سەنات سپيكەرى ماۋلەن اشىمبايەۆتىڭ توراعالىعىمەن پالاتا وتىرىسى ءوتتى. وندا سەناتورلار مەديا سالاسىنا جانە جاڭارتىلاتىن ەنەرگياعا قاتىستى زاڭداردى، سونداي-اق، بالىق اۋلاۋ سۋبسيديالارى جونىندەگى كەلىسىمدى قارادى.
وتىرىس بارىسىندا سەناتورلار «ماسس-مەديا تۋرالى» زاڭدى جانە وعان ىلەسپە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ماسس-مەديا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى»، «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە ماسس-مەديا ماسەلەلەرى بويىنشا وزگەرىستەر ەنگىزۋ تۋرالى» زاڭداردى قاراپ، ماقۇلدادى، دەپ حابارلايدى Almaty-akshamy.kz.
پالاتا ءتوراعاسى اتاپ وتكەندەي، بۇل زاڭدار ماسس-مەديا سالاسىنداعى زاڭنامانى جۇيەلى تۇردە جەتىلدىرۋدى كوزدەيدى. نەگىزگى زاڭ ارقىلى ماسس-مەديا قىزمەتىنىڭ ماقساتتارى، قاعيداتتارى مەن مىندەتتەرى بەكىتىلدى.
«وقيعالاردى وبەكتيۆتى تۇردە جاريالاۋ جانە تاراتىلاتىن اقپاراتتىڭ انىقتىعى زاڭدا كورسەتىلگەن نەگىزگى قاعيداتتاردىڭ ءبىرى. جاڭا نورمالار ارقىلى ب ا ق قىزمەتىن ۇيىمداستىرۋ شارتتارى، جۋرناليستەردىڭ كەپىلدىكتەرى، ولاردىڭ ازاماتتارمەن جانە ۇيىمدارمەن ءوزارا قارىم-قاتىناسىنىڭ نەگىزدەرى دە رەتتەلدى. مەملەكەتتىك ءتىلدىڭ مارتەبەسىن نىعايتۋ ماقساتىمەن وتاندىق كونتەنتتى دامىتۋعا ارنالعان ەرەجەلەر دە قاراستىرىلعان. بالالار مەن مۇگەدەكتىگى بار ادامداردىڭ قۇقىقتارىن قوسىمشا قورعاۋعا ارنالعان نورمالار دا بار. پرەزيدەنتىمىز قاسىم-جومارت كەمەل ۇلى توقايەۆ اتاپ وتكەندەي، مەملەكەت، مەديا جانە قوعام اراسىنداعى كەلىسىم ادىلەتتى قازاقستاننىڭ بەرىك ىرگەتاسىنا اينالۋعا ءتيىس. وسى رەتتە ماقۇلدانعان زاڭدار بارلىق مۇددەلى تاراپتىڭ پىكىرىن ەسكەرەتىن ساپالى جاڭا قۇقىقتىق مودەل قالىپتاستىرادى دەپ سەنەمىز»، – دەدى ماۋلەن اشىمبايەۆ.
ۇسىنىلعان جاڭا نورمالاردىڭ قاتارىندا قارجىلاندىرۋ تەتىكتەرىنە، بۇقارالىق اقپارات قۇرالدارىنىڭ ماتەريالدارىنا قويىلاتىن ەسكىرۋ مەرزىمدەرىن بەلگىلەۋگە، ب ا ق سۇراۋلارىن قاراۋ مەرزىمدەرىن قىسقارتۋعا جانە تاعى باسقا ماسەلەلەرگە قاتىستى نوۆەللالار بار.
سونىمەن قاتار سەنات وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جاڭارتىلاتىن ەنەرگيا كوزدەرىن پايدالانۋدى قولداۋ جانە ەلەكتر ەنەرگەتيكاسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ قارالىپ، ماقۇلداندى. بۇل زاڭ وسى باعىتتاعى قولدانىستاعى زاڭنامانى جەتىلدىرۋگە، جاڭارتىلاتىن ەنەرگيا كوزدەرىن پايدالانۋ كولەمىن ودان ءارى ۇلعايتۋعا، سونداي-اق، ەلەكتر ەنەرگەتيكاسى سالاسىن قوسىمشا قولداۋعا باعىتتالعان. وسىعان بايلانىستى زاڭدا جاڭارتىلاتىن ەنەرگيا تەحنولوگيالارىن پايدالانۋدى ىنتالاندىرۋ جانە وڭىرلىك ەلەكتر جەلىلەرىن دامىتۋ ءۇشىن ءبىرقاتار قۇقىقتىق تەتىكتەرى قاراستىرىلعان.
