قىتايدىڭ وڭتۇستىگىندە قاتتى سۋ تاسقىنى بولدى

وزەندەگى سۋ سوڭعى 50 جىلداعى رەكوردتى دەڭگەيگە جەتتى.

قىتايدىڭ وڭتۇستىگىندەگى گۋاندۋن پروۆينسياسىندا توتەنشە جاعدايدىڭ جوعارى دەڭگەيى جاريالاندى. كەيبىر اۋدانداردا وزەندەگى سۋ سوڭعى 50 جىلداعى رەكوردتى دەڭگەيگە جەتتى، دەپ حابارلادى Almaty-akshamy.kz Bbc.com سىلتەمە جاساپ. 

سينحۋا اگەنتتىگىنىڭ دەرەگى بويىنشا، كەلگەن شىعىن مولشەرى 470 ميلليون يۋان نەمەسە 70،2 ميلليون دوللار بولعان، 40 مىڭنان استام گەكتار ەگىستىك جەر جوىلعان. 

وزگە دە وڭىرلەردە نوسەر تولاستاماي تۇر. ەلدىڭ وڭتۇستىگى مەن شىعىسىنداعى 5 پروۆينسيا مەن اۆتونوميالىق اۋدان جاپا شەككەن. قاتتى جاۋعان جاڭبىر مەن سۋ تاسقىنى كەسىرىنەن لاي كوشكىندەرى ءجۇردى. قۇتقارۋشىلار كۇنى-تۇنى تىنباي جۇمىس ىستەپ جاتىر. جالپى وسىنداي جاعداي جىل سايىن قايتالانىپ ءجۇر جانە مامانداردىڭ پىكىرىنشە احۋالدىڭ جاقساراتىن ءتۇرى جوق.

«كوپتەگەن زەرتتەۋلەر ىستىق كۇشەيە بەرىپ، ۇلكەن اۋماققا تارايتىنىن كورسەتتى. 2050 جىلعا دەيىن اپتاپ ىستىق كەزەڭدەرى بولاتىن جەردىڭ اۋدانى ءتورت ەسە ارتۋى مۇمكىن. سول كەزگە دەيىن نوسەر جاۋاتىن اۋدان دا ەكى ەسە ارتادى. كليماتتىڭ وزگەرۋىنە ءقاۋىپ ءتونىپ تۇر، مۇنى ءقازىردىڭ وزىندە سەزىپ تۇرمىز»، – دەدى مەملەكەتتىك كليمات ورتالىعىنىڭ ديرەكتورى چاو سينچەن. 

ايتا كەتسەك، بۇل قاتەرگە توتەپ بەرۋ ءۇشىن قىتايدا العاش رەت 2035 جىلعا دەيىن كليماتتىڭ وزگەرۋىنە بەيىمدەلۋدىڭ ۇلتتىق ستراتەگياسى جاريالاندى.