مەگاپوليسكە قازاقستان رەسپۋبليكاسى سەناتىنىڭ ءبىرقاتار دەپۋتاتتارى جۇمىس ساپارىمەن كەلدى. ولار شاھاردىڭ وزەكتى ماسەلەلەرىن ورتاعا سالدى.
دوستىق ۇيىندە ق ر پارلامەنتى سەناتىنىڭ دەپۋتاتتارى قالالىق ءماسليحات دەپۋتاتتارىمەن ەلىمىزدە جۇرگىزىلىپ جاتقان كەشەندى دەموكراتيالىق رەفورمالار مەن قازاقستاننىڭ ساياسي جۇيەسىن قايتا جاڭعىرتۋدى تالقىلادى.
كەزدەسۋ بارىسىندا دەپۋتاتتار قازاقستان رەسپۋبليكاسى پرەزيدەنتىنىڭ «ادىلەتتى قازاقستان: ءبارىمىز جانە ءارقايسىمىز ءۇشىن. ءقازىر جانە ءاردايىم» اتتى سايلاۋالدى باعدارلاماسىن ىسكە اسىرۋ جونىندەگى ءىس-قيمىل جوسپارىنا ەگجەي-تەگجەيلى توقتالدى. جوسپار شەڭبەرىندە ءماسليحات تاراپىنان دەپۋتاتتىق كورپۋستىڭ بەلسەندى جانە اشىق جۇمىسىن قامتاماسىز ەتۋ ءۇشىن بارلىق كۇش-جىگەرىن جۇمساپ، قالا تۇرعىندارىنىڭ سۇرانىستارى مەن ۋاقىت تالاپتارىن ەسكەرە وتىرىپ، ءبىرقاتار يننوۆاسيالار ەنگىزەتىن بولادى.
ءماسليحات ءتوراعاسى ستانيسلاۆ كانكۋروۆ، مەملەكەت باسشىسىنىڭ تاپسىرماسىنا سايكەس، مەملەكەتتىك ساياساتتى ىسكە اسىرۋ، بيۋدجەت قاراجاتىن ءتيىمدى جۇمسالۋىن باقىلاۋ جانە قالالىق باعدارلامالاردى ورىنداۋدى قامتاماسىز ەتۋ، ازاماتتاردىڭ ۇسىنىستارىن قاراستىرۋ جانە پروبلەمالارىن شەشۋ، قالانىڭ جۇيەلىك پروبلەمالارىن جويۋ جونىندە ۇسىنىستار ازىرلەۋ، مەگاپوليستى ودان ءارى دامىتۋ جونىندە باستامالار دايىنداۋ ءماسليحات جۇمىسىنداعى باستى باسىمدىقتار بولىپ تابىلاتىنىن اتاپ ءوتتى.
سونداي-اق، ءىس-شارا بارىسىندا الماتى قالاسىنىڭ ءبىرقاتار ەكونوميكالىق، الەۋمەتتىك جانە ەكولوگيالىق پروبلەمالارى تالقىلاندى. ءماسليحات دەپۋتاتتارى سەنات دەپۋتاتتارىنا ەرەكشە قاجەتتىلىكتەرى بار ادامدار ءۇشىن بۇقارالىق سپورتتى دامىتۋ، دارىلىك پرەپاراتتارعا باعانى تومەندەتۋ، اقىل-ەسى كەم بالالارعا مۇگەدەكتىك تاعايىنداۋ تەتىگىن قايتا قاراۋ، شاعىن جانە ورتا بيزنەستى قولداۋ باعدارلاماسى تۋرالى ماسەلەلەردى شەشۋدە قولداۋ كورسەتۋ تۋرالى وتىنىشپەن جۇگىندى.
ەستەرىڭىزگە سالا كەتەيىك، 2022 جىلعى 22 جەلتوقساندا ق ر پارلامەنتى سەناتىنىڭ جالپى وتىرىسىندا دەپۋتاتتار ق ر «اگلومەراسيالاردى دامىتۋ تۋرالى» زاڭىن، سونداي-اق وعان ىلەسپە تۇزەتۋلەر پاكەتىن قابىلداپ، پرەزيدەنتكە قول قويۋعا جولداعان بولاتىن. اعىمداعى جىلدىڭ 1 قاڭتارىندا مەملەكەت باسشىسى قاسىم-جومارت توقايەۆ «اگلومەراسيالاردى دامىتۋ تۋرالى» زاڭعا قول قويدى. وسىعان بايلانىستى دەپۋتاتتار ەلىمىزدەگى ءىرى الماتى اگلومەراسياسىن دامىتۋ ءۇشىن سەنات پەن ءماسليحات دەپۋتاتتارىنىڭ كۇش-جىگەرىن بىرىكتىرۋدىڭ ماڭىزدىلىعىن اتاپ ءوتتى.
