىزدىك تۋى جەلبىرەدى. سودان بەرى 30 جىل ۋاقىت ءوتتى. وسى وشپەس جىلدار بەلەسىندە ەلىمىزدىڭ ەكونوميكاسى قارىشتاپ دامىدى. ساياساتتاعى سىندارلى باعىت ءوز جەمىسىن بەرۋدە. بەرەكە-بىرلىكتىڭ ارقاسىندا الەم تانىعان ىرگەلى مەملەكەتكە اينالدىق.
ارتقا تاستاعان وتىز جىلدىڭ ىشىندە نە اتقاردىق دەگەن ساۋال تۋسا، تىزبەكتەپ سوزبەن جەتكىزۋ مۇمكىن ەمەس. ءبىر مەملەكەتكە جەتەرلىك ءىس تىندىرىلىپ، جۇزەگە اسىرىلۋدا. ەكونوميكالىق جاعدايىمىز جاقسارىپ، ءال-اۋقاتىمىز ارتتى. قازاق مەكتەپتەرى مەن بالاباقشالار سانى كوبەيىپ، ءبىلىم مەن دەنساۋلىق جاعدايىنا اسا ءمان بەرىلدى. وزگە ەلدەرمەن قارىم-قاتىناسىمىز جاقسارىپ، ساياسي جانە مادەني قاتىناستار دا ۇدەي ءتۇستى. ەلىمىزدىڭ بارلىق سالاسىنداعى قىزمەتكەرلەرگە شەت ەلدىڭ ءتۇرلى سالاداعى ماماندارىمەن تاجىريبە الماسۋعا جاعداي جاسالدى. وسىنىڭ ءبارى تاۋەلسىز ەلدىڭ ماقتانىشى دەۋگە بولادى.
تاۋەلسىزدىك ۇعىمى ءار حالىق ءۇشىن قاستەرلى. تاۋەلسىزدىكپەن بىرگە قازاقستان مەملەكەتىنىڭ جاڭا ءداۋىرى باستالدى. ەركىندىك ەلىمىزدىڭ ۇلتتىق قۇندىلىقتارىنا بەت بۇرۋعا جانە ونى قايتا جاڭعىرتۋعا جول اشتى. ۇلتتىق دۇنيەتانىمعا دەگەن ەركىن كوزقاراس پايدا بولدى.
تاۋەلسىزدىك ءتىلىمىز بەن ءدىنىمىزدى قالىپقا كەلتىردى. ۇلتتىق سانا-سەزىم قالىپتاستى. اتا-بابالارىمىزدىڭ اڭساعان ارماندارى ورىندالدى. وعان قول جەتكىزۋ قانشالىقتى قيىن بولسا، سول ەگەمەندىكتى ساقتاپ قالۋ وڭاي ەمەستىگى بەلگىلى. تاۋەلسىزدىكتىڭ ءاربىر قازاققا بەرگەنى مول.
تاۋەلسىزدىككە جەتۋ جولى قانشالىقتى اۋىر بولسا، تاۋەلسىزدىكپەن تىنىستاۋدىڭ باياندىلىعى دا سونشالىقتى جاۋاپتى ەكەنى انىق.
ەگەمەن ەلىمىزدىڭ قالىپتاسۋ جىلدارىندا ءبىلىم سالاسىندا دا ەداۋىر جاڭالىقتار بولدى. جاڭادان ءبىلىم بەرۋ نىساندارى سالىندى. مەكتەپتەر مەن بالاباقشالار كوبەيدى. اسىرەسە، قازاق مەكتەپتەرىنىڭ سانى ارتتى. مۇنىڭ بارلىعى تاۋەلسىزدىكتىڭ ارقاسى دەپ بىلەمىن. ءوزىم قىزمەت ەتەتىن الاتاۋ اۋدانىنداعى №179 جالپى ءبىلىم بەرەتىن مەكتەپ ۇجىمى ءبىلىم سالاسىنىڭ دامۋىنا، جاس ۇرپاقتىڭ ساپالى ءبىلىم الۋىنا زور ۇلەسىن قوسىپ كەلەدى. ۇجىمىمىزدا تاجىريبەلى ۇستازدار كوپ. وقۋشىلارىمىز قالالىق، رەسپۋبليكالىق سايىستاردان، ءتۇرلى وليمپيادالاردان جۇلدەلى ورىندار الىپ ءجۇر. وسىنىڭ ءبارى قۋانىش، جەتىستىك.
ەلىمىزدىڭ تاۋەلسىزدىككە وڭايشىلىقپەن قول جەتكىزبەگەنى تۋرالى مەملەكەتىمىزدىڭ بولاشاعى سانالاتىن مەكتەپ وقۋشىلارىنا ۇنەمى ايتىپ وتىرعان ءجون. وسى ورايدا مەكتەپتەردە بولاتىن تاۋەلسىزدىككە بايلانىستى تاربيەلىك ءىس-شارالار تەك جەلتوقسان ايىندا عانا ەمەس، باسقا ۋاقىتتاردا دا ءوتىپ تۇرۋى قاجەت دەپ ەسەپتەيمىن. مەنىڭشە، ەرجۇرەكتىلىگىن پاش ەتكەن تۇلعالاردىڭ بەينەسىن جاساپ، ولاردىڭ ۇلى ىستەرىن تاربيەلىك باعىتتاردا قاشاندا دارىستەرىمىزگە قوسىپ وتىرعانىمىز ابزال.
تاۋەلسىزدىگىمىزدى كۇللى الەمگە تانىتىپ وتىرعان قازاق ەلىنىڭ كەلەشەگى ايقىن، بولاشاعى جارقىن. تەك وسى قۇندىلىعىمىزدى قاستەرلەپ، ساقتاپ، كەلەشەك ۇرپاققا جەتكىزۋ – ءبىزدىڭ مىندەتىمىز.