زاڭ جوباسىندا سەرۆيستىك كومپانيالار ينستيتۋتىن قۇرۋ قاراستىرىلعان.
بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سترەستىك اكتيۆتەر نارىعىن دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى قابىلداندى، دەپ حابارلايدى Almaty-akshamy.kz.
«سترەستىك اكتيۆتەردىڭ 4 توبى بار. وسى ورايدا تولەۋ مەرزىمى 90 كۇننەن اسقان كرەديتتەر 870 ملرد تەڭگە سومادا، قايتا قۇرىلىمدالعان كرەديتتەر 936 ملرد تەڭگە سومادا، ءوندىرىپ الىنعان مۇلىك 156 ملرد تەڭگە سومادا جانە بانكتەردىڭ سترەستىك اكتيۆتەردى باسقارۋ جونىندەگى ەنشىلەس ۇيىمدارىنىڭ اكتيۆتەرى 356 ملرد تەڭگە سومادا قامتىلعان. بانكتەردىڭ بالانسىن جۇمىس ىستەمەيتىن كرەديتتەردەن مەملەكەت قاراجاتىن تارتپاي تازارتۋدىڭ نارىقتىق تەتىگىن قۇرۋ ماڭىزدى. بۇل تۇرعىدا سترەستىك اكتيۆتەردىڭ ءوتىمدى نارىعىن دامىتۋ قاجەت. سترەستىك اكتيۆتەر نارىعىن قۇرۋ ءۇشىن وسى زاڭ جوباسى 4 زاڭعا وزگەرىستەر مەن تولىقتىرۋلار ەنگىزۋدى كوزدەيدى»، - دەدى م. ءابىلقاسىموۆا.
بىرىنشىدەن، زاڭ جوباسىندا سترەستىك اكتيۆتەردى اۆتوريزاسيالانعان ساتىپ الۋشىلاردىڭ قولدانىستاعى ءتىزىمىن جەكە ينۆەستورلاردى قوسۋ ارقىلى كەڭەيتۋ كوزدەلگەن.
«قازىرگى ۋاقىتتا بانكتەر تۋرالى زاڭنىڭ 36-1 بابىنا سايكەس، اۆتوريزاسيالانعان ساتىپ الۋشىلار تىزىمىنە ەكىنشى دەڭگەيدەگى بانكتەر، بانكتەردىڭ سترەستىك اكتيۆتەردى باسقارۋ جونىندەگى ەنشىلەس ۇيىمدارى، پروبلەمالىق كرەديتتەر قورى، كوللەكتورلىق اگەنتتىكتەر جانە باسقا دا قارجى ۇيىمدارى كىرەدى. بۇل رەتتە، ءتىزىم كەڭەيتىلىپ، بانكتەردىڭ جانە ميكروقارجى ۇيىمدارىنىڭ سترەستىك اكتيۆتەرىن جەكە ينۆەستورلارعا ساتۋ قۇقىعى بەرىلەدى. جەكە ينۆەستورلارعا زاڭدى تۇلعالاردىڭ جانە دارا كاسىپكەرلەردىڭ تەك پروبلەمالىق قارىزدارىن ساتىپ الۋعا رۇقسات ەتىلەدى. زاڭ جوباسىندا قارىز الۋشى – جەكە تۇلعالاردىڭ قۇقىقتارىن قورعاۋ ءۇشىن ولاردىڭ نەسيەلەرىن ينۆەستورلارعا ساتۋ ەسكەرىلمەگەن»، - دەدى اگەنتتىك باسشىسى.
ەكىنشىدەن، زاڭ جوباسىندا سەرۆيستىك كومپانيالار ينستيتۋتىن قۇرۋ قاراستىرىلعان. ولار ينۆەستورلارعا پروبلەمالى كرەديتتەرگە قىزمەت كورسەتۋ جانە باسقارۋ قىزمەتتەرىن ىسكە اسىرادى.
«سەرۆيستىك كومپانيالاردىڭ فۋنكسيالارىن ءتيىستى تاجىريبەسى مەن قۇزىرەتى بار بانكتەردىڭ سترەستىك اكتيۆتەردى باسقارۋ جونىندەگى ەنشىلەس ۇيىمدارىنا جانە كوللەكتورلىق اگەنتتىكتەرگە بەرۋ ۇسىنىلادى. سەرۆيستىك كومپانيالار اكتيۆتەردى سەنىمگەرلىك تۇردە باسقارادى، ءوندىرىپ الۋدىڭ جەكە ستراتەگياسىن ازىرلەيتىن بولادى جانە سترەستىك اكتيۆتەردىڭ يەلەرىنە باسقا دا قىزمەتتەر كورسەتەدى. زاڭ اياسىنداعى دەڭگەيدە سەرۆيستىك كومپانيالار ءۇشىن كاپيتالدىڭ مولشەرى، نارىقتاعى جۇمىس تاجىريبەسى، ءمىنسىز ىسكەرلىك بەدەلىنىڭ بولۋى سياقتى جوعارى تالاپتار بەلگىلەنەتىن بولادى. اگەنتتىك بەلگىلەنگەن تالاپتارعا سايكەس كەلەتىن سەرۆيستىك كومپانيالاردىڭ ءتىزىلىمىن جۇرگىزىپ، ولار تۋرالى اقپاراتتى ءوزىنىڭ ينتەرنەت-رەسۋرسىندا ورنالاستىرادى. بۇل قارىز الۋشىلاردىڭ قۇقىقتارىن قورعاۋدىڭ قوسىمشا تەتىگىن قامتاماسىز ەتۋگە مۇمكىندىك بەرەدى، سەبەبى اتالعان ۇيىمدار اگەنتتىكتىڭ رەتتەۋ اياسىنا جاتادى»، - دەدى م. ءابىلقاسىموۆا.
«زاڭ جوباسى ءوندىرىپ الىنعان مۇلىكتىڭ، ياعني بانكتىڭ مەنشىگىنە وتكەن مۇلىكتىڭ بانكتەردىڭ جانە ميكروقارجى ۇيىمدارىنىڭ تەڭگەرىمىندە بولۋى ءۇشىن شەكتى مەرزىمدى 3 جىل دەپ بەلگىلەۋدى قاراستىرادى. بۇل بانكتەر مەن ميكروقارجى ۇيىمدارىن سترەستىك اكتيۆتەردى ەكونوميكالىق اينالىمعا جەدەل تۇردە تارتۋعا ىنتالاندىرادى»، - دەدى ول.