سوڭعى ۋاقىتتا الەۋمەتتىك جەلىلەردە ازاماتتاردى اسكەري قىزمەتكە شاقىرۋ كەزىندەگى پروبلەمالىق ماسەلەلەر بەلسەندى تالقىلانۋدا، دەپ حابارلايدى اlmaty-akshamy.kz.
ءبىزدىڭ ەلىمىزدى قورعاۋ ءاربىر ازاماتتىڭ قاسيەتتى بورىشى جانە كونستيتۋسيالىق مىندەتى بولىپ تابىلاتىنىن (كونستيتۋسيانىڭ 36-بابى) جۇرتشىلىققا جەتكىزەمىز.
جىل سايىن قازاقستان پرەزيدەنتى ازاماتتاردىڭ شاقىرۋىن جاريالايدى. ونى ۇيىمداستىرۋ جەرگىلىكتى اتقارۋشى ورگاندارعا جۇكتەلگەن جانە «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭعا (بۇدان ءارى – زاڭ) سايكەس جۇزەگە اسىرىلادى.
اسكەرگە شاقىرۋدى كەيىنگە قالدىرۋعا نەمەسە شاقىرۋدان بوساتۋعا قۇقىعى جوق 18-27 جاس ارالىعىنداعى ازاماتتار شاقىرۋعا جاتادى (زاڭنىڭ 31-بابى).
اسكەري قىزمەتكە شاقىرىلۋعا جاتاتىن ازاماتتار جەرگىلىكتى اسكەري باسقارۋ ورگانىنىڭ شاقىرۋ قاعازى بويىنشا شاقىرۋ كوميسسياسىنا كەلۋگە مىندەتتى.
شاقىرۋ قاعازىن ازاماتتىڭ جەكە وزىنە تاپسىرۋ مۇمكىن بولماعان جاعدايدا، ونىڭ كەلۋىن قامتاماسىز ەتۋ ءتيىستى ىشكى ىستەر ورگانىنا جۇكتەلەدى (زاڭنىڭ 30-بابى).
اسكەري مىندەتتى ورىنداۋدان جالتارعان ادامداردى ىزدەستىرۋدى دە ىشكى ىستەر ورگاندارى جۇزەگە اسىرادى (زاڭنىڭ 17-ب. 3-ت.).
بۇل رەتتە، اسكەري قىزمەتتەن جالتارۋ قىلمىستىق كودەكستىڭ 387-بابى بويىنشا قىلمىستىق جاۋاپتىلىققا اكەپ سوعادى، وندا 1000 اەك-كە دەيىنگى ايىپپۇلدان باستاپ 3 جىلعا دەيىنگى مەرزىمگە باس بوستاندىعىنان ايىرۋعا دەيىن جازا كوزدەلگەن.
باياندالعاندى ەسكەرە وتىرىپ، ازاماتتاردى سانالى بولۋعا، ال جۇرتشىلىقتى جۇرگىزىلىپ جاتقان شاقىرۋ ناۋقانىنا تۇسىنىستىكپەن قاراۋعا شاقىرامىز.