سونداي-اق دەپۋتاتتار «دۇنيەجۇزىلىك ساۋدا ۇيىمىن قۇرۋ تۋرالى مارراكەش كەلىسىمىنە وزگەرىستەر ەنگىزۋ تۋرالى حاتتامانى (بالىق اۋلاۋ سۋبسيديالارى جونىندەگى كەلىسىم) راتيفيكاسيالاۋ تۋرالى» زاڭدى دا قاراپ، ماقۇلدادى. قۇجات زاڭسىز، حابارلانبايتىن جانە رەتتەلمەيتىن بالىق اۋلاۋعا ىقپال ەتەتىن سۋبسيديا بەرۋدى شەكتەۋ ارقىلى بالىق رەسۋرستارىنىڭ ساقتالۋىن قامتاماسىز ەتۋگە ارنالعان. وتىرىستا اتاپ وتىلگەندەي، دسۇ-نىڭ بارلىق مۇشەسى ءۇشىن مىندەتتى حاتتامانىڭ قابىلدانۋى كوپجاقتى ساۋدا بايلانىسى بار ەل رەتىندە قازاقستاننىڭ يميدجىنە وڭ اسەرىن تيگىزەدى.
پالاتا وتىرىسىندا سەناتورلار دەپۋتاتتىق ساۋالدارىن دا جولدادى.
اندرەي لۋكين ۇكىمەتتى ساقتاندىرۋ كومپانيالارىنىڭ قىزمەتىنە باقىلاۋدى كۇشەيتۋگە شاقىردى. دەپۋتاتتىڭ ايتۋىنشا، قازىرگى ەڭ تومەنگى ساقتاندىرۋ مولشەرلەمەسى جۇمىس بەرۋشىلەر ءۇشىن، اسىرەسە، اۋىلدىق جەرلەردە قارجىلىق اۋىرتپالىق تۋدىرىپ وتىر.
مۇرات قادىربەك كەنتاۋ قالاسىنىڭ ەكولوگيالىق پروبلەمالارىنا توقتالدى. ول ەكولوگيالىق ءقاۋىپتى ايماقتاردا تۇراتىن ازاماتتارعا ۇستەماقى تولەۋ ماسەلەسىن كوتەردى.
التىنبەك نۋح ۇلى مەكتەپ وقۋشىلارىنا ارنالعان ءبىلىم بەرۋ باعدارلاماسىنىڭ جۇكتەمەسى شامادان تىس ەكەنىن ايتىپ، الاڭداۋشىلىق ءبىلدىردى. دەپۋتاتتىڭ پىكىرىنشە، ورتا ءبىلىم بەرۋ ساپاسىن ارتتىرۋ تۇجىرىمداماسىنا وسى باعىتتاعى حالىقارالىق تاجىريبەنى ەسكەرە وتىرىپ وزگەرىستەر ەنگىزۋ كەرەك.
نۋريا نيازوۆا الماتى وبلىسى ەڭبەكشىقازاق اۋدانىنداعى كوپسالالى اۋرۋحانانىڭ وزەكتى پروبلەمالارىنا ۇكىمەتتىڭ نازارىن اۋداردى. اتالعان نىسان انگيوگرافيالىق جۇيە ورناتۋدى قاجەت ەتەدى. بۇل جابدىق قان اينالىمى جۇيەسىنىڭ اۋرۋلارىن ساپالى ەمدەۋ جانە ينسۋلت سالدارىنان بولاتىن ءولىمدى ازايتۋ ءۇشىن كەرەك.
ارمان وتەعۇلوۆ ءوز ساۋالىندا وتاندىق تەمىرجول سالاسىنداعى نەگىزگى پروبلەمالارعا، ونىڭ ىشىندە ينفراقۇرىلىمنىڭ توزۋى، ۆاگونداردىڭ تاپشىلىعى، پروسەستەردى اۆتوماتتاندىرۋدىڭ تومەن دەڭگەيى، بيلەتتەردىڭ جەتىسپەۋشىلىگى جانە ولاردىڭ جوعارى قۇنى سياقتى تۇيتكىلدەرگە توقتالدى.
اينۇر ارعىنبەكوۆا راديوفارماسيەۆتيكالىق دارىلىك پرەپاراتتاردى تىركەۋ جانە ليسەنزيالاۋ پروسەسىندەگى شەكتەۋلەر ەلىمىزدە يادرولىق مەديسينانىڭ دامۋىنا كەدەرگى كەلتىرەتىنىن تىلگە تيەك ەتتى. وسىعان بايلانىستى سەناتور پروسەدۋرانى جەڭىلدەتۋ ءۇشىن ۇلتتىق نورماتيۆتەردى ەۋروپالىق ستاندارتتارعا بەيىمدەۋدى ۇسىندى.