تۇزەتۋلەر پرەزيدەنتكە قول قويۋعا جىبەرىلدى.
پارلامەنت دەپۋتاتتارى سەناتىنىڭ جالپى وتىرىسىندا تۇڭعىش پرەزيدەنت كۇنىن مەملەكەتتىك مەرەكەلەر قاتارىنان الىپ تاستاۋعا باعىتتالعان زاڭدى قابىلدادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇل نورما «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كينەماتوگرافيا، مادەنيەت جانە مەرەكەلەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا قامتىلعان.
وسى ورايدا «قازاقستان رەسپۋبليكاسىنداعى مەرەكەلەر تۋرالى» زاڭعا 25 قازان – رەسپۋبليكا كۇنى ۇلتتىق مەرەكە جانە 16 جەلتوقسان – تاۋەلسىزدىك كۇنى مەملەكەتتىك مەرەكە بولىپ بەلگىلەنەتىن وزگەرىستەر ەنگىزۋ قاراستىرىلعان. سونداي-اق 1 جەلتوقسان – تۇڭعىش پرەزيدەنت كۇنىن مەملەكەتتىك مەرەكەلەر تىزىمىنەن الىپ تاستاۋ ۇسىنىسىنا قولداۋ جاسالدى.
بۇل قۇجاتتا «كينەماتوگرافيا تۋرالى» جانە «مادەنيەت تۋرالى» قازاقستان رەسپۋبليكاسىنىڭ زاڭدارىنا مىناداي تۇجىرىمدامالىق تۇزەتۋلەر مەن جاڭاشىلدىقتى كوزدەيتىن وزگەرىستەر مەن تولىقتىرۋلار ەنگىزۋ ۇسىنىلعان:
- كينەماتوگرافيا سالاسىن مەملەكەتتىك قارجىلىق قولداۋ؛
- كينەماتوگرافيا سالاسىنىڭ ماتەريالدىق-تەحنيكالىق بازاسىن ساقتاۋ مەن دامىتۋدى جۇيەلەندىرۋ جانە زاڭنامالىق رەگلامەنتتەۋ؛
- بالالار انيماسيالىق فيلمدەرى مەن وتباسىمەن كورۋگە ارنالعان فيلمدەردى قازاق تىلىندە دۋبلياجداۋدى مەملەكەتتىك قولداۋ؛
- كينەماتوگرافيا سالاسىندا مەملەكەتتىك قارجىلىق قولداۋدى الۋ ءۇشىن كينەماتوگرافيالىق قىزمەت سۋبەكتىلەرىنىڭ شەڭبەرىن كەڭەيتۋ؛
- ۇلتتىق كينونى قولداۋ مەملەكەتتىك ورتالىعىنىڭ جانىنان ۇلتتىق كينوكوميسسيا قۇرۋ مەحانيزمىن جانە ونىڭ قىزمەت ەتۋىن زاڭنامالىق رەتتەۋ؛
- حالىقارالىق ارەنالاردا ۇلتتىق فيلمدەردى ىلگەرىلەتۋدى مەملەكەتتىك قولداۋ؛
- ۇلتتىق فيلمدەردى شىعارۋعا بولىنەتىن قارجىنى: تاريحي، پاتريوتتىق جانە يميدجدىك فيلمدەرگە – 70 پايىز، ال جەكە كينوجوبالاردى، ونىڭ ىشىندە دەبيۋتتىك فيلمدەردى قوسا قارجىلاندىرۋعا – 30 پايىز ءبولۋدىڭ جاڭا تاسىلدەرىن ايقىنداۋ؛
- «كينەماتوگرافيا تۋرالى» قازاقستان رەسپۋبليكاسى زاڭىنىڭ نورمالارىن ىسكە اسىرۋ كەزىندە ءبىرىڭعاي قۇقىق قولدانۋ تاجىريبەسىن قامتاماسىز ەتۋ ءۇشىن جاڭا تۇسىنىكتەر ەنگىزۋ.