«Water from air» قۇرىلعىسى اۋادان سۋدى كوندەنساسيا ءادىسى ارقىلى الادى
سەمەيلىك وقۋشىلار اۋادان تۇششى سۋ الۋدىڭ جولىن ويلاپ تاپتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قالاداعى فيزيكا-ماتەماتيكا باعىتىنداعى نازاربايەۆ زياتكەرلىك مەكتەبىنىڭ 10-سىنىپ وقۋشىلارى پاكجان نيازبەك پەن ەراسىل مىرحييەۆ رەسپۋبليكالىق «جەرگە قامقورلىق - ادامعا قامقورلىق» ارنايى كونكۋرسىنىڭ فينالىنا ءوتتى.
بىرنەشە كەزەڭنەن تۇرعان سايىسقا 60-تان استام كوماندا قاتىسىپ، وزدەرىنىڭ جوبالارىن ۇسىنعان.
سايىس اۋىلدى جەرلەردەگى حالىقتىڭ ءال-اۋقاتىن كوتەرىپ، اۋىلدان قالاعا جاپپاي كوشۋدىڭ الدىن الۋعا باعىتتالعان.
«ءبىز اۋىل تۇرعىندارىن تازا اۋىزسۋمەن قامتاماسىز ەتۋ ماسەلەسى بويىنشا جوبانى قولعا الدىق. سوڭعى ءبىر جىل بويى جوبا بويىنشا زەرتتەۋ جۇمىستارىن جۇرگىزىپ، ەلىمىز ءۇشىن عانا ەمەس الەم بويىنشا وزەكتى سانالاتىن كۇردەلى ماسەلەنىڭ شەشىمىن تابۋعا تىرىستىق. ءبىر اتاپ وتەرلىگى – اقتىق سىنعا جولداما العان 8 ۇمىتكەر كوماندالاردىڭ اراسىندا ءبىز عانا مەكتەپ وقۋشىسىمىز. قالعاندارى - جوعارى وقۋ ورىندارىنىڭ ستۋدەنتتەرى»، - دەيدى جاس زەرتتەۋشىلەر.
پاكجان مەن ەراسىلدىڭ جوبالارىنىڭ وزەكتىلىگى – اۋادان تۇششى سۋ الۋىندا.
«Water from air» قۇرىلعىسى اۋادان سۋدى كوندەنساسيا ءادىسى ارقىلى الادى.
«جاڭبىردان، تۇماننان پايدا بولعان اتموسفەرالىق سۋ بۋى توردىڭ سۋىق بەتىندە كوندەنساسيالانىپ، قۇرىلعىنىڭ تومەنگى جاعىندا ورنالاسقان رەزەرۆۋارعا جينالادى. ونىمدىلىك اۋا-رايىنا تىكەلەي بايلانىستى. ءبىراق ەسەپتەۋىمىز بويىنشا كۇنىنە 100 ليترگە دەيىن سۋ الۋعا مۇمكىندىك بار»، - دەيدى وقۋشىلار.
زەرتتەۋ نەگىزىنەن ەلىمىزدىڭ حالىق تىعىز قونىستانعان وڭتۇستىك وڭىرىندەگى 5 اۋىل بويىنشا جۇرگىزىلگەن.
بۇل اۋىلداردا سۋ تاپشىلىعى سەزىلىپ، تۇرعىندار سۋدى تاسىپ ىشەدى.
فينالدا جەڭىسكە جەتكەن جاعدايدا جاس زەرتتەۋشىلەر اۋىلعا سۋ جينايتىن مۇنارا ورناتىپ، جوبانى ارى قاراي دامىتۋدى ماقسات ەتىپ وتىر.
ايتا كەتەيىك، سايىستىڭ اقتىق سىنى 12 مامىردا «ENACTUS Kazakhstan National EXPO 2022» اياسىندا وتكىزىلمەك.