سەناتور الماتىداعى سپورت سارايىندا وتكەن كەلەڭسىز وقيعانى ەسكە سالدى، دەپ حابارلايدى Almaty-akshamy.kz Elorda.info-عا سىلتەمە جاساپ.
"جاستارعا ارنالعان «يك» توبى مەن SHIZA لاقاپ اتى بار ءانشىنىڭ كونسەرتىندە وتە ورەسكەل ارەكەت بولدى. قازاقستان رەسپۋبليكاسىنىڭ تۋى كەلەمەج ەتىلدى. انشىلەر تاراپىنان ادەپسىز، انايى سوزدەر ايتىلدى. ىلە-شالا كەشىرىم سۇراعانى جانە ايىپپۇل تولەگەنى ءمالىم بولدى. ءبىزدىڭ ءبارىمىز جاڭا قازاقستان قۇرامىز دەگەن نيەتتەمىز. جاڭا قازاقستاننىڭ ەڭ باستى تالابى – زاڭ ۇستەمدىگى. زاڭ بارىمىزگە ورتاق. قۇر كەشىرىممەن قۇتىلۋ – جاۋاپكەرشىلىكتەن جالتارۋ دەگەن ءسوز. پرەزيدەنت كەشە بۇعان ءوز پىكىرىن ءبىلدىردى، كوك تۋىمىز – قاستەرلى تاۋەلسىزدىگىمىزدىڭ سيمۆولى، مەملەكەتتىك رامىزدەردى قاستەرلەۋ – ءار ازاماتتىڭ پەرزەنتتىك پارىزى، بايراعىمىزدى پايدالانۋ ءتارتىبىن قايتا قاراۋ كەرەك دەدى. قوعام بۇل وقيعاعا ق ر باس پروكۋراتۋراسى، ىشكى ىستەر مينيسترلىگى قانداي قۇقىقتىق باعا بەرەتىنىن ءالى دە كۇتىپ وتىر"، - دەدى ن. ءجۇسىپ سەناتتىڭ جالپى وتىرىسىندا.
ونىڭ ايتۋىنشا، ق ر قىلمىستىق كودەكسىنىڭ 372-بابى بويىنشا «قازاقستان رەسپۋبليكاسىنىڭ رامىزدەرىن قورلاۋ 2000 اەك دەيىنگى مولشەردە ايىپپۇل سالۋعا، نە سول مولشەردە تۇزەۋ جۇمىستارىنا، نە 600 ساعاتقا دەيىنگى قوعامدىق جۇمىستارعا تارتۋعا نە 2 جىلعا دەيىنگى مەرزىمگە باس بوستاندىعىن شەكتەۋگە، نە سول مەرزىمگە باس بوستاندىعىنان ايىرۋعا جازالانادى.
"ادەتتە كونسەرتتى كىمدەر ۇيىمداستىردى؟ قالتاسىندا قوماقتى قارجىسى بارلار وتكىزەدى. ولارعا مىنا مولشەردەگى ايىپپۇلدى تولەي سالۋ تۇككە تۇرمايدى. اكىمشىلىك قۇقىقبۇزۋشىلىقتار كودەكسىنىڭ 434-بابى بويىنشا، ارتىستەردىڭ كوپشىلىك الدىندا بىلاپىت سوزدەر ايتۋى ۇساق بۇزاقىلىققا جاتادى. زاڭ بويىنشا بۇل ءۇشىن 5 اەك مولشەرىندە ايىپپۇل سالىنادى نەمەسە 10 تاۋلىككە قاماۋعا الىنادى. 440-باپتا كوپشىلىك الدىنا ىشىمدىك ءىشىپ شىققانى، ەسىرتكى پايدالانعانى ءۇشىن جاۋاپكەرشىلىك قاراستىرىلعان"، - دەدى نۇرتورە ءجۇسىپ.
سونىمەن بىرگە، دەپۋتات ەلىمىزدىڭ اتا زاڭىندا شىعارماشىلىق ەركىندىككە كەپىلدىك بەرىلگەنىن، ءبىراق ەركىندىكتى ەسسىزدىكپەن الماستىرۋعا بولمايتىنىن ايتتى.
"ار مەن ۇيات ۇلتتىق قۇندىلىقتاردىڭ نەگىزگى وزەگى بولۋعا ءتيىس. الەمنىڭ كوپتەگەن ەلدەرىندە كونسەرت وتكىزۋدىڭ پروسەدۋرالىق جولدارى بار، ەل الدىندا ورىندالاتىن تۋىندىلاردىڭ ءمان-مازمۇنى مەن ءماتىنى سول ەلدىڭ يدەولوگياسىنا ساي كەلە مە، ونەرپازدىڭ جەكە رەپۋتاسياسى قانداي دەگەن تەكسەرىستەر الدىن الا جاسالادى. كونسەرتتىڭ مارشرۋتتىق باعىتى، رەپەرتۋار ماسەلەسى، قاۋىپسىزدىك شارتتارى وتە قاتاڭ قاداعالانادى. وسى ايتىلعانداردى ەسكەرە كەلىپ، مەملەكەتتىك رامىزدەردى قورلاۋ بويىنشا زاڭ باپتارىن بارىنشا قاتايتۋدى، بەلگىلەنگەن ايىپپۇل مولشەرىن ەكى ەسە كوبەيتۋدى جانە جازا مەرزىمىن 5 جىلعا دەيىن ۇزارتۋدى، مادەنيەت تۋرالى زاڭعا كونسەرتتەر جانە باسقا مادەني-كوپشىلىك ءىس-شارالاردى ۇيىمداستىرۋشىلار مەن جەكەلەگەن ونەر وكىلدەرىنىڭ حالىق الدىنداعى جاۋاپكەرشىلىگىن قامتاماسىز ەتەتىن باپتاردى ەنگىزۋدى، ادەپسىزدىك كورسەتكەن، بىلاپىت ءسوز ايتقان، ەسىرتكىگە ەلىگىپ، ىشىمدىك ىشكەن انشىلەر مەن ونەرپازداردى 5 جىلعا دەيىن ساحنادان الاستاتۋدى ۇسىنامىز. مادەنيەت مينيسترلىگى جانىنان رەپەرتۋارلىق القا مەن رەسپۋبليكالىق جانە ايماقتىق كوركەمدىك كەڭەستەر قۇرىلۋى كەرەك. بۇقارالىق مادەني شارالاردى وتكىزۋ مەن جۇرگىزۋ تالاپتارىنا حالىقتىڭ ءسالت-داستۇرى مەن ادەپ-عۇرپىن ساقتاۋ مەن سىيلاۋ ەرەجەلەرىن ەنگىزۋدى، وسى تالاپتاردى بۇزعان شىعارماشىل ۇيىمدار مەن انشىلەردىڭ قىزمەتىن 5 جىلعا دەيىن شەكتەۋ قويۋدى تالاپ ەتەمىز"، - دەدى نۇرتورە ءجۇسىپ.