پرەمەر-مينيسترى ءاليحان سمايىلوۆتىڭ اتىنا دەپۋتاتتىق ساۋال ءتۇستى
وندا سەناتور مۇرات باقتيار ۇلى اگرارلىق سالا ەڭبەككەرلەرىن قارجىلاي قولداۋدى كۇشەيتۋ ءۇشىن قازاقستاندا اۋىل شارۋاشىلىعى بانكىن قۇرۋدى ۇسىندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
دەپۋتاتتىڭ پىكىرىنشە، ول قازىرگى تاڭدا اسا قاجەت سالاعا ايتارلىقتاي قولداۋ كورسەتەر ەدى. بۇل ماسەلە جاقىندا سەناتورلاردىڭ قىزىلوردا وبلىسىنا بارعان جۇمىس ساپارى كەزىندە كوتەرىلگەن بولاتىن. ديقاندار ايماقتاعى نەگىزگى اگرارلىق داقىلى كۇرىش ەكەنىن ايتا كەلىپ، وسى داقىل وبلىستا ىشكى نارىق سۇرانىسىنىڭ 80%-نا دەيىن قامتاماسىز ەتەتىنىنە توقتالدى. الايدا جىل وتكەن سايىن جۇمىس ىستەۋ قيىنداي تۇسۋدە. وڭىردەگى سۋارمالى جەرلەردىڭ جاعدايى وتە ناشار، سۋارمالى جەرلەردە سۋ قۇبىرى مەن كارىز جۇيەسى ءتيىستى قارجىلاندىرۋدىڭ جوقتىعىنان ۋاقىتىندا تازارتىلمايدى. بۇل قۇبىرلاردىڭ قوقىسقا تولىپ كەتۋى مەن شامادان تىس تۇزدانۋعا اكەلەدى.
«دامىعىن ەلدەردە 1 تەكشە مەتر سۋعا 4-6 كەلى اۋىل شارۋاشىلىعى ءونىمى وندىرىلسە، بىزدە نەبارى 0،4-0،8 كەلى، ياعني 6 ەسە از وندىرىلەدى. ال دامىعان ەلدەردە 1 كەلى ءونىم وندىرۋگە 160-400 ليتر سۋ جۇمسالسا، بىزدە 1200-2500 ليتر سۋ جۇمسالادى. دەمەك، ەلىمىزدەگى سۋارمالى جەرلەردىڭ گيدرومەليوراتيۆتىك احۋالى قاناعاتتانارلىقسىز جاعدايدا. بۇل ۇكىمەت تاراپىنان نازار اۋدارارلىق ماسەلە»، - دەدى دەپۋتات.
ونىڭ ايتۋىنشا، مينەرالدى تىڭايتقىشتاردىڭ قىمباتتىعى دا بولەك ءبىر پروبلەما. بيىل ولاردىڭ باعاسى وتكەن جىلمەن سالىستىرعاندا 2،5-3 ەسە ءوستى. بۇل سالادا دەلدالدار ماڭىزدى ءرول اتقارادى، سونىڭ سالدارىنان ءونىمنىڭ قۇنى ەداۋىر ءوسىپ كەتەدى. دەپۋتات وسىعان بايلانىستى ءوز ساۋالىندا «مەليوراسيا تۋرالى» زاڭدى قابىلداۋ قاجەتتىگىن اتاپ ءوتتى. ول زاڭدا مەملەكەتتىك ورگاندار مەن جەر پايدالانۋشىلاردىڭ جەردى مەليوراسيالاۋ جونىندەگى جاۋاپكەرشىلىگى ناقتىلانۋى ءتيىس. سونىمەن قاتار سەناتور ەلىمىزدە اۋىل شارۋاشىلىعى بانكىن اشۋ قاجەتتىگىنە دە نازار اۋداردى.
«ءبىزدىڭ اۋىل شارۋاشىلىعى وندىرۋشىلەرى ەۆرازيالىق ەكونوميكالىق وداققا ەنگەن رەسەي، بەلارۋس ەلدەرىنىڭ اۋىل شارۋاشىلىعى تاۋارلارىن وندىرۋشىلەرىمەن باسەكەگە تۇسە الماي وتىر. ويتكەنى، بۇل ەلدەردىڭ شارۋالارىنىڭ جەرى مەن مۇلكىن كەپىلدىككە الىپ، ۇزاق مەرزىمگە ارزان نەسيە بەرەتىن، بولىمشەلەرى بارلىق اۋدانداردا ورنالاسقان اگروبانكتەرى قىزمەت ەتەدى. وسى كەزگە دەيىن پارلامەنت قابىرعاسىندا بىرنەشە رەت كوتەرىلىپ، ءبىراق شەشىمىن تاپپاي جاتقان ءبىزدىڭ ەلىمىزدە دە وسىنداي ارنايى مامانداندىرىلعان اۋىل شارۋاشىلىعى بانكىن اشۋ ماسەلەسىن قاراپ، ونىڭ وڭ شەشىلۋىن بۇكىل شارۋالار كۇتىپ وتىرعانىنا نازارىڭىزدى اۋدارعىمىز كەلەدى»، - دەدى م. باقتيار ۇلى.