ازاماتتىق اۆياسيا كوميتەتى حابارلايدى:
Qatar Airways اۋە كومپانياسى 3 ماۋسىمنان باستاپ جاڭا تەرمينالعا كوشۋ تۋرالى ەلەكتروندىق حابارلامالاردى جولاۋشىلارعا مەرزىمىنەن بۇرىن تاراتقان.
الايدا، شەتەلدىك كومپانيا جۇيەلەردى ينتەگراسيالاۋعا ۇلگەرمەي، اتالعان جۇمىستار 11 ماۋسىمعا شەگەرىلدى.
5 ماۋسىمدا Qatar Airways اۋە كومپانياسى جولاۋشىلارعا رەيستەر 11 ماۋسىمنان باستاپ جاڭا تەرمينالدان جۇزەگە اسىرىلاتىندىعى تۋرالى حابارلاما جىبەرگەن. جولاۋشىلاردىڭ 98%-ى حابارلامامەن تانىسقان.
جالپى 1 ماۋسىمنان باستاپ تەرمينال 54 رەيسكە قىزمەت كورسەتتى (1 ماۋسىم – 9 رەيس، 5 ماۋسىم – 17 رەيس).
بارلىق حالىقارالىق (كۇنىنە شامامەن 50 رەيس) رەيستى تولىق اۋدارۋ كەزەڭ-كەزەڭىمەن جۇزەگە اسىرىلىپ، 20 ماۋسىمدا اياقتالادى دەپ جوسپارلانۋدا.
الماتى حالىقارالىق اۋەجايى جاڭا تەرمينالدىڭ اشىلۋىنا بايلانىستى حابارلاۋ كەزىندەگى تۇسىنىسپەۋشىلىكتىڭ الدىن الۋعا تىرىسادى جانە جولاۋشىلاردان ۋاقىتشا قولايسىزدىق ءۇشىن كەشىرىم سۇرايدى.