25 قازان رەسمي تۇردە ۇلتتىق مەرەكە – رەسپۋبليكا كۇنى بولىپ بەلگىلەنەدى.
سەنات دەپۋتاتتارى "رەسپۋبليكا كۇنىن قايتارۋ تۋرالى" زاڭدى قابىلدادى، دەپ حابارلايدى Almaty-akshamy.kz
«قازاقستان رەسپۋبليكاسىنىڭ كەيبىر زاڭنامالىق اكتىلەرىنە كينەماتوگرافيا جانە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى اياسىندا مەملەكەتتىك مەرەكەلەر تىزىمىنە وزگەرىس ەنگىزىلەدى. وعان سايكەس، 25 قازان رەسمي تۇردە ۇلتتىق مەرەكە – رەسپۋبليكا كۇنى بولىپ بەلگىلەنەدى.
ال 1 جەلتوقسان – تۇڭعىش پرەزيدەنت كۇنىن مەملەكەتتىك مەرەكەلەر قاتارىنان الىپ تاستاۋ ۇسىنىلدى. بۇل كۇن مەملەكەتتىك رامىزدەر كۇنى، العىس ايتۋ كۇنى جانە قوعامدىق ماڭىزى بار وزگە كۇندەر سەكىلدى اتالىپ وتەدى. سايكەسىنشە، قازاقستاندىقتار 1 جەلتوقساندا دەمالمايدى.
ال 25 قازاندا رەسمي تۇردە دەمالىس بولادى. رەسپۋبليكا بويىنشا مەرەكەلىك شارالار ۇيىمداستىرىلادى. ال 16 جەلتوقسان ەسكە الۋ كۇنىنە اينالادى.
2009 جىلى بۇرىنعى پرەزيدەنت نۇرسۇلتان نازاربايەۆتىڭ باستاماسىمەن 25 قازان – رەسپۋبليكا كۇنى رەسمي مەرەكەلەر تىزىمىنەن شىعارىلعان بولاتىن. ال مەملەكەت باسشىسى قاسىم-جومارت توقايەۆ 2022 جىلى 16 ماۋسىمدا ۇلتتىق قۇرىلتايدىڭ وتىرىسىندا بۇرىنعى مەرەكەنى قايتارۋ قاجەتتىگىن مالىمدەدى. سەبەبى ءدال سول كۇنى 1990 جىلى قازاقستاننىڭ ەگەمەندىگى تۋرالى دەكلاراسيا قابىلداندى.
رەسپۋبليكا كۇنىن قايتارۋ تۋرالى زاڭعا پرەزيدەنت قول قويۋى كەرەك. وسىدان كەيىن قۇجات زاڭدى كۇشىنە ەنەدى.