دالا قۇستارى، سۋ قۇستارى كەلە باستاعالى ءبىرسىپىرا ۋاقىت بولدى. بۇلبۇلدارىنىڭ اۋەزدى داۋسى بيىل قۇلاققا ەرتەرەك جەتتى. بۇل كوكتەمنىڭ بەلگىسى دەسەك تە، وكپەك جەلدىڭ، سارقىراعان سەلدىڭ اۋىلى الدا. ادۋىندى «الاساپىران» باستالدى.
«جارتىسى قۇدايدىكى، جارتىسى كەدەيدىكى» دەگەن ناۋرىز ايى دا، مىنە، ءبىتىپ بارا جاتىر. وتكەندە «بەسقوناقتىڭ ءبىر كۇنى» دەگەن امال ءجۇردى. «ماي بوران»، «بوساعا باسى» دەگەن جاناما اتاۋلارى بار. قىستىڭ ءبىر كۇندىك سوڭعى بورانى كورىنىس بەردى. الماتىدا قار جاۋدى، ىزعار، جاۋىنشاشىن بولدى. ءشوپتىڭ بوي كوتەرۋىنە، اعاشتاردىڭ ەسكى جاپىراعىنان ارىلىپ، جاڭاسىنىڭ شىعۋىنا جاڭبىردىڭ پايداسى بولماسا، زيانى جوق. بۇرىنعى شارۋالار «بەسقوناقتى» كۇتىپ، قاتتى ساقتانعان، «بەسقوناق» وتىسىمەن ارقاسىن ءسال دە بولسا كەڭگە سالىپ، كوكتەمگى جۇمىستارعا كىرىسەتىن بولعان. 20-سىنان باستاپ «ابدىكەي» امالى كورىنىس بەردى. قازاق «سيىردىڭ ورازا ۇستاۋى» دەپ اتاعان بۇل امال دا اتىنا ساي ءوتتى.
وتكەن پايىمىمىزدا «...اپتا ايدىڭ باسىن دا، ورتاسىن دا، سوڭىن دا قامتىپ تۇر. بۇلاردىڭ اۋا رايىنا اسەرى بولماي قالمايدى. كۇندىز كۇننىڭ كوزى جارقىراپ تۇرعانىمەن تۇنگە قاراي سۋىتۋى مۇمكىن. سونىڭ سالدارىنان كۇندىز ەرىگەن قار تۇنگى جانە تاڭعى ايازبەن قاتىپ، مۇزعا اينالىپ، كوكتايعاق ورىن الۋى عاجاپ ەمەس... ويتكەنى، بۇل «قۇس قاناتى» امالى عوي. قۇستار كەلىپ جاتىر مەكەنىنە. قۇستاردىڭ قاناتىمەن جەل كەلەدى، سامال ەسەدى، ولارعا جاڭبىر مەن قار ىلەسەدى...» دەپ جازعان بولاتىنبىز. پايىمىمىز ءدال كەلدى.
بۇرسىگۇنى (29 ناۋرىز) قاتتى داۋىل تۇرىپ، تالاي ءۇيدىڭ شاتىرى، قوراسى ۇشىپ كەتتى. بوراننىڭ سوڭى قارعا ۇلاستى.
...كوكتەمنىڭ العاشقى ايى – ناۋرىزدىڭ سوڭىنا قاراي جىلى جاقتان قۇستار قايتىپ كەلىپ جاتىر. ولاردىڭ قاناتىنا ىلەسكەن قار مەن جاڭبىر، سۋىق جەل ەلدىڭ ەسىن الۋدا. مۇنى حالقىمىز «قۇس قاناتى» دەپ اتاعان. قار ەرىپ، جەر لايساڭ بولۋدا.
بۇل – «الاساپىران» امالىنىڭ باستالعانى... ءقازىر اعاشتار بۇرشىگىن ءبۇرتيتىپ، تابيعاتتىڭ جىلۋىن، كوكتەمنىڭ شۋاعىن تىم ەرتە سەزىنەتىن ورىك اعاشتارى گۇلىن اشىپ جىبەرۋگە ءازىر تۇر. ەندى بىرەر اپتادا الماتى شاھارى گۇلگە بولەنىپ، نۇرعا كەنەلىپ شىعا كەلەدى.
«قىزىر قامشىسى»، «توبىلعى جارعان»، «قىزىل جۇمىرتقا»، تاعى دا باسقا امالدار دا كوكتەمنىڭ ەنشىسىندە... ولار دا ءوز رەتىمەن كەلە بەرەدى. ايتسە دە، وڭتۇستىك وڭىرلەردە توڭ ەرىپ، جەردىڭ كوبەسى سوگىلدى.
بۇگىن قولدانىستاعى كۇنتىزبە بويىنشا، ناۋرىز ايىنىڭ 31ء-ى، اي جۇيەسى بويىنشا، 27ء-سى، قازاقشا – 18ء-ى. اپتا (31 ناۋرىز بەن 7 ءساۋىردىڭ اراسى) ايدىڭ باسى-اياعىن تۇگەل قامتىپ تۇر. بۇل، ارينە، جوعارىدا اتى اتالعان ادۋىندى «الاساپىران» امالىنىڭ جاۋىن-شاشىندى، لايساڭ بولاتىنىن اڭعارتقانداي. دەگەنمەن، الداعى اپتادا اشىق، جىلى كۇندەر دە بولاتىنىن جوققا شىعارۋعا بولمايدى. اسپانداعى قوزعالىس، جۇلدىز بەن بۇلتتىڭ قيمىلى بىزگە وسىنى سەزدىرگەندەي. قالاي دەسەك تە، كوكتەم شىقتى.
از كۇندە ورىك گۇلدەسە، ارتىنشا شيە، سوسىن الما گۇلدەيدى. تابيعات-انا مەيىرىمىن شاشىپ، سول جەمىستەردى ەل-جۇرتقا بۇيىرتسىن! تابيعات توسىن مىنەز تانىتپاسىن. وڭىرىمىزدەن شاتتىق، وڭىمىزدەن كۇلكى كەتپەسىن!