جۇمىسشىلارعا ءبىر ساعاتتىق ەرەۋىل وتكىزۋگە رۇقسات بەرىلەدى

بۇل زاڭ پرەزيدەنتكە جىبەرىلدى.

سەنات دەپۋتاتتارى ەڭبەك داۋلارى مەن جانجالدارىن شەشۋ تارتىبىنە وزگەرىس ەنگىزۋ تۋرالى زاڭدى ماقۇلدادى، دەپ حابارلايدى Almaty-akshamy.kz

زاڭعا سايكەس، جۇمىسشىلارعا ءبىر ساعاتتىق ەسكەرتۋ ەرەۋىلىن وتكىزۋگە رۇقسات بەرىلمەك.

ەڭبەك جانە حالىقتى الەۋمەتتىك قورعاۋ ۆيسە-مينيسترى اقمادي سارباسوۆتىڭ ايتۋىنشا، ەسكەرتۋ ەرەۋىلىن ەڭبەك اربيتراجى كەزىندە وتكىزۋگە رۇقسات بەرىلەدى. ۋاقىتى - ءبىر ساعات. ادام سانىنا دا شەكتەۋ بار.

«ادام سانى 50-دەن اسپاۋى كەرەك. ەسكەرتۋ ەرەۋىلى جۇمىسشىلاردىڭ تالابىن ءتيىمدى قاراستىرۋعا جانە بارىنە ىڭعايلى شەشىم قابىلداۋعا ىقپال ەتۋى كەرەك»، - دەدى سارباسوۆ سەناتتا وتكەن بريفينگتە.

وسى ورايدا ۆيسە-مينيستر تولىققاندى ەرەۋىلدى وتكىزۋ ءتارتىبىن ءتۇسىندىردى.

«ءبارى جۇمىسشىلاردىڭ تالابىنان باستالادى. بۇل - ءبىرىنشى كەزەڭ. ەكى جاق كەلىسىمگە كەلمەسە، بارلىق ماسەلە تاتۋلاسۋ كوميسسياسىندا قارالادى. وعان جۇمىس بەرۋشى مەن جۇمىسشىلاردىڭ وكىلدەرى تەڭ دارەجەدە كىرەدى. تاتۋلاسۋ كوميسسياسىندا ەشتەڭە شەشىلمەسە، ەڭبەك اربيتراجى قۇرىلادى. ونىڭ قۇرامىنا دا ەكى جاقتىڭ ادامدارى، ەڭبەك ينسپەكتورى جانە تاعى باسقا ساراپشىلار كىرەدى. وندا دا كەلىسىمگە كەلمەسە، جۇمىسشىلار ەرەۋىل جاريالاۋعا قۇقىلى»، - دەپ اتاپ كورسەتتى سارباسوۆ.

ونىڭ ايتۋىنشا، بۇگىن قابىلدانعان زاڭدا اربيتراجدى قۇرۋ مەرزىمى ەكى كۇنگە قىسقارتىلادى. ال شەشىم شىعارۋعا ءۇش كۇن بەرىلەدى. سونداي-اق، كەلىسۋ كوميسسياسىنا شاعىم ءتۇسىرۋ ءتارتىبى جان-جاقتى جازىلعان.

جۇمىس بەرۋشى ەرەۋىل جانە تاعى باسقا شارالاردى وتكىزۋ ءۇشىن جاعداي جاساۋعا مىندەتتى.

بۇگىن زاڭ ەكى وقىلىمدا ماقۇلداندى. قۇجات پرەزيدەنتتىڭ قول قويۋىنا جىبەرىلدى.