تاقىرىپقا وراي
نۇرتورە ءجۇسىپ، ق ر پارلامەنتى سەناتىنىڭ دەپۋتاتى:
– قازىرگى تاڭدا سەناتتىڭ دا اتقاراتىن وكىلەتتىلىگى كۇشەيىپ كەلەدى. جوعارعى پالاتا وكىلدەرى الماتى قالالىق ءماسليحاتى دەپۋتاتتارىمەن جولىعىپ، كوپتەگەن الەۋمەتتىك، ەكولوگيالىق، ەكونوميكالىق ماسەلەلەردى ورتاعا سالدى. بۇل وتە جاقسى باستاما دەپ ويلايمىز. ويتكەنى، ءقازىر پارلامەنتتە دەپۋتتاردىڭ باستاماشىلدىعىمەن زاڭ جوباسىن دايارلاۋ جاعى كۇشەيدى. جاقىندا عانا مەملەكەت باسشىسى «اگلومەراسيا» تۋرالى زاڭعا قول قويدى. بۇل دەگەنىمىز، مەگاپوليستىڭ قارقىن الۋىنا سەپتەسەدى. سونىمەن بىرگە ىرگەلەس جاتقان ەلدى-مەكەننىڭ جاعدايى، قارىم-قاتىناس ماسەلەسى، ەكولوگيا، وقۋ-اعارتۋ ءبارى كەشەندى تۇردە جوسپارلاناتىنىنىڭ ءبىر كورىنىسى. ياعني، اتالعان پروبلەمالاردى قارجىلاندىرۋ تەتىكتەرى تابا وتىرىپ، كوپ ۇزاتپاي شەشىمى تابىلادى دەپ بىلەمىز. الماتىلىقتاردى تولعاندىرعان ويلاردى جادىمىزعا توقىپ، ءتۇرتىپ الدىق. الداعى ۋاقىتتا دەپۋتاتتىق ساۋالدار، باسقا دا زاڭ جوبالارىندا ايتىلعان ۇسىنىس پەن پىكرىلەردىڭ شەشۋ جولدارىن قاراستىرامىز.
دينار نوكەتايەۆا، ق ر پارلامەنتى سەناتىنىڭ دەپۋتاتى:
– كونستيتۋسياعا ەنگەن وزگەرتۋلەر مەن تولىقتىرۋلار ناتيجەسىندە پارلامەنتتىڭ ءرولى ارتتى. سونىڭ ناتيجەسىندە ازاماتتاردىڭ قۇقىعىن قوعاۋ تاسىلدەرى جەتىلدىرىلدى. حالىقتىڭ ەل باسقارۋ ىسىنە قاتىسۋ مۇمكىندىكتەرى كەڭەيدى. ول وزگەرىستەر جاڭارۋدىڭ باسى عانا. ساياسي رەفورمالاۋ ودان ءارى جالعاسا بەرەدى.
سەناتتىڭ اتقارىپ، ەل دامۋنىڭ وركەندەپ ءوسۋ جولىندا ىستەپ كەلە جاتقان ىلكىمدى ىستەرى جەتەرلىك. ءوزىم دە وسى ءبىر قىرۋار شارۋانىڭ بەل ورتاسىندا ءجۇرمىن. الماتى ءبىز ءۇشىن ىستىق. وسىدان تۋرا 6 جىل بۇرىن دەپۋتات بولىپ سايلانعان ەدىم. سول ۋاقىتتا سايلاۋشىلاردىڭ قولداۋىن سەزىندىم. ءالى دە سەزىنىپ، سوعان ساي ىستەر اتقارىپ كەلەمىز. سۇيىكتى شاھارىمىز دامۋى كوز الدىمىزدا. قويان جىلىندا تاتۋلىق، ىنتىماق، بىرلىك بولسىن!