1 ماۋسىم - حالىقارالىق بالالاردى قورعاۋ كۇنىنە وراي 29 مامىر كۇنى پەدياتريا جانە بالالار حيرۋرگياسى عىلىمي ورتالىعىنىڭ ءبىر توپ دارىگەرلەرى مەن س.ج.اسفەندياروۆ اتىنداعى قازاق ۇلتتىق مەديسينا ۋنيۆەرسيتەتىنىڭ بالالار اۋرۋلارى كافەدراسىنىڭ ماماندارى ىلە اۋدانىنداعى بالالاردى تەگىن قارادى.
«پەدياتريالىق دەسانت» قايىرىمدىلىق شاراسى الماتى وبلىسى، ىلە اۋدانىنىڭ «Almaty Contact logistic» بازاسىندا ءوتتى، دەپ حابارلايدى Almaty-akshamy.kz.
پەدياتريا ورتالىعى ماماندارى اتالمىش حولدينگ قىزمەتكەرلەرىنىڭ بالالارىن قاراپ، كەڭەستەرىن بەردى. دارىگەرلەر ءبىر جاستان -17 جاسقا دەيىنگى بارلىعى 100-دەن استام بالانى قاراپ، دەنساۋلىقتارىن تەكسەردى. قىزمەتكەرلەر بالالارىن نيەۆرولوگ، پەدياتر، وفتالمولوگ، حيرۋرگ، گاستروەنتەرولوگ، گەماتولوگ جانە ت.ب.ماماندارعا كورسەتىپ، جۇرەكتىڭ، ءىش قۋىسى مۇشەلەرىنىڭ جانە بۇيرەكتىڭ ۋلترادىبىستىق زەرتتەۋىنەن تەگىن وتۋگە مۇمكىندىك الدى.
مەديسينالىق تەكسەرۋ كەزىندە بالالار دەنساۋلىعىنان انىقتالعان نەگىزگى كىناراتتار - انەميا، كورۋ وتكىرلىگىنىڭ ناشارلاۋى، ءىش قاتۋ، ءتىس كاريەسى، سكاليوز، اللەرگيالىق اۋرۋلار، گادجەتتەردىڭ اسەرىنەن جۇيكە جۇيەسىنىڭ بۇزىلۋى، سونداي-اق جۇرەك-تامىر جۇيەسىنىڭ پاتولوگيالارى. قوسىمشا تەكسەرىلۋ مەن قارالۋدى قاجەت ەتەتىن بالالار پەدياتريا جانە بالالار حيرۋرگياسى عىلىمي ورتالىعىنا ەمدەلۋگە جىبەرىلدى.
«پەدياتريا ورتالىعى جىل سايىن حالىقارالىق بالالاردى قورعاۋ كۇنىنە وراي ءداستۇرلى تۇردە ءتۇرلى اكسيالار وتكىزەدى. بيىل ءبىز «Almaty Contact logistic» حولدينگىنىڭ وتىنىشىمەن، سول مەكەمەدە قىزمەت جاسايتىن مامانداردىڭ بالالارىن قاراۋدى شەشتىك. بۇل كومپانيا ۇلت ساۋلىعىنا اسا زور ءمان بەرەدى. اتالمىش كومپانيا ءبىزدىڭ ورتالىققا بالالاردى قاراۋعا، دياگنوستيكا جاساۋعا قاجەتتى، وتە قىمبات تۇراتىن مەديسينالىق قۇرال-جابدىقتاردى الىپ بەرۋگە، ءبىزدىڭ ورتالىقتىڭ زەرتحاناسىن جوندەۋگە ۇلكەن كومەگەن تيگىزگەندىگىن اتاپ وتكىم كەلەدى. بۇگىن حولدينگ قىزمەتكەرلەرى بارلىق قابىلداۋلار مەن ۋزيلەردەن تەگىن وتكەندەرى ءۇشىن ءدان ريزاشىلىقتارىن بىلدىرۋدە. ءبىز دە كومەگىمىزدى تيگىزگەندىگىمىزگە ءتانتىمىز»، دەدى اقىلى دياگنوستيكالىق كەڭەس بەرۋ ءبولىمىنىڭ مەڭگەرۋشىسى، گاستروەنتەرولوگ-ديەتولوگ دارىگەر الفيا نازاروۆا.