سەناتور نۇرتورە ءجۇسىپ ءوزىنىڭ دەپۋتاتتىق ساۋالىندا سيفرلىق اۋتيزم – ءححى عاسىردىڭ دەرتى ەكەنىن ايتتى.
دەپۋتات قازىرگى تاڭدا بۇكىل الەمدە، ونىڭ ىشىندە قازاقستاندا دا، «سيفرلىق اۋتيزم» بەلگىلەرى بايقالا باستاعانىن اتاپ ءوتتى. بالالار سمارتفوندى ۇزاق ۇستاۋى سالدارىنان ەستە ساقتاۋ، كورۋ جانە سويلەۋ قابىلەتىنەن ايىرىلىپ جاتىر. ولاردىڭ ءوز بەتىنشە ويلاۋى، ۇزاق ماتىندەردى قابىلداۋى، اينالاعا نازار اۋدارۋى قيىنعا سوعىپ وتىر، دەپ حابارلايدى Almaty-akshamy.kz Egemen.kz-كە سىلتەمە جاساپ.
«جەتى اتاسىن جاتقا بىلەتىن ۇرپاق ورنىنا جەتى اۋىز ءسوزدى ازەر ايتاتىن تولقىن پايدا بولدى. سكرينەيدجەر، زۋممەر، نەمەسە Z – ۇرپاق – ءوز ءومىرىن ەلەكتروندى قۇرىلعىسىز ەلەسەتەتە المايتىن جاڭا بۋىن. قازىرگى تاڭدا لوگونيەۆروز اۋرۋى مەن تۋرەت سيندرومى كۇشەيە باستادى. تۇتاس ۇلت پەن ۇرپاق ۇلكەن ءقاۋىپ الدىندا تۇر. اتا-انالاردىڭ 65 پايىزى بالالارىنا 3-5 جاستان گادجەت ۇستاتادى. ءبىر سوزبەن ايتقاندا، قولىنا «سمارتفون ۇستاپ تۋعان» بۋىن ومىرگە كەلدى»، - دەدى دەپۋتات.
سەناتور گادجەتيزاسيا مەن زاماناۋي تەحنولوگياعا قارسى تۇرۋ دا دۇرىس ەمەس ەكەنىن ايتتى. دەپۋتات وسىعان بايلانىستى مەكتەپتەر مەن بالاباقشالارداعى اتا-انالار كوميتەتتەرىنە، سونداي-اق سالالىق ۇكىمەتتىك ەمەس ۇيىمدارعا كيبەرمانيانىڭ زيانى تۋرالى بەلسەندى تۇردە ايتىپ بەرۋىن ۇسىندى. سەناتور سونىمەن قاتار، وسكەلەڭ ۇرپاقتىڭ دەنساۋلىعىنا باقىلاۋ جۇرگىۋزۋگە تىكەلەي بايلانىستى ۇسىنىستارىن دا ورتاعا سالدى.
«ۇكىمەتكە جاڭا تۋعان نارەستەلەردى جاپپاي رەتينوپاتيا جانە اۋديولوگيالىق سكرينينگتەن وتكىزۋدىڭ ساپاسىنا ءمان بەرۋدى، الماتى قالاسىنداعى ا.وستروۆسكيي اتىنداعى زاعيپ جانە كوزى ناشار كورەتىن بالالارعا ارنالعان №4 مەكتەپ-ينتەرناتقا قوسىمشا عيمارات سالۋدى ۇسىنامىز. سونىمەن قاتار لوگوپەد جانە وفتالمولوگ ماماندىقتارىنا بولىنەتىن مەملەكەتتىك گرانت سانىن كوبەيتكەن ماڭىزدى»، - دەدى نۇرتورە ءجۇسىپ.