اۋەزوۆ جانە تۇركسىب اۋداندارىنداعى كوپ قاباتتى تۇرعىن ۇيلەردىڭ اۋلالارىندا تازالىقتى قامتاماسىز ەتەتىن مەردىگەرلەر انىقتالىپ، اۋلا تازالاۋدى قولعا الدى. قالا اكىمى ەربولات دوسايەۆتىڭ وكىمىمەن بيىل اۋلالاردى تازارتۋعا بيۋدجەتتەن قارجى بولىنگەن بولاتىن.
جايىق التاي ۇلى، اۋەزوۆ اۋدانى اكىمى اپپاراتىنىڭ كوممۋنالدىق شارۋاشىلىق ءبولىمىنىڭ باس مامانى:
- قالا اكىمىنىڭ تاپسىرماسىمەن 1 قاڭتاردان باستاپ اۋلا اۋماعىن تازالاۋ جۇمىستارى جۇرگىزىلۋدە. اۋەزوۆ اۋدانى بويىنشا 10 مەردىگەر كومپانيا جۇمىس ىستەيدى. تۇرعىندار تاراپىنان قوقىس جاشىكتەرى مەن اۋلا اۋماعىنداعى بالالار وينايتىن الاڭدى تازالاۋ جونىندە ارىز-شاعىمدار بار. سول بويىنشا ءتيىستى شارالار قابىلدانۋدا. كىرە بەرىس، جاياۋ جۇرگىنشى جولدارى، قوقىس جاشىكتەرى تازالانادى. جۇمىس بارىسى تاڭەرتەڭ ساعات 8-دەن كەشكى ساعات 17.00-گە دەيىن كۇندەلىكتى جۇرگىزىلەدى. اۋدان بويىنشا 500-دەن استام جۇمىسشى، 47 تەحنيكا بار. «سايران»، «تاستاق» ىقشاماۋداندارىنداعى 16 اۋلا تازالانۋدا. ودان بولەك، قار جاۋعاندا موبيلدىك توپ جۇمىس ىستەيتىن بولادى»، - دەيدى مەردىگەر ۇيىمنىڭ باسشىسى رۋسلان جاراسبايەۆ.
ايدوس بەكەتايەۆ، تۇركسىب اۋدانى اكىمىنىڭ ورىنباسارى:
- الماتى قالاسى اكىمىنىڭ تاپسىرماسىمەن اۋلالاردى تازالاۋعا بيۋدجەتتەن قارجى بولىنگەن بولاتىن. قازىرگى تاڭدا تۇركسىب اۋدانىندا 594 اۋلا بار. وسى اۋلالارعا بارلىعى 36 مەردىگەر كومپانيا قىزمەت كورسەتەدى. ءدال ءقازىر تۇركسىب اۋدانىنداعى «التاي» ىقشاماۋدانى، مايلين كوشەسى، 71 اۋلا اۋماعىنا «ستروي سەرۆيس» كومپانياسىنىڭ 34 جۇمىسشىسى جانە تەحنيكالار جۇمىلدىرىلدى. ولار اۋلاداعى مۇزدى ويىپ، قاردى تازالايدى، تروتۋارلاردى قاردان تازارتىپ، قوقىستاردان ارىلتادى، بالالاردىڭ ويىن الاڭى دا رەتكە كەلتىرىلەدى. ءبىز بارىنشا اۋلا تازالاۋشى جۇمىسشىلاردىڭ ءبارىن جۇمىسپەن قامتۋعا، جۇمىسسىز قالدىرماۋعا تىرىسامىز. ولار اركىم ءوز جاعدايىنا بايلانىستى كەيبىرى تولىق جۇمىس كۇنىنە كەلىسەدى، كەيبىرى دەنساۋلىعىنا، وتباسىلىق جاعدايىنا بايلانىستى تولىق ەمەس جۇمىس كۇنىن تاڭدايدى. جۇمىسشىلاردىڭ اراسىندا زەينەت جاسىنداعى ادامدار دا بار. اركىمنىڭ ەڭبەگىنە قاراي، جۇمىس كولەمىنە قاراي جالاقىسى تولەنەدى.
جاينا بايكەشوۆا، تۇركسىب اۋدانىنىڭ تۇرعىنى:
-تۇركسىب اۋدانىنىڭ اكىمىنە، اكىمنىڭ ورىنباسارلارىنا، تۇرعىن ءۇي شارۋاشىلىعى ءبولىمىنىڭ قىزمەتكەرلەرىنە العىسىمىزدى بىلدىرەمىز. اۋلامىز ۇنەمى ۋاقىتىندا تازالانادى. اۋلا تازالاۋشىلار اي سايىن كەلىپ قاردى تازالاپ، جولداردى اشىپ كەتەدى. بيىل قار مول ءتۇستى. اۋلامىز كولەڭكە جاق بولعاندىقتان كوشەلەرگە ءجيى مۇز قاتىپ، بالالاردىڭ، قارت ادامداردىڭ جۇرۋىنە قيىندىق تۋعىزاتىنى راس. ال اكىمدىكتىڭ جۇمىسشىلارى دەمالىس، مەرەكە كۇندەرىنە قاراماستان ءوز جۇمىستارىنا جاۋاپكەرشىلىكپەن قارايدى، ءاردايىم كەلىپ اۋلانى تازارتىپ وتىرادى. سول ءۇشىن بارشا تۇرعىنداردىڭ اتىنان اكىمشىلىككە ريزاشىلىعىمىزدى بىلدىرەمىز.
